انا حر في تدويني + استفزاز مقصود هع هع

بسم الله

دايما حرية الرأي ليها حدود

إيه الدخله دي؟

انا شكلي مضايق ولا إيه؟

مش مضايق قوي بس حابب اوضح شيء

التدوين دايما يميل اكثر للخصوصه

وده اللي خلاك ممكن تعمل مدونه في 3 خطوات

اسم دخول - بريد الكتروني - كلمة سر

عشان تكتب اللي انت عايزه مش اللي الناس عايزاه

من يومين جاني رد على موضوع خطة الدرجات

بيقولي خلي مواضيعك هادفه وليها معنى

اي رقيب هذا؟

واي حق يفرض نفسه ليوجه افكارنا ؟

خلونا نفرض ان مواضيعي مش هادفه

من حقك تدخل المونه ومن حقك تكرر الزياره

ومن حقك ما تكررهاش

لكن مش من حقك انك تقولي اكتب ايه وما اكتبش ايه

دي اسمها مدونه شخصيه

ممكن يتفق معايا 100 و يختلف مليون

بس عمرنا ما بنقول لبعض نكتب ايه ومنكتبش ايه

ثانيا بالنسبه لمواضيعي انا بانتهج نهج الكتابه الساخره

الكتابه الساخره دايما بتناقش الامور بشكل مش مباشر

او بشكل كوميدي نوعا ما

وبتوفر صفحات وصفحات في سطور قليله

بس اللي يفهم

مثال كتاب شكلها باظت بتاع عمر طاهر

كتاب رائع لو قريته للوهله الاولى تقول ده كتاب متخلف

لكن ركز كده كل صفحه متخبي وراها 10 صفحات متكتبوش

بس لو قريت كويس هيدخلو دماغك وهتوصلك الفكره

مش هاقعد انا اشرح مواضيعي

ملحوظه مهمه جدا انا مش بدافع عن مدونتي

انا بدافع عن حرية التدوين

اعمل لنت مدونه واكتب مواضيعك اللي شايفه هادفه

وانا هزورك وهتفاعل معاك

اهلا باي حد في اي وقت

اهلا باي تعليق في اي موضوع

اهلا باي نصيحه لكن في شكل نصيحه

النقاش مفتوح واللي عايز يتناقش اهلا وسهلا

اخير بس زيبعضوا اللي يعلق بلاش شغل التخفي ده

ممكن يكتب اسمه او اسم مستعار

لان غير معرف دي ليس لها قيمه

افتكرت عنوان عجبني كتباه ميمايا في مدونتها الجميله

كاتبه " المدونه دي بتاعتي اكتب فيها براحتي "

--------------

تاني موضوع النهارده

استفزاااااز

موضوع ان البنات يدخلو ميكانيكا ولا لأ

ويشتغلو في ميكانيكا ولا مينفعوش

الكلام فيه كتر اوي

قررت استفز الجميع

في خطوه غير محسوبه و لا مدروسه

هتشعل الموقف اكتر

(شرير جدا أنا )

مش بالكلام هنخلي الصوره تتكلم

هانزل الصوره ورزقي على الله وربنا يستر ع الولاد بعد كده والبنات مش يموتوهم

انا الحمد لله سبتلهم القسم يشبعوا به

بس كلي امل ان الولاد من بعدي يكملوا الرساله

سامعني يا احمد يا عبدالسميع انت وامجد محمد احمد

ولا بلاش امجد

ومحدش يسال ليه بلاش امجد

ههههههههههه

خلونا مع الصوره

استفزاااااااااز

موسيقى عسكريه

أستر يارب

ياد يا عمرو يا حسيني

إستعد ياد عشان هسلمك الرايه من اول السنه الجايه

-------------

استفزاز جديد

بالنسبه للموضوع ده

ملحوظه : الموضوع ده تافه وملوش فايده

نياهاهاهاا هع هع هاهااهه

ضحكات شريره متقطعه

سلام

مصطفى ابوزيد - 30/7/2009

طلقات ذهبيه 7

الباشمهندس مصطفى ابوزيد

^

^

أيوه باشمهندس حد عنده اعتراض

جايب مقبول بس برضه باشمهندس

هع هع هع

المهم

الباشمهندس مصطفى ابوزيد يحييكم من اول اوضه ع الشمال وانت داخل شقتهم

و بصفته راجل عاطل وفاضي ومش لاقي حاجه يعملها

قرر انه يقدملكم

طلقات ذهبيه 7

تصفيييييييق حااااااد

شكرا للجماهير الوفيه

أهلا بيكم

-----------------------------

(1)

