عارفين .... ؟؟

عارفين ؟

طيب أنا هقولكم طالما  إنكم مش عارفين

الأخ اللي بيهز راسه و عامل نفسه عارف .. أحب اقوله انا شايفكـ و أنت مش عارف

و استنى عشان تعرف

بس السؤال اللي بيطرح نفسه .. أقولكم إيه ؟

اه إفتكرت

في البدايه بس عايز أقول شيء مهم جدا

في آخر بوست ليا كان في تعليق من أحد الزوار أمس إتهمني فيه إتهام شنيع

ببساطه كلامه كان بيقولي إني كافر ومنافق و مرتد و كل حاجه وحشه في الدنيا

طبعا أنا كنت مصدوم و انا بقرا التعليق و مش عارف هو كتبه بناءا على إيه

و كنت ناوي أعمل موضوع أرد فيه على كلامه و أدافع عن نفسي

لكن عملا بنصيحة أحد المقربين أنا هفترض حسن النيه

و اقول ربما هو كان عايز يكتب التعليق في مدونه تانيه

وكان فاتح مدونتي معاها و غلط وكتبه عندي

أما بقى يا ابوالشباب لو كنت تقصدني أنا فعلا

 فأرجوك أكتب التعليق تاني هنا و أنا ساعتها هرد عليك

بس خليك شجاع و اكتب اسمك برضه

تمام كده ؟

-------------------------

نرجع لموضوعنا

 أنا كنت هقولكم إيه ؟

مش عارف ..

عارفين الفكره بتاعت آلة الزمن

الواحد يبقى معاه مكنه يحدد الزمن اللي عايز يروحه ويدوس ع الزرار

يا سلام ع الدلع

[ بيسمع افلام أجنبي كتير ]

تخيلو لو كلنا عندنا فرصه واحده نستخدم فيها الآله دي لمدة يوم

هتختاروا ايه

اولا هتختار تروح ليوم في الماضي و لا ليوم في المستقبل

و اي يوم بالتحديد في الحالتين

أنا شخصيا هروح ليوم في الماضي

 لأن مضمنش هلاقي ايه في المستقبل إنما الماضي أنا عارفه

أما تحديدا لأي لحظه فأنا هختار يوم من ايام الثانويه العامه

معقول .. ؟

أيوه دي كانت أحسن ايام

لسبب .. راحة البال .. في أيامها عرفت فعلا يعني ايه راخة بال

يعني لما تنام و في دماغك صفر هموم

هي دي اللحظه اللي انا محتاجها

أنتو بقى هتختاروا إيه

ياريت نشوف آرائكم

---------------------

إيه رأيكم نختم الموضوع على كده لو كنتو زهقانين

خلاص .. هنكمل و اللي زهقان يمشي 

عارفين ؟

اه دي غير الاولانيه

انا بقالي اسبوعين مكتبتش بيت شعر

شايف نظرات الشماته في عنيكم

شايفك يا اللي بتضحك شايفك

بس عادي .. نزار قباني قعد 3 سنين مكتبش شعر 

بعد ابنه الكبير ما مات .. عارفين بقى رجع يكتب إمتى

لما شاف مراته بلقيس لأول مره قبل ما يتجوزها

أنا هرجع اكتب امتى بقى .., مش عارف

يمكن لما اشوف بلقيس بتاعتي

( وش مطلع لسانه )

أنا شايف واحد فرحان ان مفيش قصايد جديده

أحب أصدمه و تقوله لا متخفش انا عندي مخزون لم ينشر بعد ..

من البوست الجاي هرجع اعذبك تاني

_-------------------------------

طالما إن العمليه قلبت قعدة مصاطب .. أحب اسلم على الباشمهندس أحمد سعد أخويا الكبير و صديقي العزيز

اللي بيحضر الدكتوراه في روسيا .. و اقوله انت وحشتني بشكل لا يطاق

ربنا ييسر أمورك و يرزقك الذريه الصالحه .. وينشر لك الخير أينما كنت

-----------------------------------------------------------

تخيلو في البداية البوست نسيت اسلم عليكم

إزيكم كلكم

عارفين ؟

نفس المخلوق - أول ديسمبر 2009

إضغط هنا لإضافة تعليق

فتافيت كلام (2)

بسم الله

يبدو أنني أصبحت ثرثارا هذه الإيام

فهذا الموضوع الثاني في اربعة أيام

و يستمر الكلام على شكل فتافيت

ولكن اسمحو لي ان تكون فتفوتة عاميه فقد إشتقت الى العاميه

__________

فتفوته ( 2 )

