فتافيت كلام (2)

بسم الله

يبدو أنني أصبحت ثرثارا هذه الإيام

فهذا الموضوع الثاني في اربعة أيام

و يستمر الكلام على شكل فتافيت

ولكن اسمحو لي ان تكون فتفوتة عاميه فقد إشتقت الى العاميه

__________

فتفوته ( 2 )

في الفتفوته اللي فاتت اختلفنا اللي بنى مصر كان في الأصل إيه

أنا رأيي إنه كان مقاول بس معظم الناس شايفه انه حرامي

وعشان محدش يزعل هنفترض أنه كان مقاول حرامي وده شيء طبيعي طبعا

بس بعد ما مصر ما اتبنت بقي ليها تاريخ كبير

و بصتي فاضي جدا قررت كمان اني احط وجهة نظري في التاريخ

يكفيكم شر الواحد لما يفضى - يقعد يفتي في كل حاجه

الكام سنه اللي فاتت المظاهرات انتشرت في مصر

ع الفاضيه والمليانه

كل يوم والتاني مظاهره

و تاعبين البهوات رجالة الامن والامن المركزي و المطافي عشان مظاهرات

بس انا قررت القي نظره تاريخيه ع المظاهرات بصفتي راجل ضليع ومعرفش حاجه في التاريخ

انا فاكر ان اول مظاهره درستها و أنا طالب هي بتاعت احمد بيه عرابي

زيبعضوا انا بقول احمد بيه على اعتبار انه كان ظابط واحنا عودونا في بلدنا اننا نقول للظابط يا بيه

المهم احمد بيه عرابي ركب الحصان بتاعه ولم الرجاله حواليه ووقفه وقفه جااامده

وقل البوقين بتوعه و حارب وكالعاده اضحك علينا واتغلبنا

و بكده كانت اول مظاهره ملهاش لازمه

بس مش مهم خلونا نكمل يمكن نلاقي حاجه مفيده

بعدين معرفش ايه اللي حصل في التاريخ ايام ما كنا في المدارس

فجأه كده قفزو من عرابي لسعد باشا

سعد باشا زغلول

اموت واعرف ايه اللي قوم المظاهرات ساعتها

بس انا فاكر انه اتقبض عليه واتنفى والناس كانوا ولاد بلد

عملوا مظاهرات وصفيه لمت النسوان والموضوع كبر وبقي ثوره

يمكن كان ليها فايده ان سعد اطلقوا سراحه

لكن اي فايده سياسيه حقيقيه من اللي كان عايزها سعد

للأسف لأ .. وفشلت تاني مظاهره

مش عايز يجيلكو احباط .. ده لسه الاحباط جاي قدام

و يظهر اني كنت بغيب كتير وانا طالب عشان مش فاكر حاجه تانيه

فاكر طشاش حاجات عن ثورة 1952 وبعدها على طول حرب 73

في التاريخ ما اخدناش النكسه

المهم فجأه كده بقى بعد المظاهرات بتاعت السادات ايام اللحمه ما غليت

و الموضوع هدي شويه والمظاهرات قلت

بس مع دخول الالفيه الجديده رجعت تاني بس بكثااااااااافه

والشوارع تتقفل والناس تتفتش

الداخليه بس تاخد خبر ان في مظاهره والدنيا تتقلب

انا بقى لأن قلبي ع الداخليه ومش عايزهم يتعبوا

وقلبي ع الناس اللي بتعمل مظاهرات ومش عايزهم يزعلو

خدو الحل التاريخي ده

الناس اللي عايزه تعمل مظاهرات تعملها في الليل بعد الساعه واحده

و الموضوع فيه مميزات

الشوارع هتبقى هاديه شويه يعني هتمشوا براحتكم في الشوارع

وصوتكم هيبقى اعلى

غير كده ان الداخليه هتكون نايمه يعني زيط براحتك يا حج

و احب اطمن الداخليه برضه سيبوهم يعملو مظاهرات في الليل

و برضه يا داخليه ده خير ليكم

الناس هتبقى نايمه يعني محدش هيعرف هما بيقولوا ايه

و ابقى تعالى قابلني لو واحد مصري نايم وصحي عشان مظاهره

صدقني يا سعادة البيه الظابط الموضوع في مصلحتكم

هتصحى الصبح تلاقي المظاهره خلصت و كأن مفيش حاجه حصلت

شوفتو بقى انا قلبي ازاي عالشعب والداخليه

وده يحقق العباره التاريخيه

" مصطفى ابوزيد في خدمة الشعب والشرطه "

و

" توته توته خلصت الفتفوته "

^

مصطفى ابوزيد - الاثنين 19 اكتوبر 2009

----------------------------------------

ملحوظه : الموضوع في الاصل ساخر لذلك ربما توجد بعض المغالطات التاريخيه

______

.

