طلقات ذهبية .. 11

اهلا بيكم

من زمان مكتبناش طلقات ذهبيه

طلقات ذهبيه  11

____________________

( 1 )

خبره .. خبره

----------

أحسن حاجه في موضوع إن الواحد يدور على شغل المواقف الكوميديه الجميله

زمان كان اللي يطلب شغل ينزل إعلان و لو عايز خبره كنت بأشوفها سنتين أو تلاته بالكتير

من يوم ما إتخرجت انا و صحابي و بدأنا ندور على شغل و عينك ما تشوف إلا النور

مطلوب مهندس خبره 15 سنه في أعمال صيانة مش عارف إيه

مطلوب مهندس خبره لا تقل عن 7 سنين في مش عارف ايه

مطلوب مهندس خبره 20 سنه

و الله العظيم كان طالب خبره 20 سنه

يعني بيشتغل مهندس قبل أنا ما أتولد

المشكله اللي عنده خبره عشرين سنه ده هيدور على شغل في الجرايد ليه

ههههههههههه

و احد صاحبي إتصل بيهم قالولوا إحنا عايزين خبره 10 سنين كلمنا بعد 10 سنين

ههههههههههه

و على رأي صاحبي ده قالك انا المفروض عشان اشتغل عندهم أكون شغال مهندس من و أنا في تالته إعدادي

و مش عارفين نجيب الخبره الـ سبع سنين دي منين

ندعي ربنا و نقول

 " يارب إديني خبره 7 سنين "

__________________________________________________________

( 2 )

إمشي جنب الحيط يا ضنايا

____________

ده الكلمه اللي بيقولها اي ام و اي اب في مصر لأولاده

أمشي جنب الحيط يا ضنايا

ويطلع الواد طول عمره عايش ع المبدأ ده

و مش قادر يكح في البلد

و لما يجي يتكلم يلاقي ابوه برضه يقوله

" أسكت يا بني الحيطان لها ودان "

الواد مخه يلف بقى

" طب لما هيا الحيطان لها ودان .. بتقولي أمشي جنب الحيط ليه ؟ .. إيه النداله دي "

مش برضه نداله .. ؟

طبعا إحنا بحثنا في الموضوع ده .. إتضح ان الحاج عايز الواد يمشي جنب الحيط و هو ساكت

ساكت خالص .. ميتكلمش .. لحد ما الحيطه تقع عليه و برضه ما يتكلمش

و الله محدش ضيعنا غير المشي جنب الحيط .. و مبدأ من خاف سلم ..

يلا كفايه كده عشان الحيطان ليها ودان

_______________________________________________________

( 3 )

عليه العوض و منه العوض

-------------------------------------

لما تحصل كارثه بشريه في مصر  - يعني قطر يولع

سفينه تغرق - طياره تقع

المسئولين ربنا يديهم الصحه بيبادروا بصرف تعويضات

خمس تلاف جنيه للميت .. و ألفين جنيه للمصاب

شوف الكرم ؟ الفين جنيه للمصاب مع إنه المفروض ما ياخدش حاجه لأنه ممتش 

مش كفايه لسه عايش

على الجانب الاخر .. في السعوديه

الكارثه كانت طبيعيه .. سيول .. الحكومه ملهاش ذنب فيها

خادم الحرمين ربنا يديلو الصحه يأمر بصرف مليون ريال للمتوفي

سواء كان سعودي او غير سعودي

مليون ريال .. مليون ريال

إحنا في مصر مش عايزين مليون جنيه للمتوفي .. بس عايزين إحترام و تقدير

مش خمس تلاف جنيه و مش بيطولوها اصلا

خبر لفت انتباهي امبارح

قالك محافظ القاهره  يأمر بتشكيل لجنه من خبراء مش عارف ايه لدراسه صخور الدويقه

متشكرين يا حج كده .. مشكلة سكان الدويقه اتحلت

لأن كل اللي كان تاعبهم في الحياه إن الصخور اللي وقعت عليهم محدش درسها

 متشكرين يا حج خالص .. ربنا يديك الصحه

-------------

كفايه كده انا تعبت

سلام

مصطفى أبوزيد - 29 ديسمبر 2009

اللي مقراش الموضوع اللي فات ممكن يقراه من هنــا


و اللي عنده مشكله في التعليقات أكيد ممكن يضيف تعليق من هنـــأ


في الاخر موضوع عند أ / حازم النبراوي لازم تسمعوه لازم لازم لازم


دوس هنا

طلقات ذهبيه - 10

بسم الله

من مكان ما - مصطفى ابوزيد يحييكم من امام اللابتوب بتاع الصواف صاحبه

و كالعاده لأنه مش لاقي حاجه يعملها وقاعد يتسكع عند اصحابه

اتخذ القرار بكل حكمه و قرر يغلس عليكم كالعاده بـــ

طلقات ذهبيه 10

لو سمحتو مش عايز اي صافرات إستهجان .. أنا هبدأ على طول

---------

(1)