في الفتفوته اللي فاتت اختلفنا اللي بنى مصر كان في الأصل إيه

أنا رأيي إنه كان مقاول بس معظم الناس شايفه انه حرامي

وعشان محدش يزعل هنفترض أنه كان مقاول حرامي وده شيء طبيعي طبعا

بس بعد ما مصر ما اتبنت بقي ليها تاريخ كبير

و بصتي فاضي جدا قررت كمان اني احط وجهة نظري في التاريخ

يكفيكم شر الواحد لما يفضى - يقعد يفتي في كل حاجه

الكام سنه اللي فاتت المظاهرات انتشرت في مصر

ع الفاضيه والمليانه

كل يوم والتاني مظاهره

و تاعبين البهوات رجالة الامن والامن المركزي و المطافي عشان مظاهرات

بس انا قررت القي نظره تاريخيه ع المظاهرات بصفتي راجل ضليع ومعرفش حاجه في التاريخ

انا فاكر ان اول مظاهره درستها و أنا طالب هي بتاعت احمد بيه عرابي

زيبعضوا انا بقول احمد بيه على اعتبار انه كان ظابط واحنا عودونا في بلدنا اننا نقول للظابط يا بيه

المهم احمد بيه عرابي ركب الحصان بتاعه ولم الرجاله حواليه ووقفه وقفه جااامده

وقل البوقين بتوعه و حارب وكالعاده اضحك علينا واتغلبنا

و بكده كانت اول مظاهره ملهاش لازمه

بس مش مهم خلونا نكمل يمكن نلاقي حاجه مفيده

بعدين معرفش ايه اللي حصل في التاريخ ايام ما كنا في المدارس

فجأه كده قفزو من عرابي لسعد باشا

سعد باشا زغلول

اموت واعرف ايه اللي قوم المظاهرات ساعتها

بس انا فاكر انه اتقبض عليه واتنفى والناس كانوا ولاد بلد

عملوا مظاهرات وصفيه لمت النسوان والموضوع كبر وبقي ثوره

يمكن كان ليها فايده ان سعد اطلقوا سراحه

لكن اي فايده سياسيه حقيقيه من اللي كان عايزها سعد

للأسف لأ .. وفشلت تاني مظاهره

مش عايز يجيلكو احباط .. ده لسه الاحباط جاي قدام

و يظهر اني كنت بغيب كتير وانا طالب عشان مش فاكر حاجه تانيه

فاكر طشاش حاجات عن ثورة 1952 وبعدها على طول حرب 73

في التاريخ ما اخدناش النكسه

المهم فجأه كده بقى بعد المظاهرات بتاعت السادات ايام اللحمه ما غليت

و الموضوع هدي شويه والمظاهرات قلت

بس مع دخول الالفيه الجديده رجعت تاني بس بكثااااااااافه

والشوارع تتقفل والناس تتفتش

الداخليه بس تاخد خبر ان في مظاهره والدنيا تتقلب

انا بقى لأن قلبي ع الداخليه ومش عايزهم يتعبوا

وقلبي ع الناس اللي بتعمل مظاهرات ومش عايزهم يزعلو

خدو الحل التاريخي ده

الناس اللي عايزه تعمل مظاهرات تعملها في الليل بعد الساعه واحده

و الموضوع فيه مميزات

الشوارع هتبقى هاديه شويه يعني هتمشوا براحتكم في الشوارع

وصوتكم هيبقى اعلى

غير كده ان الداخليه هتكون نايمه يعني زيط براحتك يا حج

و احب اطمن الداخليه برضه سيبوهم يعملو مظاهرات في الليل

و برضه يا داخليه ده خير ليكم

الناس هتبقى نايمه يعني محدش هيعرف هما بيقولوا ايه

و ابقى تعالى قابلني لو واحد مصري نايم وصحي عشان مظاهره

صدقني يا سعادة البيه الظابط الموضوع في مصلحتكم

هتصحى الصبح تلاقي المظاهره خلصت و كأن مفيش حاجه حصلت

شوفتو بقى انا قلبي ازاي عالشعب والداخليه

وده يحقق العباره التاريخيه

" مصطفى ابوزيد في خدمة الشعب والشرطه "

و

" توته توته خلصت الفتفوته "

^

مصطفى ابوزيد - الاثنين 19 اكتوبر 2009

----------------------------------------

ملحوظه : الموضوع في الاصل ساخر لذلك ربما توجد بعض المغالطات التاريخيه

______

.

.

.

انا وابن بنتي - الله يرحمني - - فانتازيا

هلا وغــلا

اهلا بيكم

طبعا لسه فاكرين قواعد الفانتازيا

اهم قاعده هي لاقواعد

وحدود رقعة الخيال : لاحدود

شاطرين

^

^

اسكتوا مش انا اتجوزت

وخلفت بنت كمان

لأ واللي أكتر من كده اني عشت لحد ما شوفت الواد ابنها

الواد المفعوص قعد يزن على وداني وقاللي حكيني يا جدي عن ايامك

قلتله يا بني انا هفتكر ايه ولا ايه

انت إسأل ع اللي في بالك وانا اجاوبك

والواد ما صدق

خلونا نشوف

-------------

مهند : يا جدي انت فاكر يوم ما اتولدت؟

أنا ( بذهول ) : الأسئله الغبيه بدأت - هافتكره ازاي يابني انا كنت لسه مولود

مهند ( بسخريه ) : يعني حتى لو كنت فاكر اكيد الزمن هينسيك ده انت داخل في السبعين يا جدو

