حصريا - من ذاكرة الإمتحانات

حصريا -- من ذاكرة الإمتحانات

__

__________

السلام عليكم جميعا

طبعا الدنيا إمتحانات ومحدش فاضي يغسل سنانه
لكن بناء على طلب الجماهير اللي تساءلت ليه مش بكتب
قررت اني اكتب حاجه النهارده وخصوصا ان النهارده كان اول يوم في امتحانات التيرم
( متقلقوش اللهم اجعلنا من المقبولين )
لذلك هأكلمكم عن ذكريات من ذاكرة الإمتحانات
ايوه أصل أنا بأمتحن من زمااااااان
من ايام ما كان اللي بيحل بينجح
بس إحنا مش هنرجع في الزمن لورى قوي
ده يا دوب سنه أولى ميكانيكا

ياااااااه
فين ايام اولى ميكانيكا ؟؟
أيام ما كنا 186 طالب في الدفعه
دلوقتي دفعة رابعه بكل شعبها اصبحت 60 طالب
الله ينتقم من اللي كان السبب
أوعوا تفكروا الدكاتره هما السبب متودوناش في داهيه
السبب هما أعداء النجاح
_____________
المهم

____________
الزمان : اولى ميكانيكا
الحدث : اختبار المقرر الإنساني التيرم الاول
ملحوظه : المقرر الإنساني د ماده ملهاش اي لازمه في الكليه بتكون من كليات تانيه

والماده مش مادة نجاح او رسوب

طبعا الدكتور علشان يبيع كتابه قال ان اللي هبشتري الكتاب هياخد العشر درجات بتوع اعمال السنه

واللي مش يشتري هياخد الصفر المتين
ولأني مش بأتهدد الا من دكاترة القسم بتاعي
قلت : والله مش مشتريه
هع هع هع
ملحوظه المقرر كان مقرر ادب وشعر من كلية أداب

طبعا ذاكرت شوية ورق قبل الامتحان بساعتين ودخلت أمتحن

أحد الأسئله كان بيقول
أذكر ملامح المرأه في العصر العباسي الأول مدللا على اجابتك بأبيات شعريه؟

من حسن حظي اني كنت مذاكرهم قبيل الامتحان رحت كتبت تلاته بالدليل

وقعدت افتكر في الملمح الرابع بس مفيش فايده
بس انا ما أغلبش أبدا.. رحت قلت في نفسي أنا هألفله ملمح وبالديل
كتبت كالآتي
الملمح الرابع : المرأه في العصر العباسي الأول كانت إمرأه رياضيه والدليل قول الشاعر
وهي تلعب باك يمين ::: وأحيانا رأس حربه
وفي ضربات الجزاء ::: لا تضيع أي ضربه

البيتين دول ألفتهم في اللجنه

حد عنده دليل ان كلامي غلط؟؟

ما تردوا

مفيش دليل على خطأ كلامي طبعا

المهم خلص الإمتحان والنتيجه ظهرت

حد يتوقع كده

لا ما شلتش الماده طبعا

ولا جبت مقبول

أنا جبت إمتياااااز يا جماعه

تخيلو ؟ إمتياز

ده انا نقصت العشر درجات بتوع الكتاب

إزااااااي؟

أهوه ياعم اللي حصل

انت ها تقر عليا ليه؟

__________________________

نستفيد إيه من كده؟

نستفسد عدة أشياء

أولا : متصدقش الدكاتره بتوع المقررات

ثانيا : ما تشتريش كتاب المقرر الانساني

ثالثا : المقررات الإنسانيه مش بتتصحح

رابعا : المقررات فرصه للتوضيح عن مواهبك

زي انا كده ما وضحت موهبتي الشعريه

خامسا : ما تفكرش ان ربنا هيسيبك لازم تتعاقب

من يومها انا مجبتش امتياز تاني إلا مره واحده بس

بس خلاص

كده خلص الموقف منتظرين تعلقاتكم عليه

مصطفى ابوزيد - 14/1/2009

خبر عاجل - مصطفى يطمئن الجماهير على صحته

عاجل

___________

ذكر مصدر مسئول رفض الإفصاح عن إسمه أن السيد المهندس مصطفى أبوزيد يتمتع الآن بصحه جيده