الحلول السحريه بالسياسه البنجريه

--

انا دلوقت بس عرفت الحكمه من اني بأشرب الشاي معلقتين سكر بس

رغم اني لا اعاني والحمد لله من اي امراض بسبب السكر

دي بقى حكمة ربنا لأن كيلو السكر بقى بأربعه جنيه و نص

أنا بصراحه سمعت الخبر اتصدمت .. انا مش بصرف على حد اينعم

و لسه ابويا بيصرف عليا بحكم اني عاطل

لكن السكر ده حاجه اساسيه في افقر بيت في مصر

كنا ننتظر طبعا اي وزير يطلع يقلنا حل

و بالفعل طلع وزير الزراعه يطمن جماهير الشعب

لكن اللي يغيظك ويجبلك شلل نصفي ان التصريح كان كالاتي

سيتم حل مشكلة السكر في غضون أربع سنوات

يا خرااااابي عالشلل اربع سنين يا حج ؟

لا استنوا بقى لما تشوفو الوسيله العالميه في الحل

قال الوزير

و ذلك بالتوسع في زراعة البنجر

اموت واعرف جاب البنجر ده منين

طب ما احنا بقالنا 900 سنه بنزرع قصب ولا عمر السكر غلي

يا ناس هتشل

اعتقد قدام شويه و بإعتبارالبنجر حل سحري جديد

هيطلع التصريح الاتي

حل مشكلة القمح في خلال 3 سنين و ذلك بالتمادي في زراعة البنجر

--------------

(2)

نوبل اوباما .. و أوبل مصر

----------

طبعا اوباما اخد جايزة نوبل للسلام

الراجل بنفسه اعترف وقال انا ما استحقهاش لكن يمكن ادوني الجايزه عشان يشجعوني ع السلام

و الله راجل فيه الخير لو حد من الحكام العرب اخدها كنا احتفلنا 50 سنه بالجايزه

المشكله بقى ان محدش في الدول العربيه بياخد الجايزه اصلا

اخر واحد افتكر انه اخد نوبل هو زويل بعد كده العمليه بلح

انا ممكن الاقي حل للعرب في المشكله دي

بما ان كل وزير ومسئول و رجل اعمال عنده اكتر من سياره فارهه اخر موديل

و مش عارف يركب ايه ولا ايه

ممكن نديهم جائزه أوبل في امتلاك السيارات

( أوبل أحد أشهر ماركات السيارات )

وبعدين اهي مفرقتش نوبل من أوبل

------------------

(3)

المصباح السحري والساحره الشريره

----------

لما كنا اطفال .. محدش يستغرب

أنا كنت طفل عادي

المهم كنا نتفرج على الكارتون وكان من اشهر الحاجات دي

المصباح السحري بتاع علاء .. علاء الدين مش علاء حاجه تانيه

متزدوناش في داهيه

و كمان كارتون الساحره الشريره

لكن اللي مضايقني بقى في المصباح السحري ده

أنا الاخ العفريت لازم يطلع من البوز بتاع المصباح

يعني الدنيا واسعه قدامك ملقتش غير البوز بقلبك الاعمى

وبعدين عفريت لازم يطلع مش لابس غير شورت ..

ما الهدوم ماليه البلد .. يظهر مكنش في رقابه ايامها

أما بقى الساحره الشريره دي غاوية شحططه

و راكبه مكنسه وقاعده تلف

مع انها ساحره يعني ممكن تختفي وتظهر في الوقت اللي هي عايزاه

طبعا انا مكنتش بفكر بالطريقه دي وانا صغير ههههههه

لكن انا باحب اغتت ع العفاريت بس

---------

كده خلصنا و طبعا الموضوع زي ما انتو شايفين ملوش لازمه

لكن هنعمل ايه

لكن كالعاده انا بوعد الجماهير الوفيه إني هحاول اعمل تطور في جدية المواضيع المطروحه

وطبعا كلكم عارفين الوسيله

بالتوسع في زراعة البنجر إن شاء الله

------

سلامتكم

مصطفى أبوزيد - 12 أكتوبر 2009

طلقات ذهبيه 9

بسم الله

مصطفى ابوزيد يحييكم من اول اوضه ع الشمال وانت داخل من باب شقتهم

واحد فاضي و عاطل ومستني يشوف الجيش

مقدمهوش غير حل واحد انه يفاجئكم ويقدملكم

.

