طلقات ذهبيه 9

بسم الله

مصطفى ابوزيد يحييكم من اول اوضه ع الشمال وانت داخل من باب شقتهم

واحد فاضي و عاطل ومستني يشوف الجيش

مقدمهوش غير حل واحد انه يفاجئكم ويقدملكم

.

.

.

طلقات ذهبيه 9

.

.

من غير هتافات هنبدأ على طول

---------------

(1)

الروتين وسنينه

----

صدقوني و الله مشفتش بلد في الكون كله فيها روتين زي المحروسه مصر

روتين غريب معقد ممل يمتاز بقدره تاريخيه على تعطيل المصالح

مشفتش موظف لحد الان مقلش لمواطن رايح يقضي مصلحه

انه ورقه ناقص و انه لازم يتختم من فلان و علان وترتان وحمدان

و انه لازم يصورالبطاقه 1500 مره

و يجيب ما يثبت انه بيغسل سنانه 90 مره يوميا

عمركش يا مواطن رحت قضيت مصلحه في مكان حكومي الا والموظفين يشلوك

سيبك من انهم بيجوا متأخر و انهم باردين

لأ .. خليك في اتقانهم للروتين

الواحد فيهم عامل زي الانسان الآلي

يرد عليك بكل بساطه هات وجيبو امضي واختم وتعالى بكره او بعده

مع ان نص الورق اللي بيطلبوه ملوش لازمه اصلا

انا حاليا بعمل ورق الجيش بتاعي

اموت و اعرف ليه اعمل قيد عائلي

طالما ان انا مش كبير عيله و لا وحداني

طيب خلاص هعمل قيد عائلي

مال اهلي انا ان كان ليا اخ مات من 35 سنه

اجبلو شهادة وفاه منين

انا اتوقع ان بعد عشر سنين الامور هتكون اسوأ و الروتين هيزيد

و عشان تطلع شهادة ميلاد لازم تجيب مدحت شلبي يمضيلك ع الورق

و اشمعنى مدحت شلبي ؟؟

لانه بيقول لاي حد الله عليك يا حبيب والديك

و بالتالي هو اللي هيثبت انا ابويا وامي هما فلان وفلانه

و مساء الأنوار

------------------------------------------------

(2)

المدارس واللي يروحوها

-------------

حد فيكم فاكر و هو في ابتدائي كان بيكره المدرسه قد ايه ؟

انا شخصيا كنت بأدعي و اقول يارب المدارس كلها تتهد في يوم واحد

معرفش ازاي

دلوقتي يا معلم العيال اتدلعت على حس انفلونزا الخنازير

الواد يروح يوم و يغيب يوم

يا صلاة النبي يا صلاة النبي

لما هو التعليم فاشل ومنيل بنيله والعيال بيروحوا كل يوم

تخيل لما يغيب نص الاسبوع

ابقو تعالوا قابلوني طالما التعليم فيه جمل

و قال كانوا عايزين يلغو الدراسه السنه دي

الحمد لله اني خلصت دراسه السنه اللي فاتت

و الله لو داخل البكالريوس و قالولي هنلغي الدراسه اعملهم مصيبه

ما انا كده كده متنيل على عيني ميت يبقى اموت بشهادتي احسنلي

مش كده ولا إيه ؟

---------------------------------------------------

(3)

اعلانات الحكومه

--------

برغم انها اعلانات دمها خفيف الا انها بتطلب حاجات غريبه

أيوه الاعلانات اللي بتيجي ع التلفزيون - الاعلانات الحكوميه

يا عم ده بيقول احترم الانبوبه

ههههههههههههههههه

أحترم الانبوبه ازاي يعني

أحطلها برفان مثلا .. ؟

ويقولك متخبطش عليها

لا هأبقى أرن الجرس - ههههههههههه

يا عم عايزينا نحترم الانبوبه

احترمونا انتو الاول

بلاش استفزاز الواحد عايش ومش بيتكلم

العقبري صاحب فكرة الاعلان

عمركش وقفت في طابور عيش

عمركش اتزنقت في اتوبيس

عمركش في يوم ملقتش انبوبه تركبها للبوتجاز

و بعدين متزعلش نفسك

ان شاء الله هنقول للمهندسين اللي بيصمموا ابراج وعمارات جديده

يعملو اسانسير مكتوب عليه

للأنابيب فقط ممنوع ركوب التلاجات

----------------------------

خلص الكلام

اشوفكم بخير

مصطفى ابوزيد - والله ما اعرف النهارده كام تسعه

سلام

وحدة أنيقه - تأليفي

السلام عليكم

كل عام أنتم بخير

تقبل الله منكم رمضان و أسعدكم بالعيد

بصراحه وحشني الشعر وتأليفه

قصيده كتبتها في رمضان

بتوضح حالتين اعيشهم

حالة الوحده في انتظار موقف التجنيد و العمل

وما يترتب عليها من تشابه الايام بشكل ممل

و الحاله التانيه انتوا عارفينها من زماااان

اسيبكم تقروا بقى

قدركم بقى استحملو العكـ بتاعي

---------------------------

وحدة أنيقه

الدقائق والساعات والليالي الطويله ..

