جَرّ شَكَلْ - 2

( 1 )

الشعب ده ظالم .. دايما ظالم الحكومه و بيتهمها بإن كلامها غير صحيح

على مر السنوات اللي فاتت دايما تصريحات المسئولين بتأكد سيطرتهم على الأسعار من الارتفاع

و إن الأسعار مستقره و مفيش زياده الا في بعض الحالات 

و الناس علشان لقيو الطماطم بعشره جنيه قلبوا الدنيا .. إخص عليكم

الحكومه ملهاش ذنب في ارتفاع سعر الطماطم .. ببساطه لأنها مجنوووونه

و في نظر الحكومه الطماطم مجنونه و مختله عقليا فهما ملهمش ذنب

و الدليل على ان الاسعار ثابته فعلا .. هناخد مثال : سعر المـــواطن

سعر المواطن المصري دايما ثابت و لا بيزيد

مات محروق .. مات غرقان .. مات م الجوع .. مات تحت عربيه ع الطريق ..

سعره دايما ثابت .. عشرين ألف جنيه للمتوفي و 5 الاف للمصاب

مع اني شايف ان المصاب ما ياخدش .. مش كفايه انه عايش ممتش .. طماعين المصابين دول

بعد حادث الاسكندريه الاخير طلع المسئول و قال 20 الف جنيه للقتلى 

إسم الله على مقامك .. كتير يا شيخ .. و ان اتكلمت هيقلك احنا بنحافظ على الاسعار من الارتفاع

انا كل اشفاقي ع الميتين لو قابلو واحد من اللي ماتوا في السيول بتاعت جده في السعوديه

هيسألوه كام عطتكم الحكومه يا اخوي بعد ما مت .. هيقولهم 20 الف مخصوم منها الضرايب طبعا

ده هيبقى شكله مسخره ده الواحد منهم في السعوديه اخد مليون ريال .. يادي الفضايح

و حياتكم يا اخوانا اي حد يموت في حادثة ميرحش ناحية بتوع الخليج .. متبوظوش منظرنا حتى عند الميتين

بس فعلا يا جماعه اهي الاسعار ثابته .. عشرين ألف عمرها ما تزيد ... تقل ماشي أهو يكون نجاح في خفض الاسعار

أحب اقول للي حط المبلغ ده .. أراك توزع من مال أمكـ

( 2 )


في كل مرة تحصل مصيبة في مصر .. تاني يوم الجرايد تقول ان الداخليه مسكت اول الخيط


و اللي عمل كده هيتجاب و وقعت اللي خلفوه طين


و الناس تقعد مستنيه اخر الخيط ايه ... و هوب الخيط يطلع ملوش لازمه


الوحشين بيبقى معاهم الخيط و مش بيعرفوا يكملو


انا بقول الموضوع محتاج واحد ترزي .. اهو يعرف يتعامل مع الخيوط


و على فكره الترزيه دول شغالين .. عندك في ترزي بيفصل القوانين مثلا


و اهو الترزي في المباحث هيبقى مفيد 


ييعني قضيه عايزه تتوسع و لا حاجه و اهو يشوف موضوع الخيوط اللي مش بتودي لحاجه


و لا ايه ؟

سلام  .. ،،

على الشباك .. جارتنا المسيحيه

في السينما ,, قضيت ليلة رأس السنه مع صديقي أحمد نور الدين

انتهى لقائنا في الثانية عشر الا ربع .. و مضى كل منا لمنزله

الساعه الثانيه عشر الا دقيقة .. رسالة قصيرة من هاتفي لخطيبتي ،،

أهنئها برأس السنه متمنيا عاما سعيدا علينا

الساعه الثانيه عشر إلا دقيقه ،، في الأسكندريه ،، 

تحرك شخص آثم قلبه بسيارته قاصدا الفتنه

كان متوجس ان يفتضح أمره ،، و لكنه عبر الشوارع في سهوله و يسر

في قرارة نفسه سخر من الحديث عن تأمين الكنائس و الشوارع ،،

أي تأمين يتحدثون عنه و قد قطع طريقه بسيارة مفخخه و أوقفها بهدوء بين كنيسه و مسجد دون ان يسأله أحد

في منزلي بعد منتصف الليل ،، تعودت دائما ألا أتابع الاخبار الا في الصباح بعد الاستيقاظ مباشرة