.

.

طلقات ذهبيه 9

.

.

من غير هتافات هنبدأ على طول

---------------

(1)

الروتين وسنينه

----

صدقوني و الله مشفتش بلد في الكون كله فيها روتين زي المحروسه مصر

روتين غريب معقد ممل يمتاز بقدره تاريخيه على تعطيل المصالح

مشفتش موظف لحد الان مقلش لمواطن رايح يقضي مصلحه

انه ورقه ناقص و انه لازم يتختم من فلان و علان وترتان وحمدان

و انه لازم يصورالبطاقه 1500 مره

و يجيب ما يثبت انه بيغسل سنانه 90 مره يوميا

عمركش يا مواطن رحت قضيت مصلحه في مكان حكومي الا والموظفين يشلوك

سيبك من انهم بيجوا متأخر و انهم باردين

لأ .. خليك في اتقانهم للروتين

الواحد فيهم عامل زي الانسان الآلي

يرد عليك بكل بساطه هات وجيبو امضي واختم وتعالى بكره او بعده

مع ان نص الورق اللي بيطلبوه ملوش لازمه اصلا

انا حاليا بعمل ورق الجيش بتاعي

اموت و اعرف ليه اعمل قيد عائلي

طالما ان انا مش كبير عيله و لا وحداني

طيب خلاص هعمل قيد عائلي

مال اهلي انا ان كان ليا اخ مات من 35 سنه

اجبلو شهادة وفاه منين

انا اتوقع ان بعد عشر سنين الامور هتكون اسوأ و الروتين هيزيد

و عشان تطلع شهادة ميلاد لازم تجيب مدحت شلبي يمضيلك ع الورق

و اشمعنى مدحت شلبي ؟؟

لانه بيقول لاي حد الله عليك يا حبيب والديك

و بالتالي هو اللي هيثبت انا ابويا وامي هما فلان وفلانه

و مساء الأنوار

------------------------------------------------

(2)

المدارس واللي يروحوها

-------------

حد فيكم فاكر و هو في ابتدائي كان بيكره المدرسه قد ايه ؟

انا شخصيا كنت بأدعي و اقول يارب المدارس كلها تتهد في يوم واحد

معرفش ازاي

دلوقتي يا معلم العيال اتدلعت على حس انفلونزا الخنازير

الواد يروح يوم و يغيب يوم

يا صلاة النبي يا صلاة النبي

لما هو التعليم فاشل ومنيل بنيله والعيال بيروحوا كل يوم

تخيل لما يغيب نص الاسبوع

ابقو تعالوا قابلوني طالما التعليم فيه جمل

و قال كانوا عايزين يلغو الدراسه السنه دي

الحمد لله اني خلصت دراسه السنه اللي فاتت

و الله لو داخل البكالريوس و قالولي هنلغي الدراسه اعملهم مصيبه

ما انا كده كده متنيل على عيني ميت يبقى اموت بشهادتي احسنلي

مش كده ولا إيه ؟

---------------------------------------------------

(3)

اعلانات الحكومه

--------

برغم انها اعلانات دمها خفيف الا انها بتطلب حاجات غريبه

أيوه الاعلانات اللي بتيجي ع التلفزيون - الاعلانات الحكوميه

يا عم ده بيقول احترم الانبوبه

ههههههههههههههههه

أحترم الانبوبه ازاي يعني

أحطلها برفان مثلا .. ؟

ويقولك متخبطش عليها

لا هأبقى أرن الجرس - ههههههههههه

يا عم عايزينا نحترم الانبوبه

احترمونا انتو الاول

بلاش استفزاز الواحد عايش ومش بيتكلم

العقبري صاحب فكرة الاعلان

عمركش وقفت في طابور عيش

عمركش اتزنقت في اتوبيس

عمركش في يوم ملقتش انبوبه تركبها للبوتجاز

و بعدين متزعلش نفسك

ان شاء الله هنقول للمهندسين اللي بيصمموا ابراج وعمارات جديده

يعملو اسانسير مكتوب عليه

للأنابيب فقط ممنوع ركوب التلاجات

----------------------------

خلص الكلام

اشوفكم بخير

مصطفى ابوزيد - والله ما اعرف النهارده كام تسعه

سلام

طلقات ذهبيه 8 ( حلقه خاصه )