وردا على ما ذكره شهود عيان أنهم رأو السيد مصطفى أبوزيد يخرج من إحدى العيادات وقد ربط قدمه اليمنى بشاش أبيض

قال المصدر نفسه أن سيادته أضطر للقيام بجراحه صغيره في أصبع القدم الأيمن

للتخلص من بعض الباكتريا الضاره التي تعرف بعين السمكه

_________________

وكان سيادته قد توجه إلى العياده وأجرى الجراحه التي لم تتعدى الدقائق العشره

هذا وعلى خلفيه الجراحه أجرى سيادته حديثا مطولا لشبكة تي ال إكس الاخباريه السنغاليه الناطقه بالفرنسيه

تحدث خلاله عن الكثير من القضايا الدوليه والإقليميه وركز في حديثه على ضرورة أحترام جمهورية شونبونجو لمشاعر المصريين

وإعادة قرد موبينيل اللي بيتكلم الذي تم بيعه في صفقة مشبوهة أثارت جدلا واسعا في الاوساط المصريه

وناشد سيادته الجماهير الغفيره التي ستأتي للإطمئنان على صحته ألا يأتوا بأيديهم فارغه

وأن يأتوا بأي شيء على سبيل الواجب وإن كان سيادته يفضل البرتقال أبوصره

وقال سيادته أن الطبيب أخبره أنه يستطيع العوده لممارسة أعماله من مساء الإثنين

___________

تلقى السيد مصطفى إتصالا هاتفيا من السيد عبداللطيف الأثيوبي

نائب الرئيس الشونبونجي إطمأن فيه على صحة إصبع سيادته

وتشاورا في إمكانية الجلوس على مائدة المفاوضات من أجل

التفاوض في قضية قرد موبينيل اللي بيتكلم

هذا وتلقى ايضا اتصالات من السيد محمود عجوه والسيد زكي جمعه

___________

كانت هذه أهم الانباء

شكرا للمتابعه

_________________________________

إدعولي انا صابعي اتخرم كله

مصطفى أبوزيد - عصر السبت

3/1/2009

ذكريات فقريه في راس السنه الميلاديه

ذكريات فقريه في راس السنه الميلاديه

سلامو عليكوووووووو
بصراحه وحشتووووني جدا
لأ .. المدونه بجد وحشتني مووووت
من ساعة ما كتبت من غير كسوف وانا مكتبتش جديد
ضغوط عصبيه فظيعه في الكليه
من بعد العيد وانا قاعد في المخيم بتاعي (سكن الطلبه يعني) مروحتش بيتنا من كتر الضغط بتاع الكليه
كنت ناوي انزل اكتر من موضوع
ومنهم حاجات نادرة من أرشيف كتاباتي زي بكار وزي شهرزاد
بس الوقت بقى نجيبه منين
بس قريب جدا .. وعد.. الموضوعين بكار وشهرزاد هينزلو مع بعض
خلونا نخش في الموضوع قبل الوقت ما يسرقنا ومنتكلمش فيه
__________________

كل سنه وانتو طيبين
النهارده 1/1/2009
يعني أول يوم في السنه الجديده
سنه سعيده عليكو
يعني امبارح كانت ليلة رأس السنه
وطبعا ليلة رأس السنه دي بالنسبة للناس ليلة رائعه الناس بتتقابل وبتخرج والذي منه
راس السنه بقى
انا بقى قضيت هذه الليله بكل كئآبه في السكن بذاكر علشان عندي امتحان بعد 3 ساعات بالظبط
ملحوظه دلوقتي الساعه 10 صباحا
وانا بكتب الكلام ده من المعمل في الكليه
إستغلااااااااال
المهم قعدت أذاكر والناس بتهيص في الخارج
وطبعا صديقي الصدوق الصواف كان قاعد بيذاكر جنبي
اللي يضايق أكتر إن مع دقات الساعه الثانية عشره حسيت ان موبايلات المصريين كلها بترن
كله بيهني بعضه .. ده بيهني صاحبه .. فلان بيهني فلانه .. مش عارف مين بيهني مين
وأنا موبايلي الحقير قاعد زي الفقر مش راضي ينطق
بووووومه
طب رن .. حد يتصل بيا يقولي كل سنه وانت طيب يا مصطفى .. محدش معبر أهلي
أيوه طبعا وانا مين هيعبرني ؟؟ ولا عيل ولا تيل ولا حبيبه ولا قريبه
قعدت قلت يمكن حد يتصل برقم غلط يطلع رقمي ويقولي كل سنه وانت طيب أقوله وانت بالصحه والسلامه النمره غلط
برضه مفيش
كنت متضااايق بشكل
حاسس اني كائن بدائي وحيد الخليه
فجأه سمعت صوت رنة الموبايل