خلدت للنوم في الثانيه و النصف ،، على غير العادة استيقظت بعدها بساعتين

أحس بشيء ما في قلبي ،، شيء يدفعني للقلق

لم استطع النوم ،، تصفحت الانترنت من هاتفي ،، صفحة الأخبار

إرتفاع ضحايا تفجير الأسكندريه

الأسكندريه انفجرت ؟ ،، لا يا أحمق تفجير في احد المناطق بها ،،

دارت عيني بسرعه على تفاصيل الخبر

سياره مفخخه ؟ قي ليلة رأس السنه ؟

أمام كنيسه ؟ و في الأسكندريه ؟

أي شيطان قد دبر هذا الحادث ..؟

كان من المنطقي أن أقرأ خبر اخر عن اشتباكات بين مسلمين و مسيحيين

هذا الشعب لا يتعلم أبدا

في خلال عشر دقائق يحقق اول هدف لمدبر الحادث

لو أن الحمقى من الجانبين يتنحون جانبا و يتركون حماقاتهم بعيدا

يا مصريين ،، لا يحتاج الامر الى ألبرت أينشتاين ليشرح لكم ان ايد خارجيه هي من خططت لكل هذا

ربما المنفذ هو يد داخليه ،، و لكن من خطط و مول و دفع لهذا الخائن هو عدو لمصر 

مصر بمسلميها و مسيحييها ،،

اختار رأس السنه ،، امام كنيسه بعد احداث العمرانيه و الاحتقانات الاخيره

الاهم من ذلك هو اختياره الاسكندريه و ليس اي محافظه

فهو يعلم ان الاسكندريه هي اكثر الاماكن التي بها احتقان و انا من السهل ايقاع مصادمات طائفيه فيها

لو أن الناس تفكر بعقولها قليلا

جميعنا مطعونون في الاعماق بعد هكذا حادث

و لكن لا يخفى علينا ان يدا خارجيه هي المخطط ،، يقولون إسرائيل ؟ ربما

امريكا ،، إيران ،، من يدري

كلهم أعداء .. تنظيم القاعده .. أيمن الظواهري ؟

هذه الأسماء قديمه جدا .. شخصيا لا اتهم جماعه و انما اتهم دول .. دول بعينها

الناس اتهمت اسرائيل انها وراء هجمات القرش على سواحل شرم الشيخ

ربما .. و لكن في حادث كهذا يتهموا المسلمين كأول متهم

قد تكون ديانته الإسلام و لكنه ابعد ما يكون عن تعاليم الإسلام و أوامر الله و رسوله

إن كان الفاعل مسلم او ينتسب للإسلام فالإسلام بريء منه و من أفكاره و أفعاله

لو وقع انفجار في مسجد و هذا جائز .. و الله لن نتهم المسيحيين لأننا نعلم سماحة كل الاديان السماويه

الإسلام دين سماحه و رحمه و المسيحيه تملأها السماحه و الصلاه حتى من أجل الأعداء

الأمر أكبر يا مصريين من من خلاف على بناء كنيسه او التستر على مسيحيه اسلمت

هذا هراء ،، هراء صحف و متعصبين من الجانبين

هذا الحادث لابد ان يمتنع الحمقى و المتعصبين من الجانبين عن الحديث و توجيه الاتهامات من خلاله

لو اننا شعب واعي واجب علينا ان نخرج منه أقوياء و إخوه ،،

الفتنه نائمه ملعون من ايقظها

بعد قرائتي للخبر وجدتني اردد ابيات نزار قباني التي أحفظها جيدا

على الشباك .. جارتنا المسيحيه

فرحت لأن إنساناً يحييني

لأن يداً صباحيه

يداً كمياه تشرين .. 

تلوح لي

تناديني

أيا ربي !

متى نشفى ، هنا ، 

من عقدة الدين ..

أليس الدين ، كل الدين ،

إنساناً يحييني ..

ويفتح لي ذراعيه ..

ويحمل غصن زيتون ..

إنساناً يحييني ..

ويفتح لي ذراعيه ..

ويحمل غصن زيتون ..

_______________________

رب إجعل هذا بلدا آمنا

|| جـرّ شَـكَـلّْ ||

( 1 )

الشعب المصري ده مش عارف مصلحته

الحزب الوطني ماليلهم الدنيا إعلانات لأجلك أنت ، الحزب الوطني في مصلحتك ، و برضه مش عارفين مصلحتهم

و في الإنتخابات الأخيره مش عايزين الحزب ، إخص عليكم

علشان تعرفوا بس ان التزوير اللي حصل كان علشان مصلحتكم انتوا

بأتعجب من موقف الإخوان المسلمين من الانتخابات

رغم إن حصول الحزب على اكتر من 90 % من المقاعد في تطبيق للمادة التانيه من الدستور

المادة بتنص ان الإسلام هو الديانه الرسميه للبلد و مصدر التشريع

و لما كان الاسلام بيقوم في الاصل على عقيدة التوحيد فالحزب قرر ان البرلمان يكون موحد في اتجاه واحد