.

.

فتافيت كلام ( 1 )

بسم الله

فتافيت كلام

اهلا بيكم وسلسله جديده اسمها فتافيت كلام

مواضيعها بتكون خفيفه وفيها كلام مستخبي خلف الطابع الكوميدي

علشان كده دي مش أي كلام دي فتافيت بس

فتفوته -1 -

" اللي بنى مصر كان في الاصل مقاول "

.............

إحتاروا جميعا في مصر و من الذي بناها

فخرج ليخبرنا أحدهم أن من بنى مصر كان في الاصل حلوانيا

وتعلل قائلا " وعشان كده مصر يا ولاد حلوة الحلوات "

ثم مرت السنون وخرج بعض الشباب الوطني ليصل لحقيقه هامه بقوله

" اللي بنى مصر كان في الاصل حرامي "

و لا تتعجب فهو يملك الدليل

ورأيه ان كل من تداولت في يده مسئولية مصر يسعى لنهبها وسرقتها

ولا اريد أن أوضح من المقصود طبعا

ولكني بالنظر الى الموروثات الشعبيه والامثال المصريه الخالده كان لي رأيا اخر

فالمصري نشأ وعلى لسانه علاقه هامه بالحوائط

مهلا .. انتظر و لا تنعتني بالبلاهه

فأنا لازلت اسمع نفس الكلام منذ صغري وحتى الان في كل مكان أذهب اليه

فهذا يحذر ابنه عندما بلغ مبلغ الرجال خوفا عليه قائلا

" إمشي يا ابني جنب الحيط "

و هذا يحذر صديق من الافراط في الاعتراض على اصحاب النفوذ قائلا

" انتبه الحيطان لها ودان "

أما ثالثهم فيتهكم على عدوه قائلا

" بكره نقعد جنب الحيطه و نسمع الزيطه "

و هذه الاخيره فهي تعلل قبولها لزوجها رغم عيوبه بقولها

" ضل حيطه و لا ضل راجل "

لذلك دائما تروادني فكرة ارتباط هذا الشعب بالحوائط

لذلك ربما من بنى مصر لم يكن حلوانيا او حراميا

و إنما كان مقاولا أو عامل بناء

ربما .. و ربما من بناها كان مهووسا بعض الشيء

و الدليل ان مصر انجبت شخصا مثلي

ربما نختلف جميعا لكنها في النهايه كانت مجرد فتافيت كلام

فتفتها لكم :

مصطفى أبوزيد – ليلة الجمعه 16 اكتوبر 2009

طلقات ذهبيه - 10

بسم الله

من مكان ما - مصطفى ابوزيد يحييكم من امام اللابتوب بتاع الصواف صاحبه

و كالعاده لأنه مش لاقي حاجه يعملها وقاعد يتسكع عند اصحابه

اتخذ القرار بكل حكمه و قرر يغلس عليكم كالعاده بـــ

طلقات ذهبيه 10

لو سمحتو مش عايز اي صافرات إستهجان .. أنا هبدأ على طول

---------

(1)

الحلول السحريه بالسياسه البنجريه

--

انا دلوقت بس عرفت الحكمه من اني بأشرب الشاي معلقتين سكر بس

رغم اني لا اعاني والحمد لله من اي امراض بسبب السكر

دي بقى حكمة ربنا لأن كيلو السكر بقى بأربعه جنيه و نص

أنا بصراحه سمعت الخبر اتصدمت .. انا مش بصرف على حد اينعم

و لسه ابويا بيصرف عليا بحكم اني عاطل

لكن السكر ده حاجه اساسيه في افقر بيت في مصر

كنا ننتظر طبعا اي وزير يطلع يقلنا حل

و بالفعل طلع وزير الزراعه يطمن جماهير الشعب

لكن اللي يغيظك ويجبلك شلل نصفي ان التصريح كان كالاتي

سيتم حل مشكلة السكر في غضون أربع سنوات

يا خرااااابي عالشلل اربع سنين يا حج ؟

لا استنوا بقى لما تشوفو الوسيله العالميه في الحل

قال الوزير

و ذلك بالتوسع في زراعة البنجر

اموت واعرف جاب البنجر ده منين

طب ما احنا بقالنا 900 سنه بنزرع قصب ولا عمر السكر غلي

يا ناس هتشل

اعتقد قدام شويه و بإعتبارالبنجر حل سحري جديد

هيطلع التصريح الاتي

حل مشكلة القمح في خلال 3 سنين و ذلك بالتمادي في زراعة البنجر

--------------

(2)