أنا ( بنرفزه ) : خلاص يا بن اللمض عرفت اني عندي 70 سنه

مهند ( بإهتمام) : انت عاصرت كام رئيس يا جدي؟

أنا ( باستسلام ) : هو فيه غيره يا بني هو واحد ومشتقاته

واقعد ساكت عشان الحيطان لها ودان

مهند : بس انت كنت مدون يا جدي ليه ما اعترضتش

أنا : لو اعترضت يا مهند مكنتش هالحق اتجوز ستك وكنت انت مش هتبقى مهند

واحتمال انا كنت ابقى نور وبعدين لو انت راجل روح اعترض كده

مهند ( بتراجع ) : لا ياعم انا شاب وعايز اضمن مستقبلي

بس قولي صحيح انت اتجوزت ستي ازاي

أنا ( بفزع ) : طب ليه السيره دي ما احنا كنا كويسين

هنعمل ايه في النصيب يا بني مراية الحب عميه

مهند (باستغراب ) : بس ستي كانت بتقول انك كنت بتكتب فيها شعر رومانسي

أنا ( معترضا ) : والله العظيم كدابه انا كنت بأكتبلها قبل ما اعرفها

ومن يوم اتجوزنا اعتزلت الشعر الرومانسي

بقيت بأكتب أغاني وطنيه

بس سيبك انت لو لفيت الدنيا مكنتش هلاقي زيها

مهند : كانت بتعرف تطبخ وايه احسن اكله كنت بتحبها من ايدها ؟

أنا ( بتنهد ) : زمان يا بني كان في طائر اسمه الفراخ

وكان في حاجات شبه حمام وبط كنت بموت في الطيور

مهند ( متسائل ) : وتطلع ايه الطيور دي ؟

أنا ( بحزن ) : ده حاجه كانت موجوده من خمسين سنه جاتلها انفلونزا انقرضت

مهند : اه افتكرت مدرس التاريخ قالنا عليها

أنا ( مستدركا ) بمناسبة الدراسه عايزك تشد حيلك انا كنت متفوق جدا

أنا فاكر اني جبت امتياز وانا في الكليه

مهند ( مستوضحا ) : ازاي دي تيته قالتلي انك كنت بتنجح بالعافيه

أنا ( بغضب ) : يا بني في حد يصدق كلام الستات

أنا ( محدثا نفسي ) : يا خوفي تكون سته فرجته على شهادة تخرجي .. ربنا يستر

مهند :احكيلي عن حياتك مع جدتي كانت رومانسيه ؟؟

مهند ( بفزع ): جدي ؟ جدي؟

صوت احد المكروفونات ينبعث من بعيد

" وستشيع الجنازه من مسجد ...... ولا عزاء للسيدات "

مهند يقف في الجنازه وامه تسأله ايه اللي حصل وانت بتكلمه

مهند : جبتله سيرة جدتي اكتر من مره

أمه : اخص عليك يا مهند

الله يرحمني

يعني كان لازم يا مهند السيره دي

عااااااااااااااااااااااا

---------------------------------------

و لما كانت الفانتازيا عالم مفتوح الجوانب والخيال فيه لا يخضع لمقاييس

فتأكدوا ان موتي ليس نهايه

فربما اعود في فانتازيا جديده وانا في الاربعين او الستين

او حتى التاسعه

و ربما حتى قبل ان أصل الى الدنيا

س / ما الدروس المستفاده من هذه الفانتازيا ؟؟

-----------

دمتم بكل ود

تقبلو تحياتي المتواصله

مصطفى أبوزيد - 2أغسطس 2009

القواعد النسائيه الكلاسيكيه

كنت ولازلت اعتقد ان علاقة الرجل بالمرأه هي علاقة شد وجذب

و لا تخفى وجود بعض بذور العداوة بينهما

حتى التاريخ نفسه لم يذكر لنا انتصارا صريحا لأي منهما على الآخر

ولكن جولة له وأخرى لها

ولكن صدقوني ربما تكون المرأه تملك بعض القواعد العدوانيه الدفاعيه

قبل وبعد ارتباطها بالرجل

فتجد مثلا القاعده النسائيه الكلاسيكيه التي تنشأ عليها المرأه

" يا مأمنا للرجال يا مأمنا للميه في الغربال "

هي قاعده تهدم كل بذور الثقه بينهم

فهي ترى اخلاصه كجرعة ماء تختفي سريعا ان القيت في وعاء مليء بالثقوب

و يجد الرجل نفسه متهما بإتهامات شنيعه

و يقف ليدافع عن نفسه ضد إتهامات نسبت إليه

بناءا على هذه القاعده الكلاسيكيه المتهالكه

ثم ان وافقت على رجل بعينه وكانت شريكته في الحياه

لا تزال بذور الشك تلعب دورها

فتبدا القواعد الدفاعيه في الظهور

من نوع " جوزك على ما تعوديه"

