بسم الله الرحمن الرحيم
السلام عليكم
دايما الايام اللي فيها الراحة بتمر بسرعة
للأسف انتهت الأجازه وبدات الدراسه
والسنة الجديدة بالنسبه ليا سنة خاصة
أيوه أصل دي آخر سنة
الحمد لله
اخر سنة في هندسة دون أي كبوات
اخر سنة في هندسة دون أي كبوات
أنا شخصيا فخور بنفسي رغم ان كل سنة بجيب مقبول بالعافية
واعدادي واولى كنت شايل مواد
وشفقة مني على الطلبة الجديدة او اللي لسه قدامهم سنتين ولا حاجه
هأتكرم عليهم وأديلهم شوية خبره
أيوه أنا دلوقتي خبره
نصايح سريعة كده علشان ربنا يسهلكم وتطلعوا من الكلية
أي كلية في اي جامعه::
النصايح دي حصريه هنا في المدونه مش هتلاقيها في حته تاني
::
طبعا وهوه انت كل ما تروح حتة هتلاقي واحد خبرة زيي انا
متواضع جدا أنا .. صح ؟
_____________
النصيحه الأولى
النصيحه الأولى
كبر دماغك
كبرها قوي .. متشلغلش بالك بأي حاجه
هتلاقي الطلبه حواليك شايله الطين
واحد يقولك عدد سنين الكليه 5 + رقم غير محدد
والتاني يقولك عندنا 10 مواد
وهو كداب اصلا هما 5 بس
والتالت يقولك الدكتور هيجيب امتحان طين وانتوا لسه في اول يوم في السنة
كل الكلام ده دماغك منه
خليك في يومك ملكش دعوة باللي هيحصل بكرة او بعد بكره
_________
النصيحة التانية
==
فلسفة الحضور
::
::
أيوه الحضور ده فلسفة مش وخلاص
يعني لازم يكون في سبب لحضورك المحاضره
وبيني وبينك هما سببين
إما علشان تستفيد من شرح الدكتور لأن شرحه كويس
وإما الدكتور ملهوش فيها وشرحه نيله وبيأخد غياب
تقوم حضرتك تشرف في المحاضره علشان الغياب بس
لكن تلاقي ناس مش بتفهم من الدكتور ومش بياخد غياب
وتلاقيه مشرف في المحاضرة من الزهق ينام الدكتور يشوفه يطلع عينه
طب وليه ده كله متقعد في بيتكم من الاول طالما انك مش بتستفيد
طبعا احسن ناس بتطبق النصيحه دي الدفعة بتاعتي 4 ميكاترونكس
احنا 12 طالب مفيش مرة حضرنا اكتر من 8
لأ وكمان كان في امتحانات اعمال سنة وناس بتغيب
أحسن ناس _____
النصيحة التالته
==
تدعي ربنا يبعد عنك الدكاترة العجيبه
ايوه في دكاترة عجيبة ومريبه وغريبه
عندهم هواية واحده هي تعقيد الطلبه وتطليع عيونهم
ينطبق عليهم المثل اللي بيقول
" ياما في الجراب يا حاوي "
كل محاضرة يخترعلك حاجه تنكد عليك
ودول مينفعش معاهم غير الدعاء
واللي مش مصدق يسأل محمد خليفةانا مش هقول هوه عمل ايه
انا مش هقول هوه عمل ايهبس هوه دليل قاطع ان الدعاء بينفع مع الدكاتره
________
النصيحة الرابعه
::::
إمشي جنب الحيط
==
ولا أقولك إمشي تحتيها
يعني هتلاقي دكاتره زي اللي قولتلك عليهم من شوية
متعملش فيها عبداللطيف الأثيوبي وتقوم تعارضهم وتعمل معاهم مشاكل
هيقعدوك 100 سنة في الكلية
آخرك زي ما قلتلك هو الدعاء
:: مين عبد اللطيف الأثيوبي ده ؟؟ ::
_________
النصيحه الخامسه
النصيحه الخامسه
==
مصر مش أمك
===
في ناس كتير بتقول مصر هي امي
في الكلية الكلام ده مينفعش
لأن الموضوع هيقلب وطنية
والوطنية في الجامعة يعتبر مرض بعيد عنك
من اعراضه المظاهرات والاعتصامات والاضرابات
والنتيجه واحده
اوعى تفكر البلد هتتصلح
لا .. ده بعدك
النتيجه اعتقالات .. تحقيقات .. فصل من الكلية
يبقى احنا استفدنا ايه من مصرمصر هيا ايه؟
أيوا .. مصر مش امك دي مراة ابوك
______
النصيحة السادسه
===
متخنقش على نفسك
:::
ايام المذاكره والزنقه تلاقي طلبة غريبة
خانق على نفسه حتى مش بيدخل التواليت
عاملي فيها فالح
انت متزعلش روحك
اللي كنت بتعمله اعمله
العب بلاي استيشن
اقعد ع النت
اطلع مع اصحابك
ولمزيد من المعلومات في النقطة دي
إسألوني انا وحمادة حسين
______________________
كده انا خلصت ضميري من ناحيتكم
طبعا لو حد طبق التعليمات دي وسقط وده وارد
دي مش مشكلتي انا
يروح يشوف الدكتور اللي سقطه
ولا هوه مقدرش على مش عارف ايه راح اتشطر على مش عارف مين
___________
وكتبه/ مصطفى محمد ابوزيد
حامدا الله تعالى ومصليا على نبينا صلى الله عليه وسلم
عصر الجمعه 26/9/2008