و الشويه اللي مش تبع الحزب ربنا يهديهم الدوره الجايه ان شاء الله

فهمتوا بقى :)

بيحضرني في الموقف ده عنوان كتبه احد المدونين من 3 سنين  ، كتب الوطني لا شريك له

وحدووووووووووووووه

( 2 )

قطر هتنظم كأس العالم سنة 2022 و طبعا درجة الحراره بتكون فوق الـ 45 تعمل ايه قطر بقى

هتعمل ملاعب كوره مكيفه ، يا ولاد اللذينه

تخيل 8 ملاعب كرة قدم مكيفه بالكامل و حجم القدره الكهربيه المطلوبه

هيكيفو البلد يا اخوانا ، يخرب بيت الفلوس

كان عندي حق بقى لما طالبت في شهر سبعه اللي فات بتكييف لكل مواطن

عموما سنه 2022 لما الكهربا تقطع عندنا طول الصيف وزير الكهربا هيقول الإنقطاع بسبب الاحمال الزائده في دولة قطر

( 3 )

كل ما اروح اقطع تذكره في المترو الاقي اللي ع الشباك مش طايق امه و معرفش السبب

امبارح لقيت واحد بيشتري تذكره بيقوله عايزه تذكره شبرا

الراجل اللي ع الشباك عضلات وشه تقلصت و اداله التذكره ، ساعتها بس عرفت ليه اللي ع الشباك مش طايقين نفسهم

الموقف ده شوفته في اخر كام شهر يجي 10 مرات

المفروض الاخت اللي قاعده تقول عزيزي راكب المترو حرصا منا على سلامتك و تديله النصيحه

تقول عزيزي راكب المترو حرصا منا على سلامة الموظفين اعلم ان سعر التذكره موحد لكل الخطوط و موظف الشباك لا يتدخل بأي حال في الإتجاه الذي ترغب بسلوكه يخرب بيت ابوكم مليتو البلد

تصبحو على خير

إلى هشام الصادق .. الله يرحم أبوكـ

السلام عليكم

إمبارح ع الفيس لقيت كريم شاب فقري مشير لينك من موقع اليوم الساقع - السابع يعني -  إسمه " إلى مواليد التسعينات عيشوا عيشة أهاليكم "

لواحد إسمه هشام الصادق هو مش صحفي هو زائر للموقع

البيه اتاريه بيدافع عن الحزب او عن الرئيس ماشي يا عم دافع بس متفقعش مرارتنا المفقوعه

لينك المقال أهو إقروه علشان تفهمو ردي

الكابتن بيقلنا تعالو احكيلكم اهاليكم كانوا عايشين ازاي قبل مبارك

تعالى احكي يا معلم علشان الشباب اللي مفرق نفسه حركات اشي 6 ابريل و اشي 9 مارس على رأيك

بيقول الباشا ان شارعهم في 3 عربيات فقط منهم عربية والده الـ 128 الرهيبه

طيب يا حلو تعالى شوف العربيات دلوقت شكلها ايه و الشوارع بقيت عامله ازاي من الزحمه طبعا مش معترض ع العربيات الكتير

بس السياسه العمرانيه الرائعه و تقسيم المحاور و الطرق فاشل خلى البلد علبة سردين

على رأي سواق تاكسي كنت راكب معاه قالي البلد دي عايزه تبقى بدورين

و بعدين انت ابوك كان عنده عربيه 128 انا ابويا مش عنده ينفع كده .. إخص عليك

بيقول ان عمارتهم كان فيها تلفونين بس و ان واحد منهم كان في شقتهم طبعا

دلوقتي يا عم انت لو مركب تلفون  بتدفع 36 جنيه لو مرفعتش السماعه ده غير الموبايلات اللي جابتلنا المرض

سيبك من موضوع التلفونات ده خدوا الحته اللي جايه دي

بيقول ان اصحابه كانو بيقفوا في الطوابير و يلفو ع البقالين علشان يرجعو لأبهاتهم بعلبتين سجاير سوبر

و طبعا ابوه هو مكنش بيدخن دلوقتي يا ضنايا السجاير بقيت متوفره في عصر السيد الرئيس المزهزه

لدرجة ان العيال الصغيره بتشرب ده غير بقى البانجو و الحشيش و المخدرات اللي بقيت عادي جدااا

شفت بقى التطور اللي حصل في الكيف بعد 81 ربنا يديه الصحه كيفنا

يا راجل دي المحلات اللي بتبيع البيره ( هينكين ) منتشره في القاهره ،، في فيصل في بتاع بيره .. شكرا يا ريس