فتحاول ان تفرض نظاما خاصا للزوج على هواها

و إذا شاء الله للزوج ان يكون ثريا وصاحب منصب وجاه

تظهر وسيلة دفاع تبدو وكأنها مثاليه للتحقيق التوازن

هي قاعدة" يغلبك بالمال إغلبيه بالعيال"

فتتجاهل المرأه وفقا لهذه القاعده كل نداءات تنظيم الاسره

وتظل تنجب حتى تحقق رقما قياسيا

ربما تكون نتيجته في النهايه هي ان يقتلها زوجها هي وابنائها العشرين

و يمكنك ان تتأكد بنفسك إذا إستعنت بأحد رجال المخابرات

ليضع لك جهاز تصنت صغير في احدى الجلسات النسائيه

لتسمع بنفسك هذه وهي تشكو حالها

وتبتهل الى الله ان يدهس احد اتوبيسات النقل العام زوجها

و اخرى تتمنى افلاسه خوفا من ان يخونها بماله

----

و على النقيض فإننا نجد بيوتا و عائلات ناجحه

و لكن انظر الى الفارق بين هذه الزوجه و الأخريات التي تكلمنا عنهن

لتجد فارقا و كأن هذه الزوجه الناجحه هبطت لتوها من كوكب الزهره

صدقوني المرأه هي المحرك الأساسي

لنجاح أو فشل الرجال

و قديما قالو " وراء كل رجل عظيم إمرأة عظيمه"

و لكنهم عادوا ليقولوا " وإن لم تكن وراءه كان أعظم "

ربما و ربما العكس

--------

دمتم بكل خير

و تقبلوا تحياتي دائما

مصطفى أبوزيد - 19/7/2009

عاجل: رسميا مصطفى ابوزيد يحصل على درجة البكالريوس

عاجل

رسميا مصطفى ابوزيد يحصل على درجة البكالريوس

ذكرت مصادر مطلعه صباح اليوم أن مصطفى أبوزيد

قد حصل بشكل شبه رسمي على درجة البكالريوس

وقال المصدر نفسه أن مصطفى قد حصل على تقدير عام مقبول نافيا كل التقارير

التي تحدثت عن امكانية حصوله على أعلى من ذلك

وكان مصطفى قد أعلن في أكثر من مناسبه

عن عدم إهتمامه بالتقدير بقدر إهتمامه بالنجاح نفسه

--------

هذه الأنباء تأتيكم على الهواء مباشرة

-----------

و في سياق آخر قال مراسلونا في اسيوط

أن الإعلان الرسمي عن النتيجة النهائيه لم يتم بعد

إلا أن هذه النتائج قد صرح بها أحد المسئولين عن الكنترول

--------
و في حديث إنفردت به كالعاده وكالة

تي إل إكس الإخباريه السنغاليه الناطقه بالفرنسيه

مع مصطفى أبوزيد أكد مصطفى هذه التقارير

وقال انه يتبقى فقط الإعلان الرسمي المنتظر خلال يومين.

وقال مصطفى إنه حصل على تقدير عام مقبول

وهو أمر متوقع بالنظر إلى مسيرته على مدار السنوات الخمس الماضيه

و بالسؤال عن مشروع التخرج قال مصطفى للوكاله

أنه حصل على تقدير إمتياز في مشروع التخرج

مكللا بهذا التقدير تعب و مجهود إمتد على مدار عام كامل

و أهدى مصطفى هذا النجاح إلى الجماهير العريضه

متمنيا أن يهاديه الحميع بهدايا قيمه

يذكر أن مصطفى من مواليد ديسمبر 1987

بمحافظه اسيوط - ديروط

إلتحق بكلية الهندسه في سبتمبر 2004 وأمضى بها خمس سنوات

ليحصل أخيرا على درجة البكالريوس في الهندسه الميكانيكيه

كانت هذه مشاهدينا أهم الأنباء وسنوافيكم بمزيد من التفاصيل

عند الاعلان الرسمي عن النتائج

----------------

الحمد لله رب العالمين

مصطفى ابوزيد - 14/7/2009

آلووووووووووو .. أوباما

آلو .. أوباما

( فانتازيا للتعليق على خطاب أوباما )

عالم الفانتازيا هو عالم الخيال حيث كل شيء يمكن ان يحدث

اهم قواعده هي : لا قواعد

و حدود رقعة الخيال :لا حدود

فضلت مستنيه يتصل أو يعدي
ولا إتصل ولا عدى
إشتريت كارت بليه من ابو 100 جنيه
واستنيت في الليل علشان العرض بتاعت الاتصالات الدوليه
و دار هذا الحوار - في عالم الفاتازيا