بلد بتاعت غرامات صحيح

------

من سنتين نزلت العملات المعدنيه للجنيه والنص جنيه

و من يومها والناس بتتخانق مش عايزين يستخدموه

الناس بتقول انه بيضيع بسرعه وانه بيتقل جيوبهم

بس والله انا شوفت ناس مش معترفه بيه اساسا

ويقولك لا ياعم احسن اخده ومحدش يرضى ياخده مني

بغض النظر عن انه حلو ولا وحش

وزارة الماليه اخيرا لقيت حل لعدم اعتراف الناس بيه

وقررت توقيع غرامه 100 جنيه ع اللي يرفض التعامل بالعملات المعدنيه

يا معلم

يعني مترضاش تاخد جنيه من البقال تلبس في 100 جنيه

اسلوب رائع في حل المشكلات

وده يوصلنا لحاجه

ان بلدنا دي بتاعت غرامات

و محدش يقدر ع الحكومه

واللي مش عاجبه يخبط دماغه في الحيط

انا شخصيا عاجبني

أصل انا مواطن صالح وشريف

هههههههه

أحلى من الشرف مفيش

و دليل على كده اني لو اتوقعت عليا الغرامه دي هدفعلهم المية جنيه

جنيهات معدن

ههههههههههه

------------------------------

(2)

الستات بين الواقع والخيال

------

عارفين مشكلة الرجاله مع الستات ايه

انه بيعيش معاها في الخيال بعدين ينزل يدور عليها في الواقع

وبما اننا عارفين ان فرق شاسع بين الواقع والخيال

لذلك بتكون المشكله

يعني تيجي تسأله مواصفاتها ايه

يحطلك مواصفات لو موجوده في واحده ممكن تبقى وزيرة خارجية امريكا اصلا

الباشا عايزها مثقفه ومطلعه وذكيه وشخصيتها قويه

وقياديه ومهذبه ورائعه وخارقه و رائدة فضاء ولعيبة كوره

وطباخه مثاليه ودكتوره ومهندسه ومدرسه ومحاميه

ارحم اهلنا يا عم

ينزل المعلم يدور يقعد لحد 30 سنه مش لاقي

ساعتها الناس تشفق عليه ويقعدوا يدوروله على عروسه

واللي تقوله بت اختي حلوه

واللي يقوله بت اخويا ممتازه

ويا عيني يقعد يدور بس على واحده متدينه وغلبانه ومقبوله

بعد ما كان عايزها زي منى الحسيني وميرفت امين وابوتريكه وحسن شحاته

يا جدعاااان مفيش واحده كامله

لو هتدور على واحده كامله هتتعب ومش هتلاقي

بلاش الخيال خليكو في الواقع

بدل ما في الاخر تاخد واحده شبه براد الشاي

انا شخصيا حطيت وصف واحد للي عايزها محدش عارف يفسره

قالولي ايه مواصفاتها

قولتلهم عايزها تكون دماااااغ

مش عارف اعبر الا بالكلمه دي

اللي يعرفلها تفسير يقولي ويكسب فيا ثوااااب

بس اهم حاجه تكون دماغ دماغ مش اي كلام

----------------

(3)