النهارده طلقات ذهبية 8

عن موضوع واحد بس

هو تطبيق سياسة الاستخدام العادل لمستخدمي الانترنت

(1)

انت غبي لو مفكرني اني غبي

------

بيقولوا اغبى انسان اللي بيفكر ان الناس كلها غبيه

و بيقولوها بمعنى تاني

انت تستطيع ان تخدع بعض الناس لبعض الوقت

ولكن لا تستطيع ان تخدع كل الناس كل الوقت

يعني قالو ان سياسة الاستخدام العادل دي مطبقه في جميع انحاء العالم

الناس قالت ماشي

لكن هما مش عارفين ان الشباب في مصر ما شاء لله

مفيش أذكى منه وقاموا دوروا وشافوا ازاي السياسه دي مطبقه في العالم

طلع الآتي بيديلك سعة تحميل توازي 65% من سرعتك

زي ما قالنا الاستاذ أشرف حمدي في مدونته كاريكاطظ

وبحسبه معينه طلع إن سرعة 512 كب/ث ليها 90 جيجا في الشهر

يا خرااااااااااااااااااااااااااابي

يعني لو هتطبق بالعدل فعلا يبقى الـ 25 جيجا يبقوا 90 جيجا

يا حراميه احنا مش أغبيه عشان تضحكوا علينا

ياريت تطبقوا سياسة الاستخدام العادل زي ما العالم كله بيستخدمها

مش زي ما انتو شايفين يا لصوص

عايزين تكسبو وخلاص إنتو

هأو

(2)

يا عقبري هتجيب الكلام لنفسك

--------

لأن إحنا في بلد عبقريه كل واحد بينفذ اللي في دماغه من غير ما يستشير حد

ببساطه لأنه شايف أنه صح

يعني لما الجهاز القومي للإتصالات و وزارة الإتصالات

طلعوا بالقرار العالمي العجيب ده حسوا انهم عباقره وخارقين للطبيعه واساطير

ومبصوش لقدام ولو لنص متر

القرار ده ولله الحمد هيخلي البطاله اللي فشلت كل الوزارات من 30 سنه في حل مشكلتها تزييييييييد

لأن بتوع سيبرات النت هيفلسوا ويقفلوا

بتوع الوصلات برضه هيفلسوا ويقفلوا

مش دول بس ناس كتير شغلها كله متوقف ع النت

يعني خراب بيوت

وبطاله وتزيد المشكله اللي مش لاقيين لها حل من أيام الملك أحمس

و من هنا نكتشف إننا نعيش في مصر

جمهورية مصر العربيه

(3)

حجج واهيه

---------------

الحجه الواهيه الفاشله

بيقولو هنطبق النظام ده علشان الجماعه بتوع الوصلات

علشان العيال دول وحشين وبيخالفوا القانون

دي أول حجه

طيب خد المفاجأه دي اللي انت عارفها اصلا

كل بتوع الوصلات لازم بياخدوا تصاريح من الداخليه عشان يشتغلوا

واللي راجل فيهم ما يخدش تصاريح يتبهدل

يعني الداخليه مدياهم تصاريح

يعني شغلهم قانوني

يعني قدامك حل وحيد علشان بتوع الوصلات يبطلو

تخلي الداخليه تلغي التصاريح وبالتالي المصنفات تروح تلم كل حاجه

لكن مش تروح تعاقب شعب كامل عشان تحل مشكله

طبعا انتوا عارفين ان الناس دي معاها تصاريح لكن طبعا دي حجه عشان تبرروا السرقه بتاعتكم

الحجه الواهيه التانيه اللي تثبت فشل القرار ده

بتقولو ان القرار هيحسن الخدمه

وبدون الدخول في تفاصيل الطريقه دي فعلا لو اتطبقت صح زي اوروبا

الخدمات المفروض تتسحن فعلا

لكن بعد ما بتخلص السعه بتاعتك

اللي هيا 90 جيجا ع الاقل مش 25 جيجا

في اوروبا متقدرش تشتري سعه زياده لأنك كده هتاثر بالسلب ع الخدمه

لكن هنا ممكن تشتري الجيجا بعشره جنيه

يا خراااااااااااابي الجيجا بعشرة جنيه

شوفتوا سرقه أكتر من كده وعيني عينك

يبقى دي حجج واهيه ولا لأ؟

(4)