-------

أنا : آلو

صوت خشن : آلو مين يا فندم

أنا : ممكن أكلم أوباما

نفس الصوت يتساءل باستهتار : ومين جنابك؟

أنا ( بغضب ) : وإنت مالك إنت ؟ روح قوله واحد عايزك وخلاص

خمس دقايق مركون ع الخط

أوباما ( بتساؤل) : أيوه مين معايا ؟

أنا : ياراجل عيب عليك مش عارف صوتي؟

أوباما : ميييين؟ مصطفى ابوزيد .. إزيك ياباشمهندس

أنا : إزيك ياباشا

أوباما : زيبعضوا يادرش الواد اللي رد جديد تلاقيه ميعرفش الرقم

أنا : ولا يهمك .. بس أنا زعلان منك

اوباما : ليه بس يا درش؟

أنا : ياراجل يعني تقعد في مصر 8 ساعات ولا تعدي ولا تتصل

اوباما ( معتذرا ) : والله يادرش الوقت سرقنا كنت ناوي بعد الاهرامات اجي اقعد معاك شويه

بس زاهي حواس عطلني وجع دماغي

وقعد يلفلف بيا لما هلكت بس متخفش ليك زياره مخصوص

بس قولي ايه رأيك في الخطاب امبارح

أنا : لااااا ... طول عمرك يا بومه وانت معلم في الكلام واحسن واحد يثبت اللي قدامه

أوباما ( بمرح ) : لا والله يا درش مكنتش بأثبتكم قولي رايك بجد

أنا : فاكر أم كلثوم اللي كلمتك عنها؟

أوباما ( بإستغراب ) : أيوه الست .. ودي علاقتها ايه بالخطاب

أنا : كان لها اغنيه بتقول

"ما تصبرنيش بوعود وكلام معسول وعهود"

"إنما للصبر حدود يا حبيبي"

أوباما : مش فاهم برضه .. انت عارف بتكلم عربي بالعافيه

أنا ( بإستهزاء) : أنت هتستهبل يا اوباما يا شقيقي انت فاهم بس بتستعبط

ع العموم هاشرحلك

يعني انت عارف ان الشعوب العربيه كلها مخنوقه من ام امريكا من ايام الحمار اللي قبلك

تقوم انت جاي تزور جامع السلطان حسن

وتكلمنا كلام جميل عن الاسلام وتستشهد بآيات من القران

وتقول إحنا حبايب واصحاب وقرايب

و ممكن تاني يوم الاقيك بتغني لإسرائيل أغنية عمرو دياب

" متخافيش انا مش ناسيكي"

وتقول مصلحة اسرائيل اهم حاجه

أبوما ( يدافع عن نفسه ) : لا لا لا يا مصطفى ياراجل ما تظلمنيش

أنا ( مقاطعه ) : استنى بس يا نجم هأكمللك .. يعني ياراجل

قعدت تتكلم عن ايران وتقول عادي تستخدم النووي السلمي

بس لازم تخضع وتلتزم بإتفاقية منع الانتشار

ومش عارف ايه وامن المنطقه

طب مجبتش سيرة النووي اللي عند اسرائيل حبيبة قلبك ليه؟؟

انا معاك ان ايران لازم تحترم نفسها بس برضه اسراءيل لازم تتلم برضه

أوباما ( بهدوءه المعهود ) : بس خد بالك برضه يا درش اني ضغطت على اسرائيل

وقلت انهم يترجموا الاقوال لأفعال

واحده واحده عليا

أنا : طب بص الكارت هيخلص .. أنا هأقفل وإتصل إنت

أوباما : أوك

ترررررررررررررررررررررن

أنا : أيوه يا اوباما

صوت غليظ : أوباما مين يامجنون .. مش دي عيادة الدكتور حازم؟

أنا ( بعصبيه ) : حازم مين ياحمار ؟ النمره غلط

طرخخخخخخخخخخ - صوت قفل السماعه

ترررررررررررررررررن

أنا : أيوه يا اوباما

أوباما : ايوه يا حبي .. كمل يا معلم

أنا : بص انا مش عايز اطول عليك عشان عارف انهم هيحاسبوك ع الاتصالات دي

مش زي عندنا

بص يابومه كلامك كان حلو وميه ميه ومحدش يقدر يقول تلت التلاته كام

والشعب المصري كان مبسوط بس في حاجه

الناس مستنيه تنفيذ لكلامك

يعني لو عدت فتره كبيره وا معملتش حاجه

هنضطر نكمل أغنيه ام كلثوم

"إنما للصبر حدود"