نوبل اوباما .. و أوبل مصر

----------

طبعا اوباما اخد جايزة نوبل للسلام

الراجل بنفسه اعترف وقال انا ما استحقهاش لكن يمكن ادوني الجايزه عشان يشجعوني ع السلام

و الله راجل فيه الخير لو حد من الحكام العرب اخدها كنا احتفلنا 50 سنه بالجايزه

المشكله بقى ان محدش في الدول العربيه بياخد الجايزه اصلا

اخر واحد افتكر انه اخد نوبل هو زويل بعد كده العمليه بلح

انا ممكن الاقي حل للعرب في المشكله دي

بما ان كل وزير ومسئول و رجل اعمال عنده اكتر من سياره فارهه اخر موديل

و مش عارف يركب ايه ولا ايه

ممكن نديهم جائزه أوبل في امتلاك السيارات

( أوبل أحد أشهر ماركات السيارات )

وبعدين اهي مفرقتش نوبل من أوبل

------------------

(3)

المصباح السحري والساحره الشريره

----------

لما كنا اطفال .. محدش يستغرب

أنا كنت طفل عادي

المهم كنا نتفرج على الكارتون وكان من اشهر الحاجات دي

المصباح السحري بتاع علاء .. علاء الدين مش علاء حاجه تانيه

متزدوناش في داهيه

و كمان كارتون الساحره الشريره

لكن اللي مضايقني بقى في المصباح السحري ده

أنا الاخ العفريت لازم يطلع من البوز بتاع المصباح

يعني الدنيا واسعه قدامك ملقتش غير البوز بقلبك الاعمى

وبعدين عفريت لازم يطلع مش لابس غير شورت ..

ما الهدوم ماليه البلد .. يظهر مكنش في رقابه ايامها

أما بقى الساحره الشريره دي غاوية شحططه

و راكبه مكنسه وقاعده تلف

مع انها ساحره يعني ممكن تختفي وتظهر في الوقت اللي هي عايزاه

طبعا انا مكنتش بفكر بالطريقه دي وانا صغير ههههههه

لكن انا باحب اغتت ع العفاريت بس

---------

كده خلصنا و طبعا الموضوع زي ما انتو شايفين ملوش لازمه

لكن هنعمل ايه

لكن كالعاده انا بوعد الجماهير الوفيه إني هحاول اعمل تطور في جدية المواضيع المطروحه

وطبعا كلكم عارفين الوسيله

بالتوسع في زراعة البنجر إن شاء الله

------

سلامتكم

مصطفى أبوزيد - 12 أكتوبر 2009

خاطره على اطلال النصر

بسم الله

ازيكم كلكم

فاكرين .. ؟

.

أنا بصراحه مش فاكر .. لأني مكنتش اتولدت اصلا

بس كان في رجاله مولوده .. كانوا هناك في ايدهم سلاح وبيحاربوا

من 36 سنه .. من 36 سنه كان يوم عزه و نصر وفخر لأي شخص مسلم خلقه ربنا

و بعد 36 سنه نفس اليوم .. بس فين العزه و الرفعه

ايه اللي باقي من النصر

ناس كتير ماتوا شهداء .. بس ناس اكتر عاشوا ولسه عايشين

شافوا مصر يوم النصر .. وشافوها النهارده

تعالو نشوف الراجل اللي عدى سن الستين

--------

كانت ليله طين .. مليانه حنين

لراجل عدى سن الستين

أتذكر عز شبابه .. و هو في سن التلاتين

كان هو و صاحبه حسين

شايلين في ايديهم سلاح

و في القلب شالو حب الوطن والدين

و مكنش يهمه يموت أو عمره يفوت

كان همه ساعتها إزاي يعيد أمجاد حطين

و فعلا حقق غايته .. ورفع راسه

و حط راس اليهود في الطين

وكل الأساطير إنهارت في ظرف يومين ..

