ذكريات فقريه في راس السنه الميلاديه

ذكريات فقريه في راس السنه الميلاديه

سلامو عليكوووووووو
بصراحه وحشتووووني جدا
لأ .. المدونه بجد وحشتني مووووت
من ساعة ما كتبت من غير كسوف وانا مكتبتش جديد
ضغوط عصبيه فظيعه في الكليه
من بعد العيد وانا قاعد في المخيم بتاعي (سكن الطلبه يعني) مروحتش بيتنا من كتر الضغط بتاع الكليه
كنت ناوي انزل اكتر من موضوع
ومنهم حاجات نادرة من أرشيف كتاباتي زي بكار وزي شهرزاد
بس الوقت بقى نجيبه منين
بس قريب جدا .. وعد.. الموضوعين بكار وشهرزاد هينزلو مع بعض
خلونا نخش في الموضوع قبل الوقت ما يسرقنا ومنتكلمش فيه
__________________

كل سنه وانتو طيبين
النهارده 1/1/2009
يعني أول يوم في السنه الجديده
سنه سعيده عليكو
يعني امبارح كانت ليلة رأس السنه
وطبعا ليلة رأس السنه دي بالنسبة للناس ليلة رائعه الناس بتتقابل وبتخرج والذي منه
راس السنه بقى
انا بقى قضيت هذه الليله بكل كئآبه في السكن بذاكر علشان عندي امتحان بعد 3 ساعات بالظبط
ملحوظه دلوقتي الساعه 10 صباحا
وانا بكتب الكلام ده من المعمل في الكليه
إستغلااااااااال
المهم قعدت أذاكر والناس بتهيص في الخارج
وطبعا صديقي الصدوق الصواف كان قاعد بيذاكر جنبي
اللي يضايق أكتر إن مع دقات الساعه الثانية عشره حسيت ان موبايلات المصريين كلها بترن
كله بيهني بعضه .. ده بيهني صاحبه .. فلان بيهني فلانه .. مش عارف مين بيهني مين
وأنا موبايلي الحقير قاعد زي الفقر مش راضي ينطق
بووووومه
طب رن .. حد يتصل بيا يقولي كل سنه وانت طيب يا مصطفى .. محدش معبر أهلي
أيوه طبعا وانا مين هيعبرني ؟؟ ولا عيل ولا تيل ولا حبيبه ولا قريبه
قعدت قلت يمكن حد يتصل برقم غلط يطلع رقمي ويقولي كل سنه وانت طيب أقوله وانت بالصحه والسلامه النمره غلط
برضه مفيش
كنت متضااايق بشكل
حاسس اني كائن بدائي وحيد الخليه
فجأه سمعت صوت رنة الموبايل

جريت عليه قلت اكيد حد بيتصل
بس للأسف .. لقيت الموبايل الحقير بيقولي البطاريه ضعيفه
وااااااااااااااااااااااااااااااااخ
المشكله إني أنا كنت حاطه في الشاحن
حتى الموبايل بيرخم عليا
قلت ابعت رساله لواحد .. من فقري بعد ما بعتها لقيت موبايله مقفول
بوووووووووومه
يعني ولا هو قرا الرساله والتلاتين قرش غارت في مصيبه
يعني ياربي رسايل الناس كلها توصل وانا رسالتي تقعد معلقه في البرد ده؟
فقررررررررررررررررررررررر

بعديها بنص ساعه كده سمعت صوت نغمة الرسايل قلبي زقطط من الفرح

ه قلت اكيد رسالة تهنئه

رحت لقيتها رسالة من واحد صاحبي في الدفعه مكونه من 3 كلمات

" الامتحان الساعه كام "

No Comment

مش عارف بصراحه اعمل ايه
الليله عدت زي اي ليله كل المتغير فيها انها كانت برد جدا عن كل الليالي
محستش اني حد مهم عند اي حد
واحب بهذه المناسبه ابعت رساله لقلبي و اقوله