متخفش مش هنعمل حاجه بس هنكرهك ولا كأنك قولت حاجه

أوباما ( بلهجة معاتبه ): يا أبوزيد انت عارفني بتاع كلام يا جدع ؟

ده انا المحافظين كلو وشي هنا وبيقولو كلام وحش في حقي عشان خاطركم

أنا : يا حبيبي أنا اعرفك الناس متعرفكش بص احنا هنا في مصر لنا مبدا جميل جدا

أوباما: قول ياعم المبادئ

أنا: مبدأ الميه تكدب الغطاس

وكمان في حاجه طالعه جديد إسمها

الميه تغرق القرطاس

أوباما : لا ياعم ان شاء الله خير وهتتستر بس قول يارب

أنا : في حاجه تاني .. بلاش وحياة ابوك تدخل في حياتنا الداخليه

يعني متجيش تقول مصر يجب ان تكون اكثر ديموقراطيه

والحكام ديكتاتوريين والكلام اللي يخنق ده

بلدنا وعجبانا وزي العسل على قلبنا ومشكلنا هنحلها بمعرفتنا

ملكش دعوه انت بالموضوع ده

أوباما : لا ياعم انا مليش دعوه طالما انتوا عاجبكم حالكم انا مالي

أنا ( معاتبا ) : بعدين تعالا هنا

عزمتوا طوب الارض ع الخطاب

إخوان وقوميين ويساريين وكل الملل

وانا تنفضولي ده انت كان ناقص تدعو اسامه بن لادن

ده مكنش عيش وملح يا بومه يا حبي

أوباما : والله يا ابوزيد مشفتش اللي بعت الدعوات

انت عارف الطقم الجديد بتاع البيت الابيض ميعرفش اصحابي قوي

وبعدين انا كنت مفكر ان الجماعه هيعزموك في مصر

أنا ( بسخريه ) :ههههه لا ياعم هنا بيعزموا ولاد الناس بس

أوباما : بس بلدكم طلعت نضيفه قوي دي الشوارع بتلمع

أنا : ياعم انت اتثبتت ده كل ده حصل قبل ما تيجي بيومين

رصفو الطرق ولمو الزباله وشالو الاكشاك المخالفه

وقبضوا ع اللي عليهم احكام

طب لما هما عليهم احكام سايبينهم ليه؟؟

أسكت يا راجل بلاش حرقة دم

اوباما ( يقهقه بصوت عالي) : يخرب بيتك يا درش ... صحيح البلد كانت فاضيه قوي ليه ؟

أنا ( بسخريه ) : لا ما تخدش في بالك اصل القاهره كلها

نسيت تظبط المنبهات فراحت علينا نومه

أوباما : هههههههههههههههههههههه

أنا : ع العموم يا بومه انت نورت مصر وعايزينك تكرر الزياره

وبالمناسبه فرح اخويا خالد في نص سبعه

ابقى هات المدام والعيال وتعالى

أوباما : الف مبروك وعقبالك .. إلا قولي صحيح ؟؟

رنيت عليك اول امبارح لقيت موبايلك مغلق

أنا : اه صح ده انا غيرت الرقم جبت اتصالات هأرن عليك دلوقتي ابقى سجلني

أوباما : ماشي ياشقيقي عايز حاجه؟

أنا: الف شكر ابقى سلم ع المدام

أوباما : يوصل يا درش سلام يا معلم

أنا : سلام يا باشا

----

قفلت الخط وشغلت الراديو على إذاعه أميركا إن أرابيك

المذيعه ( بصوت أنثوي ناعم ): تبادل الرئيس اوباما إتصالا هاتفيا مع المهندس مصطفى ابوزيد