بيقول البيت كله كان بيستحمى بصابونه واحده و ان الجبنه النستو دخلت بعد 81 ههههههه

اول مره اعرف ان مقاييس تقدم الامم هو الصابون ابو ريحه و الجبنه النستو ههههههه

نسمع بقى في الاخبار و كانت من اهم انجازات سيادة الرشيس هو دخول الجبنه النستو للبلاد لاول مره في مصر و افريقيا

يا ويلي

بيقول سيادتك لما تيجى تتجوز تحجز ثلاجة و تحجز بوتاجاز وتحجز قطن علشان المراتب

و يا عالم تستلمهم قبل الجواز والا بعد ما تخلف

يا راجل حرام عليك طيب كنت بتتجوز اهو .. الشباب الايام دي بيتجوز على نفسه

بعد 81 يا عم اللي عايز يتجوز مش بيتجوز قبل التلاتين علشان يعرف يجيب التلاجه و البوتجاز دول

و بيقول ان ابوه استلم الانبوبه بعد ما خلف اخوه الصغير طب احنا مالنا

:)

المشروب الرسمي للشعب كان عصير القصب .. طب و ده حاجه وحشه و بتقول ان اللي بتبرقع فيه دلوقتي جه بعد 81 صح

اه ما احنا من 81 و احنا بنبرقع المرار

بيقول كل شارع كان فيه مخبأه علشان الحروب و كده قصدك اننا دلوقتي سلام و كده و مفيش حروب

يا فرحتي بالسلام و كل البلاد الللي حوالينا عاملينا ملطشه ما انت لو كنت في السودان يوم ماتش الجزاير مكنتش قلت كده

شوف الحته المسخره دي .. بيقول ان الكهربا كانت قاطعه طول النهار و الميه كمان

يا صلاة النبي يا صلاة النبي هو انت الصيف اللي فات كنت في مصر ؟

دي الكهربا كانت بتقطع في عز الحر و طول الليل و الميه الناس مش لاقياها

و اخيرا قال ان مصر لم تحقق اي بطوله رياضيه الا بعد 81 و ده علاقته ايه

هو الاهلي كويس بنجيب بطولات الاهلي وحش مفيش منتخب

اخر 10 سنين البطولات جايبهالكم احمد حسن و ابوتريكه

قال بعد 81 قال محسسني ان الريس كان بيقفلنا جون هههههههههه

 الاخر قال أصدقائى مواليد التسعينات أتمنى أن أكون قد قدمت لكم فكرة مبسطة عن الحياة فى بر مصر قبل افتتاح دريم بارك .

الغريب ان هو قالنا عيشو عيشة اهاليكم و محكلناش عنها قعد يحكينا عن عيشة ابوه و عيشة اصحابو

ابوه كان عنده 128 و تلفون و مكنش بيشرب سجاير خلاص يا عم عرفنا

:)

عيشة اهالينا كانت 100/100 و بيحكو عنها و بيقولو ايام يا ريتها ترجع

عزيزي الكاتب .. الله يرحم ابوك لو كان عايش كان حكالك ع الايام الحلوه اللي راحت

_______________

بس كده انا اتفشيت

:)

نورت أيامي

السلام عليكم

عبدالعزيز جويدة يقول

" و قتها .. في شرفة القلب وحيدا كنت أجلس

و ضياء مثل ضوء الشمس آت من عيونك

كان في استقبالك الرسمي قلبي

حين قبلت إمتنانا كفك الممدود نحوي

فأضاءت حوله الدنيا بنوركـ "

و أنا كذلك .. كنت روحا هائمه في هذه الدنيا

و حين اعلنت قدومك أشرقت الدنيا بنورك

ككل شيء رائع يحدث لنا في الحياه .. حدث كل شيء بسرعه

و  على قدر ما كتبت عن شوقي اليها على صفحات تحت الياسمينه .. كانت المفاجأه و هدية السماء أثمن و أغلى

مائـة و اثنين موضوع نشروا في هذه المدونه كلها كانت بالأبيض و الاسود

لانها كانت تدور في الافلاك بحثا عنك .. هائمه

حتى اهتدت على ضوء كوكبك الدري

فأكتست كلها بألوان الربيع الزاهيه و أشرقت معها الدنيا

فبعثت الدفء على الأرجاء كما تفعل الشمس إن ظهرت في صباح يوم بارد من يناير

لم تكن على الإطلاق أول من قابلت أو عرفت

و لكنها الوحيده التي زينت كل القصائد و الخواطر و حشدت كل الحنين اليها

يوم 8 أكتوبر 2010 و في حفل عائلي بسيط كنت هناك لأعلن لكل العالم أن سفينتي الحيرى قد رست على شاطئها

و أن يدي اليمنى قد تزينت بدبلة الخطوبه

الى كل زوار هذا المكان إمنحوني دعوة من القلب أن يبارك الله لي

أحبكم في الله