ع الاقل 100 جنيه ؟ يا خراب بيتك يا مصطفى

------------

تخيل بقى انك هتقدر تخلي بتوع الوصلات يفلسوا يا فالح

المفروض كده الناس تشترك بقى

أقل إشتراك اللي هو بيدي 25 جيجا بـ 100جنيه في الشهر

يعني خراب بيوت

بعد ما كنت بتدفع في الوصله 30 جنيه تدفع 100 جنيه عشان تشترك

يعني اكتر من 3 أضعاف

طب عايزين الموضوع يمشي شرعي

بطلو استعباط وحطوا اسعار معقوله

إحنا أغلى نت في العالم وأبطأ سرعه برضه

الناس بره اقل حاجه 14 ميجا السرعه

مش 512 كب/ث ومتحدده وبـ 100 جنيه

في ناس ما تقدرش تدفع 100 جنيه

ده غير الراوتر أبو 150 جنيه

ده غير إن الـ 25 جيجا برضه مش هيكفوا

----------------------------------------------

موضوع رائع عند الاستاذ أشرف عشان اللي عايز يفهم أكتر

من هنـــــا

-------------------

يمكن الموضوع مكرر بس كان لازم أتكلم

ع الهامش

------------

إقلع غماك يا تور وأرفض تلف .. إكسر تروس الساقيه وإشتم و تف

الرائع / صلاح جاهين

------------------------

إن شاء الله حوت تايه في البحر يكون طهقان من عيشته يلوش في السلك

أيوه السلك بتاع النت اللي في البحر ويقطعه

ويفضل قاطع شهرين في مصر كلها عشان اصحاب القرار العالمي يرتاحوا

ويعرفوا قيمة النت اللي عايزين يحرموا الشباب منه

-------

و إلى لقـــاء

مصطفى أبوزيد - 9 أغسطس 2009

طلقات ذهبيه 7

الباشمهندس مصطفى ابوزيد

^

^

أيوه باشمهندس حد عنده اعتراض

جايب مقبول بس برضه باشمهندس

هع هع هع

المهم

الباشمهندس مصطفى ابوزيد يحييكم من اول اوضه ع الشمال وانت داخل شقتهم

و بصفته راجل عاطل وفاضي ومش لاقي حاجه يعملها

قرر انه يقدملكم

طلقات ذهبيه 7

تصفيييييييق حااااااد

شكرا للجماهير الوفيه

أهلا بيكم

-----------------------------

(1)

بلد بتاعت غرامات صحيح

------

من سنتين نزلت العملات المعدنيه للجنيه والنص جنيه

و من يومها والناس بتتخانق مش عايزين يستخدموه

الناس بتقول انه بيضيع بسرعه وانه بيتقل جيوبهم

بس والله انا شوفت ناس مش معترفه بيه اساسا

ويقولك لا ياعم احسن اخده ومحدش يرضى ياخده مني

بغض النظر عن انه حلو ولا وحش

وزارة الماليه اخيرا لقيت حل لعدم اعتراف الناس بيه

وقررت توقيع غرامه 100 جنيه ع اللي يرفض التعامل بالعملات المعدنيه

يا معلم

يعني مترضاش تاخد جنيه من البقال تلبس في 100 جنيه

اسلوب رائع في حل المشكلات

وده يوصلنا لحاجه

ان بلدنا دي بتاعت غرامات

و محدش يقدر ع الحكومه

واللي مش عاجبه يخبط دماغه في الحيط

انا شخصيا عاجبني

أصل انا مواطن صالح وشريف

هههههههه

أحلى من الشرف مفيش

و دليل على كده اني لو اتوقعت عليا الغرامه دي هدفعلهم المية جنيه

جنيهات معدن

ههههههههههه

------------------------------

(2)