ناقشا فيه خطاب اوباما للعالم الإسلامي

أنا ( بضيق ) : هيا البلد دي مش بيتخبى فيها حاجه

مصطفى أبوزيد - 5/6/2009

عوده مفاجئه

السلام عليكم

كعادتي أتنصل دائما من قراراتي

وها أنا أعود لاكتب من جديد قبل موعد عودتي الذي أعلنته في الموضوع السابق

ربما لأني إشتقت كثيرا للكتابه

وإشتقت أكثر إليكم

و في الحقيقه أنا لم آت اليوم لأتحدث عن موضوع بعينه

ولكني جئت لاتحدث معكم فقط

و أنا أملك الرغبه الشديده لكي أكتب بالفصحى فسامحوني

-----

عندما توقفت عن الكتابه كنت أعتقد أني الوحيد الذي إتخذ هذا القرار

ورغم توقفي بالفعل إلا أني كنت أتابع المدونات الأخرى بكل خبث و مداومه

وكنت أتوقف عند المواضيع التي تلامس خلايا عقلي وتجعلني أفكر

ولكني لاحظت أن الكثيرين توقفوا مؤقتا عن الكتابه

والكثيرون قد أصابتهم مشاعر يأس وقلق

أجبرتهم على أخذ راحه من مدوناتهم

أنصحهم جميعا بأن من يعشق الكتابه لا ينساها

تغلبو على مشاعركم السلبيه بالعوده للكتابه

----------

إن حدثتكم عن مشاعري الآن لن استطيع أن اصفها

إنها بحق مشاعر قد إختلطت

اشعر أني بعد 14 يوما سأنهي تعليمي الجامعي

مشاعر السعاده الغامره

اشعر بنشوه شديده و إثاره وترقب

و احيانا ينتابني القلق من المستقبل

سأواجه بعد التخرج تحديا جديدا وصعبا

حتى الان لم استقر على خطه لمواجهته

أحتاج لبعض الراحه بعد التخرج

و لكن هيهات هيهات

اي راحه في هذا الزمن

***

وتنتابني أيضا مشاعر السعاده الغامره

والسبب قرب عرس أخي خالد وفقه الله

وهو أخي الثاني بعد حسام - أبومنه

لابد أن تغمرك السعاده و أنت تشاهد نجاح وسعادة من تحبهم

انتظر يوم عرسه لأضمه إلى صدري وادعو له الله

أن يبارك فيه وعروسه و أن يجمع بينهما على خير

------

عندما بدأت في التدوين في مطلع الفرقه الثانيه ميكانيكا

لم أكن أتوقع كل هذا النجاح

زياراتكم الدائمه وتفاعلكم وتعليقاتكم

أعطتني شعورا بالنجاح التدويني

وفي الفتره الحاليه بدأ عقلي يسترجع حسه الشعري

وكتبت شعرا بالعامية والفصحى

سأنشره هنا قريبا

هذا ايضا يجعلني سعيدا

-----

بالطبع ليست السعاده هي الشعور المطلق الذي يسيطر عليا هذه الايام

فهناك الكثير من الصعاب والإنكسارات والآلام والأحزان

اسأل الله أن يفرج همي وهمكم

-------

اتمنى ألا أنهي هذا الحديث معكم

ولكن أعدكم سنلتقي قريبا

دمتم بكل خير

مصطفى ابوزيد - 25 مايو 2009

حامدا الله تعالى ومصليا على نبيا صلى الله عليه وسلم

وداعا

سأغيب عنكم

في مباريات كرة القدم الفريق الذي يخسر تركيزه

في الربع ساعه الأخيره من المباراه غالبا يكون هو الخاسر

حتى وان كان متقدم طول المباراه

وربما ترى فريقا يظل المباراه كامله متخبط إلى ان يجمع كل تركيزه

فتراه يخطف فوزا حاسما في اللحظات الأخيره

والحقيقه الأمر لا يختلف كثيرا ما بين كرة القدم وسباق الدراسه الطويل الممل

هذا السباق الذي يمتد لأربعة أشهر في كل فصل دراسي

ينهار فيه من ينهار ويصمد فيه من يصمد

والرابح في النهايه هو الذي استطاع ان يحافظ على تركيزه في الربع الاخير من الفصل الدراسي

أو بمعنى أدق في الشهر الأخير

فما الفائده لو ظللت متميزا لثلاثة أشهر ثم تنهار أعصابك وعقلك في أهم مرحله

وقديما قالوا - العبره بالخواتيم

ولأن هذا العام يمثل حالة خاصه في مسيرتي الدراسيه

أنه يمثل مرحلة النهايه

نهاية ملحمه طويله

ولأني أريد أن أنهي هذه المباراة في وقتها الأصلي

و لا نية عندي لخوض أي أشواط إضافيه

فإني أحتاج لكل ذرة تركيز في هذه المرحله

تبقت عشرون يوما لا أكثر

والرابح في هذا السباق يحتاج الى مثلث الخبره

أضلاعه هي الثقه العاليه - وقوة الشخصيه - والقوه الذهنيه

وأنا أشعر أني أملك تلك الثقه وأحمل هذه الشخصيه

ولكن القوه الذهنيه الكافيه ما زالت غائبه

لذلك أسمحوا لي أن أغيب عنكم

لأستجمع عقلي وأحصره نحو هدف واحد

أجعلوني أنهي هذا السباق الطويل الملل لصالحي

أنهيه في وقته الأصلي فهو لا يستحق أكثر من ذلك

و أنتم أيضا إجمعوا كل تركيزكم

وانهوا السباق لصالحكم

و سنفرح سويا في هذا المكان

أحتاج لدعواتكم الطيبه

دمتم بخير - وجزاكم الله خيرا

-----------

على الهامش

------------------------------------------------

يقول الشاعر

ترانا في رياض العلم حينا .. وحينا في الرياض على التلالِ

ونمشي فوق ظهر الأرض هونا .. وهمتنا تفوق ذرا الجبالِ

--

وداعا يا أحبتنا وداعا .. وداعا والقلوب على إتصالِ

سأذكركم وأغمض جفن عيني .. وقد أبدو كأني لا أبالي

--

وفي قلبي من الأحزان نار .. يزيد ضرامها طول الليالي

يطول الليل في زمني كأني .. خلقت لأقتفي أثر الهلالِ

--

وداعا يا رفاقي وسامحوني .. وداعا والقلوب على إتصالِ

وداعا وأغفروا ما كان مني .. وداعا قد دنا زمن إرتحالِ

--------------

أستودعكم الله الذي لا تضيع ودائعه

مصطفى أبوزيد - 8 مايو 2009

مصطفى يتخذ قرارا مفاجئا بالتوقف عن الكتابه

عاجل

مصطفى يتخذ قرارا مفاجئا بالتوقف عن الكتابه

_________________________________

للاسف الاخبار القادمه صحيحه حتى وان كانت في شكل كوميدي نسبيا

ذكرت مصادر صحفيه وإخباريه أن مصطفى أبوزيد قد إتخذ قرارا بالتوقف عن الكتابه لأجل غير مسمى
وقال مراسلنا في أسيوط أن القرار قد أتخذ بشكل مفاجئ دون أسباب واضحه
وأنه فشل في التحدث الى مصطفى الذي رفض التحدث مع الإعلام