جريت عليه قلت اكيد حد بيتصل
بس للأسف .. لقيت الموبايل الحقير بيقولي البطاريه ضعيفه
وااااااااااااااااااااااااااااااااخ
المشكله إني أنا كنت حاطه في الشاحن
حتى الموبايل بيرخم عليا
قلت ابعت رساله لواحد .. من فقري بعد ما بعتها لقيت موبايله مقفول
بوووووووووومه
يعني ولا هو قرا الرساله والتلاتين قرش غارت في مصيبه
يعني ياربي رسايل الناس كلها توصل وانا رسالتي تقعد معلقه في البرد ده؟
فقررررررررررررررررررررررر

بعديها بنص ساعه كده سمعت صوت نغمة الرسايل قلبي زقطط من الفرح

ه قلت اكيد رسالة تهنئه

رحت لقيتها رسالة من واحد صاحبي في الدفعه مكونه من 3 كلمات

" الامتحان الساعه كام "

No Comment

مش عارف بصراحه اعمل ايه
الليله عدت زي اي ليله كل المتغير فيها انها كانت برد جدا عن كل الليالي
محستش اني حد مهم عند اي حد
واحب بهذه المناسبه ابعت رساله لقلبي و اقوله

اسمعني .. اسمع
عام جديد وانت ياقلبي لساك عنيد
خليك يا بوومه قاعد لوحدك .. والناس كل يوم بتحب جديد
خلي الوحده تنفعك لما تشيخ .. وتموت لوحدك فقري و وحيد
..
يا معفن
بس كفايه كده بقى علشان الامتحان خلاص .. عايز اقوم اراجعلي كلمتين
كل سنه وانتم طيبين ودعواتكم كده ألاقي بنت الحلال اللي مدوخاني
و إن الرساله اللي بعتها لصاحبي توصل علشان بصراحه ان زعلان على التلاتين قرش
أسيوطي بقى
سلاموووووز

وكتبه:
مصطفى ابوزيد
1/1/2009
العاشره صباحا – من معمل هندسة الميكاترونيات- هندسة أسيوط
حامدا الله تعالى ومصليا على نبينا –صلى الله عليه وسلم
z_elhafy@yahoo.com

من غير كسوف

السلام عليكم جميعا

كل سنه وانا طيب

النهارده 12/12 يعني عيد ميلادي

كل سنه وانت طيب يا مصطفى والسنه الجايه معاك الوظيفه

كان المفروض اكتب حاجه سعيده ولطيفه

عيد ميلاد بقى

بس نظرا للحاله النفسويه اللي ملخبطه ومشتته ومشألطه ومشخبطه ومشقلبه

كانوا الكلمتين دول اللي جايين طلعوا كده في دماغي وانا قاعد بتفرج على الفلفزيون

تعالو نبدأ من غير كسوف

وانا قاعد مع نفسيتي لقيتني بقول الكلمتين دول ولقيتني كشفت نفسي قدام نفسي

من غير كسوف
من غير كسوف هاحكي وهاقول الحقيقه
بس إسمعوني .. وإدوني ودانكم دقيقه

ده أنا كل يوم أقعد اكلم في نفسي
وأقول يا قلبي امتى تلاقي الحبيبه

قال الفؤاد بالعقل فكر معايا
ومنين نلاقي البنت الهاديه الأصيله

قلتله خليك قاعد في الوحده الكئيبه
والناس يا قلبي بتحب ومبسوطه وسعيده

حسيت بقلبي نزلت دموعه في ضلوعي
قلتله ابكي بس الدموع مش مفيده

ابكي يا قلبي لكن العيب مش في الحبيبه
ده انت اللي خايف ومكسوف تقول الحقيقه

________________________

معقوله انا اللي خايف ولا اللي مكسوف ولا ايه الحكايه

مش عارف

يلا سلام

مصطفى ابوزيد

12/12/2008

الحدود الجغرافيه والسيره الهلاليه

الحدود الجغرافيه والسيره الهلاليه

اهلا بيكم
كل سنه وانتم طيبين النهارده الوقفه
وبكره العيد
طبعا التهنئه دي مش موجه لكل الناس .. لا دي موجهه للناس اللي عندها العيد بكره
محدش يستغرب وخلونا نخش في الموضوع
الموضوع اسمه