الستات بين الواقع والخيال

------

عارفين مشكلة الرجاله مع الستات ايه

انه بيعيش معاها في الخيال بعدين ينزل يدور عليها في الواقع

وبما اننا عارفين ان فرق شاسع بين الواقع والخيال

لذلك بتكون المشكله

يعني تيجي تسأله مواصفاتها ايه

يحطلك مواصفات لو موجوده في واحده ممكن تبقى وزيرة خارجية امريكا اصلا

الباشا عايزها مثقفه ومطلعه وذكيه وشخصيتها قويه

وقياديه ومهذبه ورائعه وخارقه و رائدة فضاء ولعيبة كوره

وطباخه مثاليه ودكتوره ومهندسه ومدرسه ومحاميه

ارحم اهلنا يا عم

ينزل المعلم يدور يقعد لحد 30 سنه مش لاقي

ساعتها الناس تشفق عليه ويقعدوا يدوروله على عروسه

واللي تقوله بت اختي حلوه

واللي يقوله بت اخويا ممتازه

ويا عيني يقعد يدور بس على واحده متدينه وغلبانه ومقبوله

بعد ما كان عايزها زي منى الحسيني وميرفت امين وابوتريكه وحسن شحاته

يا جدعاااان مفيش واحده كامله

لو هتدور على واحده كامله هتتعب ومش هتلاقي

بلاش الخيال خليكو في الواقع

بدل ما في الاخر تاخد واحده شبه براد الشاي

انا شخصيا حطيت وصف واحد للي عايزها محدش عارف يفسره

قالولي ايه مواصفاتها

قولتلهم عايزها تكون دماااااغ

مش عارف اعبر الا بالكلمه دي

اللي يعرفلها تفسير يقولي ويكسب فيا ثوااااب

بس اهم حاجه تكون دماغ دماغ مش اي كلام

----------------

(3)

ثانويه ازاي؟

--------

اهم مرحله تعليم في نظام التعليم المصري

سموها الثانويه

رغم ان كلمة ثانويه تدل على حاجه مش مهمه اوي

يقولك الموضوع ده ثانوي نبقى نشوفه بعدين

بصراحه المسأله دي لفتت نظري

الضجه الفظيعه وتقرير المصير

وكأن الي مش هيدخل طب وصيدله وهندسه هيدخل النار

كل ده وبيسموها ثانويه

المفروض يسموها المهمه او الحساسه

او اللي هتحدد مصيرك يا ولدي

حتى عشان العيال يهتموا شويه

المشكله انك لو جبت في سنه تانيه 98 في الميه

ممكن ماتدخلش طب

والله العظيم استعباط

عشان تبقى في الامان المفروش تجيب 99%

نظام تعليم ركيك وفاشل ومنيل بنيله

والله العظيم انا بشفق ع الولاد الصغيرين اللي لسه في ابتدائي

ربنا يستر

على ايامهم ممكن متلاقيش ثانويه اصلا

-------------

كفايه كده النهارده

متنسوش بس اي حد يلاقي واحده دماغ

يقولي على طول

ههههههههههههههههه

في امان الله

مصطفى ابوزيد - 27/7/2009

طلقات ذهبيه 6

أهلا بيكم دايما

إسمحولي في الأول أعتذر

أعتذر عن عدم ردي على تعليقاتكم في الموضوع اللي فات

بس ربنا يعلم مدى الإنشغال اللي أنا فيه

أنتظر دعواتكم دايما

اسبوعين بالظبط على مناقشة مشروع التخرج

أسبوعين بالظبط على زفاف المهندس احمد سعد

ومش محتاج أشرح تاني يعني ايه المهندس احمد سعد بالنسبه لمصطفى ابوزيد

وكمان 3 اسابيع بالظبط على زفاف اخويا خالد

عشان كده انا في حالة انشغال تام

ده غير قلق النتيجه و قرف المشروع

سامحوني ع الرغي ده

أهلا بيكم

في

طلقات ذهبية 6

-------------------------------------------

(1)

طولها زي عرضها

--

بعد رحله طويله في الحياه إمتدت لواحد وعشرين سنه

إكتشفت إكتشاف مهم جدا بالنسبه للدنيا دي

" طولها زي عرضها و أولها زي آخرها"

م الآخر يعني مش فارقه

ما تستاهلش

الناس بتحارب بعضها وبتكره بعضها على حاجه ملهاش قيمه

سيدنا نوح عاش 950 سنه سألوه عند موته

كيف رأيت الدنيا ؟ .. رد وقال

" رأيتها دار لها بابان دخلت من أحدهما وخرجت من الآخر "

في ناس بنعيش عمرها كله عشان الفلوس

أرد عليهم كالعاده بمثل واقولهم

" الكفن مفهوش جيوب"

وحدوووووووووووووووه

------------

(2)

محدود الدخل - مصدر مسئول - وكالات الأنباء

--------------

في كل البرامح والنشرات دايما تلاقي كلمات ملهاش توصيف

يقولك مثلا

" وأكد سيادته ان الأولويه في عمله من أجل محدود الدخل"

من يوم ما اتولدت ونفسي اعرف الكائن محدود الدخل ده شكله ايه

ملهوش توصيف .. طب هتعرفوه ازاي؟

طب ما انا محدود الدخل

لأن ابويا محددلي مصروفي

هع هع هع

وساعات يقولولك

" وأكد مصدر مسئول على أهمية ... "