ثانويه ازاي؟

--------

اهم مرحله تعليم في نظام التعليم المصري

سموها الثانويه

رغم ان كلمة ثانويه تدل على حاجه مش مهمه اوي

يقولك الموضوع ده ثانوي نبقى نشوفه بعدين

بصراحه المسأله دي لفتت نظري

الضجه الفظيعه وتقرير المصير

وكأن الي مش هيدخل طب وصيدله وهندسه هيدخل النار

كل ده وبيسموها ثانويه

المفروض يسموها المهمه او الحساسه

او اللي هتحدد مصيرك يا ولدي

حتى عشان العيال يهتموا شويه

المشكله انك لو جبت في سنه تانيه 98 في الميه

ممكن ماتدخلش طب

والله العظيم استعباط

عشان تبقى في الامان المفروش تجيب 99%

نظام تعليم ركيك وفاشل ومنيل بنيله

والله العظيم انا بشفق ع الولاد الصغيرين اللي لسه في ابتدائي

ربنا يستر

على ايامهم ممكن متلاقيش ثانويه اصلا

-------------

كفايه كده النهارده

متنسوش بس اي حد يلاقي واحده دماغ

يقولي على طول

ههههههههههههههههه

في امان الله

مصطفى ابوزيد - 27/7/2009

حصاد

إزيكم

حصاد عام مضى

مش اول عام تدويني .. لأ أنا بدون من 3 سنين

و مش حصاد سنه ميلاديه ولا سنه هجريه

ده حصاد عام تدويني دراسي

انا حسيت فعلا إني نضجت جدا في الكتابه والتأليف خلال السنه الدراسيه دي

بدأت في سبتمبر 2008 و انتهت في يوليو 2009

في الموضوع ده هناخد لفه على اهم المواضيع اللي كتبتها في السنه الجميله دي

يلا نبدأ

--

في 26 سبتمبر 2008 كانت البدايه مع موضوع الخلاصه في الدراسه

مجموعه من النصائح الشريره للطلبه الجداد

شريره شريره يعني

الخلاصه في الدراسه

في 27 نوفمبر كان اول موضوع في سلسلة طلقات ذهبيه

السلسله اللي انا بحبها وبأعتز بيها جدا

دي كانت البدايه

طلقات ذهبيه 1

ليلة راس السنه

كل سنه وانتو طيبين بس كان الوضع مختلف معايا

ذكريات سيئه تعالو نشوف اللي حصل

ذكريات فقريه .. في رأس السنه الميلاديه

بعدها بيومين - يوم 3/1/2009

طلعت كل وكالات الانباء في خبر عاجل

علشان تطمن الجماهير على صحتي

هع هع

عاجل: مصطفى يطمئن الجماهير على صحته

جت الامتحانات بتاع التيرم الاول

وبعيد عنكم كانت حاجه مش تمام

نتيجه لكده كان لازم اتدخل وانزل بخطه جديده لحساب الدرجات

اعتقد هتعجب الناس الفشله اللي زيي

عاجل: خطه جديده لحساب الدرجات

الصراحه راحه

ده كان عنوان الموضوع اللي نزل في 8 مارس

رديت فيه على اسئلة الزوار بكل صراحه بناء على اقتراح انا اقترحته عليهم

انهم يسألو اللي نفسهم فيه وانا اجاوب بصراحه

كان موضوع ظريف فضفضت فيه شويتين

تعالو نشوف الناس سألت في ايه

الصراحه راحه

يوم 13 ابريل 2009

نزل الموضوع اللي بسببه كانت اكبر خناقه في المدونه بين الولاد والبنات

مكنش قصدي يتخانقو بس انا قلت رأيي في حاجه حصلت في القسم

الخناقه كانت سخنه لدرجة اني اضطريت اني اعمل رقابه ع التعليقات

خلينا نشوف

ميكانيكا بتاعتنا .. مش بتاعتكم

يوم 5 مايو رحبت بأوباما على طريقتي

في مكالمة تلفون هتلاقوها هنا

ألوووو .. أوباما

دي كانت أبرز المواضيع

طبعا ما اقدرش انسى سلسلة طلقات ذهبيه بأجزائها السته

هتلاقوها في البار ع اليمين

وطبعا القصايد والخواطر الشعريه اللي كتبتها

هتلاقوها برضه ع اليمين

واللي معظمها كان مكتوب لوحده انا لسه مش عارفها

كل المواضيع هتلاقوها ع اليمين

مبسوط جدا اني اتعرفت على ناس محترمين من المدونين

كل زياره وكل تعليق كانوا بيسعدوني

اتمنى أستمر ف التدوين

ويستمر التفاعل موجود

كل سنه وانتو طيبين

تقبلو تحياتي دائما

مصطفى أبوزيد - 23 يوليو 2009

القواعد النسائيه الكلاسيكيه

كنت ولازلت اعتقد ان علاقة الرجل بالمرأه هي علاقة شد وجذب

و لا تخفى وجود بعض بذور العداوة بينهما

حتى التاريخ نفسه لم يذكر لنا انتصارا صريحا لأي منهما على الآخر

ولكن جولة له وأخرى لها

ولكن صدقوني ربما تكون المرأه تملك بعض القواعد العدوانيه الدفاعيه

قبل وبعد ارتباطها بالرجل

فتجد مثلا القاعده النسائيه الكلاسيكيه التي تنشأ عليها المرأه

" يا مأمنا للرجال يا مأمنا للميه في الغربال "