-----------------------

وفي حديث مطول وحصري لشبكة تي إل إكس الإخباريه السنغاليه الناطقه بالفرنسيه

تحدث مصطفى عبر الهاتف من أسيوط حول هذا القرار

وقال مصطفى أنه إتخذ قراره بعد شعور بالإحباط تمكن منه في الأيام الأخيره

وقال أنه عندما يتمكن منك هذا الشعور تفقد الرغبه في فعل أشياء هي من أساسيات حياتك

و أنه حتى توقف عن القراءة في نفس الوقت

وفي رده على الأسباب التي دفعته لهذا الإحباط

قال مصطفى أن أمورا كثيره قد إستجدت في الأيام الأخيره

جعلته يرى كثير من الأشياء بنظارة سوداء

ونفى مصطفى أن تكون هناك أي خلافات بينه وبين أصدقائه

غير أن الفشل في إتخاذ خطوة مهمه في حياته وضعته تحت طائلة الإحباط

و في سؤال حول نتائج محاولته للإرتباط التي تحدث عنها في إجاباته على أسئلة الجماهير

التي نشرت في مطلع الأسبوع الماضي

قال مصطفى أن الأمور لم تسير على ما يرام وانتهى الامر دون أي نتيجه إيجابيه

مؤكدا أنه بهذا عاد من جديد إلى نقطة الصفر في هذه المسأله

إلا أنه نفى أن يكون هذا السبب الوحيد الذي سبب له إحباطا وإن كان هذا هو السبب الأكبر

ورفض مصطفى تحديد سقف زمني لعودته للكتابه

ولكنه قال ان هذه الحاله ربما تتهي في خلال ايام وربما تمتد لأسابيع

و كان مصطفى قد تحدث في وقت سابق في حديث حصري مع الجماهير عن سعيه للإرتباط

إلا أن محاولاته قد انتهت الى غير نتيجه على حد قوله
--
يذكر ان الشهر الماضي كان من أكثر الاوقات التي نشر فيها مصطفى كتاباته

و جذبت مدونته عدد كبير من الزوار إقترب من الألف
--
كانت هذه أخبارنا العاجله – شكرا للمتابعه

________________________________________________-

على الهامش
----------------------------

و رجعت تاني يا قلبي خالي و وحيد

بعد ما فكرت إنك هتعيش من جديد

وده ذنبك انت؟ ولا ذنبي؟ ولا ذنب مين؟

ليه انكتب عليك ما تكونش مره سعيد

ليه لما تنوي الخير الناس بتجري بعيد

ليه لما تدق بصدق الوحده عليك تزيد

ليه ؟؟؟؟؟؟

-----------
مصطفى أبوزيد – 13/3/2009

خبر عاجل : ظهور نتيجة مصطفى

عاجل

_________________

ذكرت مصادر مقربة من مصطفى أبوزيد ظهر اليوم

أن نتيجة امتحانات التيرم الأول قد ظهرت في وقت سابق

وأكد مصدر للصحفيين ان مصطفى قد مر بنجاح من جميع المواد

وانه لم يرسب في اي منها

غير انه لم يتحدث عن التقديرات قائلا ان هذا سيعرف عندما تعلن النتيجه علنا

وكانت تقارير قد خرجت مساء امس تؤكد هذه الانباء

----------------

وفي لقاء لشبكة تي إلـ اكس السنغاليه الإخباريه الناطقه بالفرنسيه

علق مصطفى على الخبر قائلا ان الخبر صحيح

وأكد نجاحه في كل المواد إلا ان التقديرات النهائيه لم تعلن بعد

غير انه استبعد إمكانية حصوله على تقديرات مرتفعه

وقال مصطفى أن الحصول على تقديرات مرتفعه أمرا غير منطقي

بعد امتحانات التيرم الأول التي كانت بالغة الصعوبه على حد قوله

وأضاف مصطفى أنه لم يهتم يوما بالتقديرات بمقدار أهمية النجاح بشكل صافي

----------

وقال مصطفى انه يهدي هذا النجاح للجماهير العريضه التي لطالما تمنت له النجاح

مناشدا كل الجماهير أن تأتي بعلبة من الشيكولاته عندما يأتون لتقديم التهنئه

على ألا يقل ثمن العلبه عن أربعون جنيها

مؤكدا أن هذا الواجب سيرد لهم في الأفراح

( أبقو قابلوني )

-----------

وفي سؤال لاحد الصحفيين عن شعوره بعد هذه النتيجه قال مصطفى

أنه يحمد الله على هذه النتيجه

وأكد انه يشعر ان تيرم واحد بات يفصله عن نهاية مرحله ملحميه من حياته

داعيا الله ان يكلل هذا المجهود بنجاح في نهاية العام

----------

الحمد لله رب العالمين

لولولولولولولولوليييييييييييييييي