مين طيب المصدر المسئول ده؟

ملوش اسم؟

منصب؟

طب ايه اللي يخلينا اصدقك؟

وكمان يقولك اعلنت وكالات الانباء

طب قولنا اسم وكاله واحده حتى لو وكالة البلح

و هكذا كلمات ولا ليها مصدر ولا توصيف

والكلام اللي بقوله ده أكده ليا مصدر مسئول

و نشر في وكالات الأنباء

------------------------

(3)

مشاريع التخرج " الفقر المزدوج"

ايوه والله فقر مزدوج

رغم كل المشرفين المملين اللي ميفهموش حاجه في البطيخ

ويقعدوا يعطلو الشغل

تلاقي الفقر بقى ان الشغل نفسه مش راضي يمشي

في كل المشاريع مش مشروعي انا

بس مشروعنا احنا فقر كبير

بنشتغل على تجربه من سنه 1985 يعني قبل ما اتولد بسنتين

تجربه كل الشركات اللي اشتركت في تصنيعها قفلت

وهي اصلا بايظه في الكليه من 7 سنين

و اللي شغال فيها ربعها

المفروض احنا بسحر الساحرين نشغلها تاني زي الأول

إحنا ما اعترضناش

جبنا المعدات والحاجات المطلوبه دون الدخول في تفاصيل

وشغل ليل نهار وعنينا طالعه

لكن الفقر و اللي وصلتله إن التجربه دي عامله زي الميت

الميت اللي بنحضر روحه

حاجه ميته من 25 سنه

عفاريتها طلعت علينا

كل ما نحل مشكله يطلع عشره

و مشاكل غريبه ما بتحصلش إلا نادرا

لدرجة اننا لقينا عنكبوت باني عش وعايش وسط الميه اللي في التانك

اخر عفاريتها امبارح

هنجرب البرنامج النهائي

دوس يا مصطفى ع الزرار

بوووووووووووووووم

أيوه فرقعت

بعد ما فوقت قالولي ان كان في قفله

طب جت منين يا ولاد؟ كل التوصيلات سليمه

قالولي أصل الطلمبه باااظت

عااااااااااااااااااااااااااااااااا

بااااااااظت

بس على مين هنصلحها برضه بعد ما خليفه إنتحل دور السباك

و أنا و أحمد نور عملنا الصبيان بتوعه

بس اسلام مش هنا

قولو ليه؟؟

علشان ابوه كان جاي من جيبوتي

وراح يستناه في المطار

أيوه والله

الراجل مهندس ومدير شركة مقاولات في جيبوتي الشقيقه

شوفتو الفقر

يعني الشخص الوحيد اللي أبوه بره مصر في المشروع

ساب الدنيا القارات الخمسه ببلادها وراح جيبوتي

أنا جبت آخري م المشروع بصراحه

انا آخر ما أزهق هأكهرب خليفه وأحمد نور وإسلام

و اسلم نفسي

.

وفي النهايه أحب أهدي العنكبوت اللي محتل التانك أغنية

.

" العنكبوت النونو خطفت قلبه عنكبوته "

.

تأليف و ألحان الموسيقار صرصار ابوشنب

.

سلااااااااااااااام

.

مصطفى أبوزيد - 28/6/2009

.

حصريا : طلقات ذهبيه 5

وسط ضغوط الدراسه المتواصله

ووسط الانباء المقلقه عن وباء انفلونزا الخنازير

ووسط حرارة الجو التي لا تطاق

كان يجب ان تكون هناك استراحه نلتقط فيها بعض الابتسامات

إنها

.
.
.
.

طلقات ذهبيه 5

فكونوا معنا
---------------------------
(1)
اللي يعرف ابويا يروح يقوله
-----------------------------------------------
حلو قوي المثل ده

بيقولو ناس كتير

الناس اللي بتعمل الغلط ومابيهمهاش

او الناس اللي متأكده ان مفيش حد هيعاقبها

طبعا مش لازم يقولها بلسانه

بس ممكن يقولها في نفسه

عندك مثلا دكتور ممكن يحذف حاجات ويجيبها ولا يهمه

ويقول في نفسه مين هيحاسبني

" اللي يعرف ابويا يروح يقوله "