هي قاعده تهدم كل بذور الثقه بينهم

فهي ترى اخلاصه كجرعة ماء تختفي سريعا ان القيت في وعاء مليء بالثقوب

و يجد الرجل نفسه متهما بإتهامات شنيعه

و يقف ليدافع عن نفسه ضد إتهامات نسبت إليه

بناءا على هذه القاعده الكلاسيكيه المتهالكه

ثم ان وافقت على رجل بعينه وكانت شريكته في الحياه

لا تزال بذور الشك تلعب دورها

فتبدا القواعد الدفاعيه في الظهور

من نوع " جوزك على ما تعوديه"

فتحاول ان تفرض نظاما خاصا للزوج على هواها

و إذا شاء الله للزوج ان يكون ثريا وصاحب منصب وجاه

تظهر وسيلة دفاع تبدو وكأنها مثاليه للتحقيق التوازن

هي قاعدة" يغلبك بالمال إغلبيه بالعيال"

فتتجاهل المرأه وفقا لهذه القاعده كل نداءات تنظيم الاسره

وتظل تنجب حتى تحقق رقما قياسيا

ربما تكون نتيجته في النهايه هي ان يقتلها زوجها هي وابنائها العشرين

و يمكنك ان تتأكد بنفسك إذا إستعنت بأحد رجال المخابرات

ليضع لك جهاز تصنت صغير في احدى الجلسات النسائيه

لتسمع بنفسك هذه وهي تشكو حالها

وتبتهل الى الله ان يدهس احد اتوبيسات النقل العام زوجها

و اخرى تتمنى افلاسه خوفا من ان يخونها بماله

----

و على النقيض فإننا نجد بيوتا و عائلات ناجحه

و لكن انظر الى الفارق بين هذه الزوجه و الأخريات التي تكلمنا عنهن

لتجد فارقا و كأن هذه الزوجه الناجحه هبطت لتوها من كوكب الزهره

صدقوني المرأه هي المحرك الأساسي

لنجاح أو فشل الرجال

و قديما قالو " وراء كل رجل عظيم إمرأة عظيمه"

و لكنهم عادوا ليقولوا " وإن لم تكن وراءه كان أعظم "

ربما و ربما العكس

--------

دمتم بكل خير

و تقبلوا تحياتي دائما

مصطفى أبوزيد - 19/7/2009

عاجل: رسميا مصطفى ابوزيد يحصل على درجة البكالريوس

عاجل

رسميا مصطفى ابوزيد يحصل على درجة البكالريوس

ذكرت مصادر مطلعه صباح اليوم أن مصطفى أبوزيد

قد حصل بشكل شبه رسمي على درجة البكالريوس

وقال المصدر نفسه أن مصطفى قد حصل على تقدير عام مقبول نافيا كل التقارير

التي تحدثت عن امكانية حصوله على أعلى من ذلك

وكان مصطفى قد أعلن في أكثر من مناسبه

عن عدم إهتمامه بالتقدير بقدر إهتمامه بالنجاح نفسه

--------

هذه الأنباء تأتيكم على الهواء مباشرة

-----------

و في سياق آخر قال مراسلونا في اسيوط

أن الإعلان الرسمي عن النتيجة النهائيه لم يتم بعد

إلا أن هذه النتائج قد صرح بها أحد المسئولين عن الكنترول

--------
و في حديث إنفردت به كالعاده وكالة

تي إل إكس الإخباريه السنغاليه الناطقه بالفرنسيه

مع مصطفى أبوزيد أكد مصطفى هذه التقارير

وقال انه يتبقى فقط الإعلان الرسمي المنتظر خلال يومين.

وقال مصطفى إنه حصل على تقدير عام مقبول

وهو أمر متوقع بالنظر إلى مسيرته على مدار السنوات الخمس الماضيه

و بالسؤال عن مشروع التخرج قال مصطفى للوكاله

أنه حصل على تقدير إمتياز في مشروع التخرج

مكللا بهذا التقدير تعب و مجهود إمتد على مدار عام كامل

و أهدى مصطفى هذا النجاح إلى الجماهير العريضه

متمنيا أن يهاديه الحميع بهدايا قيمه

يذكر أن مصطفى من مواليد ديسمبر 1987

بمحافظه اسيوط - ديروط

إلتحق بكلية الهندسه في سبتمبر 2004 وأمضى بها خمس سنوات

ليحصل أخيرا على درجة البكالريوس في الهندسه الميكانيكيه

كانت هذه مشاهدينا أهم الأنباء وسنوافيكم بمزيد من التفاصيل

عند الاعلان الرسمي عن النتائج

----------------

الحمد لله رب العالمين

مصطفى ابوزيد - 14/7/2009