اسمعني .. اسمع
عام جديد وانت ياقلبي لساك عنيد
خليك يا بوومه قاعد لوحدك .. والناس كل يوم بتحب جديد
خلي الوحده تنفعك لما تشيخ .. وتموت لوحدك فقري و وحيد
..
يا معفن
بس كفايه كده بقى علشان الامتحان خلاص .. عايز اقوم اراجعلي كلمتين
كل سنه وانتم طيبين ودعواتكم كده ألاقي بنت الحلال اللي مدوخاني
و إن الرساله اللي بعتها لصاحبي توصل علشان بصراحه ان زعلان على التلاتين قرش
أسيوطي بقى
سلاموووووز

وكتبه:
مصطفى ابوزيد
1/1/2009
العاشره صباحا – من معمل هندسة الميكاترونيات- هندسة أسيوط
حامدا الله تعالى ومصليا على نبينا –صلى الله عليه وسلم
z_elhafy@yahoo.com

من غير كسوف

السلام عليكم جميعا

كل سنه وانا طيب

النهارده 12/12 يعني عيد ميلادي

كل سنه وانت طيب يا مصطفى والسنه الجايه معاك الوظيفه

كان المفروض اكتب حاجه سعيده ولطيفه

عيد ميلاد بقى

بس نظرا للحاله النفسويه اللي ملخبطه ومشتته ومشألطه ومشخبطه ومشقلبه

كانوا الكلمتين دول اللي جايين طلعوا كده في دماغي وانا قاعد بتفرج على الفلفزيون

تعالو نبدأ من غير كسوف

وانا قاعد مع نفسيتي لقيتني بقول الكلمتين دول ولقيتني كشفت نفسي قدام نفسي

من غير كسوف
من غير كسوف هاحكي وهاقول الحقيقه
بس إسمعوني .. وإدوني ودانكم دقيقه

ده أنا كل يوم أقعد اكلم في نفسي
وأقول يا قلبي امتى تلاقي الحبيبه

قال الفؤاد بالعقل فكر معايا
ومنين نلاقي البنت الهاديه الأصيله

قلتله خليك قاعد في الوحده الكئيبه
والناس يا قلبي بتحب ومبسوطه وسعيده

حسيت بقلبي نزلت دموعه في ضلوعي
قلتله ابكي بس الدموع مش مفيده

ابكي يا قلبي لكن العيب مش في الحبيبه
ده انت اللي خايف ومكسوف تقول الحقيقه

________________________

معقوله انا اللي خايف ولا اللي مكسوف ولا ايه الحكايه

مش عارف

يلا سلام

مصطفى ابوزيد

12/12/2008

الحدود الجغرافيه والسيره الهلاليه

الحدود الجغرافيه والسيره الهلاليه

اهلا بيكم
كل سنه وانتم طيبين النهارده الوقفه
وبكره العيد
طبعا التهنئه دي مش موجه لكل الناس .. لا دي موجهه للناس اللي عندها العيد بكره
محدش يستغرب وخلونا نخش في الموضوع
الموضوع اسمه

" الحدود الجغرافيه والسيره الهلاليه"
وطبعا الموضوع ملهوش اي علاقه بأبوزيد الهلالي من قريب او من بعيد

:

:
الحكايه ان العيد في كل الدول العربيه يوم الاثنين 8 ديسمبر 2008
ماعدا سلطنة عمان
تخيلو .. ؟

زمان لما كنا بنختلف في عيد الفطر كنا بنقول ماشي الرؤيه كده

وفي النهايه كده كده بنعيد الضحيه مع بعض
علشان وقفة عرفه لازم تكون واحده في كل العالم الاسلامي
لكن تفاجئت ان العيد في عمان يوم الثلاثاء
تهريج والله

:

:
تعالو نشوف موضوع الحدود الجغرافيه ده
في رمضان اللي فات ليبيا صامت اول يوم الاحد ومصر وباقي الدول العربيه صامت الاثنين وعمان والامارات صامو الثلاثاء
تخيلو مصر وليبيا لازقين في بعض وكل واحد يصوم في يوم يعني اللي في السلوم ده لو الهلال في ليبيا ظهر مش المفروض اللي في السلوم يشوفه
طيب تخيلو لو كانت مصر وليبيا بلد واحده وده مستحيل سياسيا طبعا .. لكن تخيلو مش كنا لما نشوف الهلال في اي حته في مصر او في ليبيا كانو البلدين هيصوموا؟ ايوه الحدود اللي بين مصر وليبيا مكنتش هتكون موجوده صح؟ وكنا هنصوم كأننا بلد واحده

::

:
طيب سيبك من مصر وليبيا خليك في عمان والامارات

بلدين لازقين في بعض فرق ميكملش اتنين تلاته كيلو

والامارات تعيد الاضحى الاثنين وعمان التلات سبحان الله

:::

::

:
على فكره لو ملاحظين اني مش جايب اي وجهة نظر فقهيه ده مجرد تشغيل للدماغ في موضوع السيره الهلاليه

" اللي هوه الهلال يعني "
لو في يوم من الايام وده مستحيل يحصل مثلا كانت الدول العربيه بلد واحده وبرئيس واحد

" ابقو قابلوني لو حصل "
لو واحد شاف الهلال في جيبوتي مش كنا هنصوم في مصر طب لو واحد في جيبوتي ماشفهوش وشافه واحد في موريتانيا مش كنا هنصوم

::

للأسف الموضوع خرج من الأروقه الفقهيه ودخل في في اتجاهات سياسيه وطائفيه

وابسط مثال جناب السلطان قابوس اللي بكل بساطه اقر ان العيد التلات مخالفا لشريعه ربانيه هي وقفة عرفات اللي هيا يوم الاحد سبحان الله
وكل ده مخالفه للسعوديه وخلاص
محدش بقى يقعد يقوللي اين هيئة الافتاء السعوديه واين الأزهر واين المؤتمر الإسلامي
الكلام ده مبقيش يوكل عيش للأسف

::

:
انا شخصيا شايف ان الوحيد اللي يحددلنا ظهور الهلال من عدمه هو الكاتب والشاعر الكبير

" عبد الرحمن الابنودي "

لأنه هوه مجمع السيرة الهلاليه " و اكتر واحد عارف الهلال وحواراته

وسيبك بقى من الجهات الشرعيه والدينيه طالما ان 22 بلد عربي مش قادرين يلمو من بعض فلوس ويطلقو قمر صناعي يريحنا من وجع القلب ده
كفايه كده علشان دي ايام منفرجه ومش عايزين ننكد على بعض
يلا كل سنه وانتم طيبين

طلقات ذهبيه 1

طلقات ذهبيه

:

:
موضوع جديد عباره عن تعليقات قصيره ع الاحداث داخل وخارج الكليه
في شكل طلقات لكنها ذهبيه
يعني مش أي حد اللي كاتبها

::::::::::::::

:: أفواه ومطابخ ::

:

:
انتو عارفين يعني ايه سكن طلبه ؟
أيوه طلبه واخدين سكن مع بعض
لكن الحظ السيء انك تسكن وسط سكان
لأ والأسوأ انك تسكن ومنور شقتك فاتح على أربع مطابخ لشقق مجاوره
هو ده حالنا انا وأصحابي اللي ساكنين معايا في السكن
كل يوم تشم روائح أكل غريبه
لحمه بتتحمر .. فرخه بتتشوي .. سمك بيتقلي
وأحنا مثلا بناكل حواوشي تعبان من عند تيتو بتاع سيد السمسار
حسره .. ألم .. وربما حسد
والله انا خايف ع الجيران من كتر قرنا عليهم
وخايف كمان ان سيد السمسار - صاحب مطعم تيتو - يقرا الكلمتين دول ويضايق
وميرضاش يبعلنا حواوشي
تبقى كملت
__________

::البيضه السحريه::

:

:
لسه في شويه زمايلي ساكنين في المدينه الجامعيه
في العشا المفروض بياخدو بيضتين
ايوه بيضتين بتوع ججاجه
فوجئت من كام يوم بحماده حسين بيقولي انهم ادوهم بيضه واحده
حرام والله
حماده كان مخنوق جدا
قولتله يمكن يكون معاها دليل مستخدم ( كتالوج يعني )عشان تعرف تستخدمها
ايوه يمكن بيضه مستورده ليها طريقة استخدام تخليها تأدي أداء أربع بيضات مثلا
او ليها تعويذه سحريه تقراها تتحول فرخه بإذن الله
بالله عليكم ينفع واحد عنده 22 سنه يتعشا بببيضه؟؟
ده لو فرخه شافته ممكن تتبرع له ببيضه
لا تعليق على تدني مستوى الخدمه في المدينه
وشكرا لكل المسئولين
_________
:: بتحلم بالألماني؟؟ ::

فاكرين الإعلان بتاع عربيات أوبيل

اللي الراجل كان نايم فيه وبيحلم وبيخرف وهو نايم ويتكلم ألماني
يقوم الراجل المذيع في الاعلان يقوله بتحلم بالألماني
قصده ع العربيه يعني
ويطمنه ان العربيه أوبيــل رجعت من تاني
خليفه صاحبي بيحلم دايما يكمل دراسته او يشتغل في ألمانيا
وناس اصحابي بيقولو التكنولوجيا الالماني في العربيات هي رقم واحد
وسيد السوداني كل يوم يديني موقع فيه عروض لمنح لاكمال الدراسه في المانيا
ده بالنسبه للشعب
اما بالنسبه لرد الدوله الرسمي
فتكفلت به وزارة الصحه كالاتي
حملة تطعيمات ضد مرض الحصبه الألمانيه
إمتلأت كل شوارعنا بدعوى للتطعيم ضد المرض الخطير من سن 10 لـ 20 سنه
يعني سبنا كل التقدم اللي في ألمانيا وخدنا منها الحصبه
ده احنا بلد فقر بصحيح
ها يا خليفه لسه بتحلم بـ الألماني؟
ما أظنش
______________
:: مشروع تبرع ::

:
زمان كان إسمه مشروع التخرج
أيام ما كان الطالب يطلب في مشروعه كذا وكذا تقوم الكليه المحترمه تلبي طلباته
دلوقتي في ظل السياسه الحكيمه بتاعت كليتنا
اللي هي سياسة التقشف والفقر والنغمه اللي ماشيه اليومين دول وهي نغمة
" مفيش فلوس .. نجيب منين ؟"
بقيت المشروعات محتاجه تبرعات من اهل الخير والاحسان علشان تكمل
وبقي اختيار مشاريع التخرج بيتم على أساس
أرخص المشاريع
وأعتقد الطالبه اللي هتأخد أعلى تقدير
هي طبعا اللي هتصرف اقل مصاريف
فعلا الاسم الحقيقي لمشاريع التخرج هو مشاريع التبرع

_________

كفـــــايه النهارده أربع طلقات وإلى اللقاء في مزيد من الطلقات

:

:

مصطفى أبوزيد

دمع العيون

دمع العيون

^^^

^^

دمع العيون مش راضي يفارق جفوني

.

.

والهم طال .. والناس قاعده يلوموني

.

.

من كتر همي مش قادر أكسر قيودي

.

.

والوحده قتلتني والحزن كسر ضلوعي

.

.

والليل طويل .. والنوم مفارق عيوني

.

.

و إن نمت ساعه اشوف بلاوي في منامي

.

.

يا ما نفسي يوم اقدر أطيب جروحي

.

.

دي جروحي كترت و في الطب خابت ظنوني

.

.

اصل الجروح في القلب صعب نداويها

.

.

و اسأل مجرب .. أنا أصلي مجروح و عارف

.

.

ده أنا قلبي داب في الحب بس في الاخر مطالش

:

وكتبه / مصطفى أبوزيد

ظهر الخميس 6/11/2008

حامد الله تعالى ومصليا على نبينا صلى الله عليه وسلم