" الحدود الجغرافيه والسيره الهلاليه"
وطبعا الموضوع ملهوش اي علاقه بأبوزيد الهلالي من قريب او من بعيد

:

:
الحكايه ان العيد في كل الدول العربيه يوم الاثنين 8 ديسمبر 2008
ماعدا سلطنة عمان
تخيلو .. ؟

زمان لما كنا بنختلف في عيد الفطر كنا بنقول ماشي الرؤيه كده

وفي النهايه كده كده بنعيد الضحيه مع بعض
علشان وقفة عرفه لازم تكون واحده في كل العالم الاسلامي
لكن تفاجئت ان العيد في عمان يوم الثلاثاء
تهريج والله

:

:
تعالو نشوف موضوع الحدود الجغرافيه ده
في رمضان اللي فات ليبيا صامت اول يوم الاحد ومصر وباقي الدول العربيه صامت الاثنين وعمان والامارات صامو الثلاثاء
تخيلو مصر وليبيا لازقين في بعض وكل واحد يصوم في يوم يعني اللي في السلوم ده لو الهلال في ليبيا ظهر مش المفروض اللي في السلوم يشوفه
طيب تخيلو لو كانت مصر وليبيا بلد واحده وده مستحيل سياسيا طبعا .. لكن تخيلو مش كنا لما نشوف الهلال في اي حته في مصر او في ليبيا كانو البلدين هيصوموا؟ ايوه الحدود اللي بين مصر وليبيا مكنتش هتكون موجوده صح؟ وكنا هنصوم كأننا بلد واحده

::

:
طيب سيبك من مصر وليبيا خليك في عمان والامارات

بلدين لازقين في بعض فرق ميكملش اتنين تلاته كيلو

والامارات تعيد الاضحى الاثنين وعمان التلات سبحان الله

:::

::

:
على فكره لو ملاحظين اني مش جايب اي وجهة نظر فقهيه ده مجرد تشغيل للدماغ في موضوع السيره الهلاليه

" اللي هوه الهلال يعني "
لو في يوم من الايام وده مستحيل يحصل مثلا كانت الدول العربيه بلد واحده وبرئيس واحد

" ابقو قابلوني لو حصل "
لو واحد شاف الهلال في جيبوتي مش كنا هنصوم في مصر طب لو واحد في جيبوتي ماشفهوش وشافه واحد في موريتانيا مش كنا هنصوم

::

للأسف الموضوع خرج من الأروقه الفقهيه ودخل في في اتجاهات سياسيه وطائفيه

وابسط مثال جناب السلطان قابوس اللي بكل بساطه اقر ان العيد التلات مخالفا لشريعه ربانيه هي وقفة عرفات اللي هيا يوم الاحد سبحان الله
وكل ده مخالفه للسعوديه وخلاص
محدش بقى يقعد يقوللي اين هيئة الافتاء السعوديه واين الأزهر واين المؤتمر الإسلامي
الكلام ده مبقيش يوكل عيش للأسف

::

:
انا شخصيا شايف ان الوحيد اللي يحددلنا ظهور الهلال من عدمه هو الكاتب والشاعر الكبير

" عبد الرحمن الابنودي "

لأنه هوه مجمع السيرة الهلاليه " و اكتر واحد عارف الهلال وحواراته

وسيبك بقى من الجهات الشرعيه والدينيه طالما ان 22 بلد عربي مش قادرين يلمو من بعض فلوس ويطلقو قمر صناعي يريحنا من وجع القلب ده
كفايه كده علشان دي ايام منفرجه ومش عايزين ننكد على بعض
يلا كل سنه وانتم طيبين