واحد تاني ممكن يستعند واحد ويقول

اللي يعرف ابويا يروح يقوله

طبعا واضح ان عندنا أزمة أبهات في مصر لأن البلد كلها بقت ماشيه بدراعها

اللي عايز يسرق يسرق واللي عايز ينصب ينصب

ده حتى الحكومه ساعات بتعمل حاجات بمزاجها ولا بيهمها حد

إحم إحم

اوعو تفهموني غلط مش قصدي حكومتنا احنا -- انا قصدي الحكومات التانيه

و حتى ان كان قصدي

ولا يهمني

هأقولكم حاجه واحده

"اللي يعرف ابويا يروح يقوله"

-------------------------------------
(2)

متبوسنيش من فضلك
----------------------
بعد ما كنا قربنا ننسى موضوع انفلونزا الطيور

وقلنا الموضوع هدي

ربنا ابتلانا بحاجه جديده اسمها انفلونزا الخنازير

والمشكله انها خليط من 3 حاجات

الانفلونزا العاديه وانفلونزا الطيور وانفلونزا الخنازير

ما أصل هيا الحكايه ناقصه

وبيقولك علشان نعمل وقايه

اهم حاجه بلاش التقبيل

محدش يفهم غلط متودوناش في داهيه

قصدهم ع الناس اللي بتقابل بعض وهاتك يا بوس كنوع من الترحيب

لانه ممكن ينقل العدوى

وطبعا اللي المفروض يتقالهم الكلام ده البنات

الواحده تقابل صاحبتها لازم تديها اربع بوسات

و بالخصوص البنات اللي في الكليه

وقال وحشاها كأنها لسه جايه من موزمبيق امبارح

ما انتي شايفها كل يوم في وشك في الكليه

انا عن نفسي اي حد من اصحابي هييجي يبوسني لما يقابلني

هأديله بالقلم على وشه واقوله

"يا سافل .. انا اهلي صعايده ويقتلوني "

وهأرفع شعار

" متبوسنيش من فضلك .. أنا مش ناقص أهلك "

-----------------------------------
(3)

وهيبه طلعت مصيبه
-----------------------
"تحت الشجره يا وهيبه ياما اكلنا برتقان"

المشكله هنا مش في البرتقان ولا في الشجره

المشكله في وهيبه نفسها

احنا كنا مفكرين ان وهيبه بتحب البرتقان وخطيبها مثلا كان بياخده يوكلها برتقان

لكن الموضوع طلع كبير وانا قررت اشوه سمعة وهيبه

واقول ان في كلام بيقول

"فوق النخله يا وهيبه ياما أكلنا بلح "

" و تحت الكوبري ياوهيبه ياما صيدنا سمك "

من الجملتين اللي فاتوا نقدر نفهم ان وهيبه حاجه من اتنين

يا اما كانت صايعه وضايعه ومفيش حد يلمها

يا إما كانت همها على بطنها وقاعده تاكل في برتقان وبلح وسمك

وبكده اكون نجحت في تشويه صورة وهيبه عند الجماهير

بالمناسبه احب اهدي خليفه حبيبي إهداء وأقوله

"تحت القسم يا خليفه ياما اخدنا اصفار"

----------------------------------
(4)

دعوه للتفاؤل - أنا أحسن من إديسون
-----------

الدكاتره طول السنه قاعدين يشرحو في نظريات

نظرية فلان ونظرية علان

وساعات يشرحوا نظريات وميعرفوش مين صاحبها

نيوتن واينشتاين و محمود عجوه

بس احب اقول حاجه

بيقولو ان نيوتن كان غبي وهو في الفصل

وكمان مش عارف مين من العلماء كان بيسقط في الرياضيات

انا بقول يا جماعه العلماء القدام دول اي كلام

ده المشكله الاكبر انهم بيقولوا

إن إديسون اللي اخترع المصباح الكهربي

عمل ألف تجربه فاشله قبل ما ينجح في اختراعه

الله يخرب بيت الغباء

فشل ألف مره - هههههههه

أنا عن نفسي إحسن من إديسون

ما أعتقدش إني ممكن أغلط في مسأله ألف مره

مش بقولكم دعوه للتفاؤل

سؤال في السريع لبتوع هندسة اسيوط

س/ أذكر إسم الدكتور اللي مكن يحط سؤال يخليك تغلط فيه ألف مره ؟

----------------------

إنتهى الموضوع ولكن عقلي لا ينفذ من الطلقات

و في النهايه

أسألكم الدعاء لي بالشفاء

عسى الله ان يقبل دعوة احدكم

حياكم الله ودمتم سالمين


مصطفى أبوزيد - 30 أبريل 2009