و معدش يرفرف علم غير علم المصريين

و تمر سنين ..

ويعدي العمر و يوصل سن الستين

و بص على بلاده يشوفها وصلت فين ..

ملقاش من ذكرى النصر غير أوبريت .. و فلمين

و أغنيه وطنيه ..

و خطاب الريس ( مش عارف مين )

و لقى بلاده مطعونه بمليون سكين ..

و الناس خايفين ..

قال ياريت كان موتي هناك ...

تحت العلم .. ع الضفه التانيه ..

جنب حسين

------------------------

ياريت والله كنت ارتحت من اللي احنا فيه

ع الاقل احنا مشفناش العزه .. لكن شوفتها .. ودلوقتي حاسس بالذل اكتر من اي حد

----------------------------------

ع الهامش

دعواتكم لي بالشفاء جزاكم الله خيرا

مصطفى أبوزيد - 6 أكتوبر 2009

ذكريات و ملل

ذكريات و ملل

--------

عقارب الساعه تتحرك ببطئ لتقترب من الثالثه صباحا

أما هو فمازال يجلس منهمكا في اللاشيء

فقط يتجول تجولا معتادا في نفس مواقع الانترنت

ترك كل شيء و وقف في الشرفه

و جلس يتطلع الى الشارع الخاوي

و تدور مقلتيه بين المنازل التي غلفها الليل فصارت اشبه بالاشباح

انصت مجتهدا لعله يسمع اي شيء

و لكن السكون التام كان يذبح الليل ذبحا

دارت عينيه بملل في اللا اتجاه معلنة الملل من هذا الموقف

تراجع بهدوء ليترك الليل يعاني السكون الطويل

لم يكن الموقف بالداخل مغايرا .. فالسكون رفرف بأجنحته ليغمر البيت

------

امسك هاتفه الذي لم يدق منذ فتره

بحث في كل الارقام

يبحث عن احدهم ليتحدث إليه

مط شفتيه بضيق معلنا عدم عثوره على أحد .. أي حد

عقارب الساعه ما زالت تتسابق بلا ملل

اما هو فالملل كان قد اجهز على كل مشاعره

اصبح لا يفرق بين الليل والنهار

بين الضوضاء والسكون

لا فرق عنده بين هذا أو ذاك

فالنتيجه واحده .. النتيجه لا شيء

--------

العقارب تتحرك في بطئ ..

و بنفس البطئ تحرك ليصنع كوبه المر من الشاي

ربما أصبح هذا الكوب الأقرب إليه..

تداخلت في رأسه الافكار ..

وتتابعت الذكريات ..

تذكر هذه الأيام البعيده جدا ..

ما زال يرى نفسه يمرح في هذا الفناء الواسع .. غير عابئ برنين الجرس الذي يدق

في استماته ليعلن نهاية فسحته حينما كان عمره 7 سنوات في مدرسته الابتدائيه ..

ثم أخذته ذاكرته إلى هذا اليوم البارد .. شديد البروده ..

كان في الشهادة الإعداديه .. حينها تحدى هو و أقرانه برودة الجو التي كانت مذهله ..

ودحرجو بين أقدامهم الكره في الفناء الواسع في لعبة كرة القدم المجنونه التي سلبت

عقولهم ..

و انتهت ذكرياته بهذا المشهد .. كان شابا يافعا .. اوشك على إنهاء دراسته الثانويه

يومها كان يصر على الهروب من المدرسه كعادته .. ولم يجد إلا السور ملجأ لخطته

الشريره .. ونجح كالعاده ..

ذهب وترك هذا المعلم يجاهد من اجل ان يجبر التلاميذ على

الإنتباه ..

و كان هروبه هذه المره مبررا .. فقد كان يتلهف ليشاهد مباراة فريقه المفضل منذ بدايتها

مع هذا المشهد إرتشف آخر رشفات كوبه المر

ونظر الى الساعه .. وجد العقارب مازالت تتسابق في بطئ دون كلل أو ملل

أما هو فكان الملل قد ذبحه من الوريد إلى الوريد ..

و مع هذا كله أغمض جفنيه .. وترك نفسه لمزيد من المشاهد ..

والذكريات ..

.

.

مصطفى أبوزيد - أول أكتوبر 2009