تشابهها يدهشني .. فالتجدد حادثة مستحيله

أيام بلا أيام .. وتفاصيل بلا تفاصيل

والدقيقة تتبعها الدقيقة .. تزينها الرتابة المقيته

و العقل يرنو للتجدد في محاولة مستميته ..

و يتهادى ..

ويترنح ..

فيسقط في فخاخ الوحدة الانيقه..

بلا رفيقة .. بلا صديقه ..

يظل حائرا ممزقا .. يلعن وحدته العتيقه

يفتش بلهفة عن هذه الرفيقه ..

لعلها تفاجئ الرتابة .. وتظهر كزهرة رقيقه ..

كبيت شعر رائق يزين القصيده ..

كــأميرة مجيده ..

لتبدأ حياته الجدية .. السعيده

و ظل عقله يحلم بالرفيقة .. وفجاة تنبه للحقيقه

فلا ظهرت .. ولا هي أرسلت رسولها

ليبشر ببشراها الجميله

و إستعدت الوحده لفصل آخر .. من فصولها الطويله

--------------------------------------------

بس خلاص

كل عام أنتم بخير

مصطفى أبوزيد - 20 سبتمر 2009

مشاهد متكرره

مشاهد متكرره

(1)

المنبه يدق بعنف

يستيقظ ببطئ و يبحث جاهدا عن مصدر الصوت

يجد هاتفه اخيرا في اقصى يمين السرير .. يبذل جهدا ليطفئه

يحكـ رأسه بعنف .. ويتساءل ما الذي جعله يدق في هذا الوقت ؟

يتذكر اخيرا انه كان يجب ان يستيقظ مبكرا في هذا الصباح

ثم يتساءل بحماقه .. ولم مبكرا ؟

تذكر انه يريد ان يتعود على الاستيقاظ مبكرا

ثم تساءل مرة اخرى .. ولم ايضا ؟

لم يجد سببا واضحا

.

عاد ليخلد في نومه السابق

(2)

أشعة الشمس تغازل عينيه

يحرك رأسه في كل الاتجاهات بيأس ليتفادها

يفشل لأنها غمرت الغرفه كلها

حينها استيقظ كعادته في منتصف اليوم

يتقلب في سريره كسلا

مر وقت لم يدركـ قيمته

منذ فتره لم يعد يعير الوقت اهتماما كافيا

قرر اخيرا ان يبدأ يومه المكرر

كوب الشاي المر

هو لا يذكر متى بدأ يحتسي الشاي فقير السكر

و لا يجد سببا مرضيا لهذا

مؤكد انه ليس بخيلا

ولكنه اعتاد على طعمه المر

انتهى الكوب .. قرر كالعاده يتصفح الانترنت

و كالعاده مشاكل في الاتصال

يتصل بمزود الخدمه .. يتساءل بضيق عن سبب الانقطاع

يمنع نفسه من توجيه سبابا لمحدثه

اعتذار مكرر غير مفهوم من الرجل يتعهد فيه بعدم تكرر المشكله المتكرره

يتصفح المواقع المعتاده

لا جديد .. لا مفيد

الايميل .. من ؟

نفس الاحاديث الممله المتكرره

يفتح مدونته .. لا يجد جديدا ليكتبه

يعود ليقرأ مواضيعه السابقه

يتذكر هذه الايام الماضيه

يستشيط غضبا

لقد عاد الانترنت للإنقطاع

يوجه سبابا غير مفهوم بصوت خافت

يغلق الكمبيوتر

يتثائب .. يبحث عن سريره

(3)

كم الساعه ؟ .. لا يهمـ لم يعد يهتم

يتمدد على سريره

ينظر الى مروحة السقف التي تلف مسرعه دون ملل

يتذكر هذه الايام الماضيه

يبتسم .. تنزل دمعه

ربما يرتفع صوته بالضحك غير عابئ بمن يجلس في البيت

فقط هو يتذكر الماضي

يتقلب في ملل .. يزفر في ضيق

ينظر في ساعته

ما الذي يهمه في الوقت ؟

يبدوا انه ينتظر موعد مباراة فريقه المفضل

ما زال يتبقى وقتا على البدايه

يتقلب .. يتثاءب

.

ينتظر في ملل

(4)

اخيرا انطلقت الصافره لتعلن بداية المباراه

يشعر ببعض الإثاره

سيطره من فريقه

يشجع بحراره

.

ربما هي تسعون دقيقه رائعه في يومه

يوجه بعض السباب بعصبيه للاعبين

المدرب والحكم لم يسلما من الانتقادات

يتمنى لو كان في الملعب ليحرز هذه الفرصه التي أهدرها المهاجم

تنتهي المباراه

خيبة أمل .. !

خسر فريقه مجددا بعد اخطاء التحكيم

وسوء الحظ .. وعدم التوفيق

كانو يستحقوا الفوز ولكن خسروا

تابع نتائج المباريات الاخرى

كل الفرق التي تمنى فوزها خسرت

.

خيبة أمل .. !

(5)

يفتح الايميل

يكلم احدهم

نفس السؤال المكرر

لماذا لا تبحث عن عمل؟

نفس الاجابه الروتينيه

انتظر الموقف من التجنيد

انقطاع متجدد للانترنت

سباب طويل

تثائب

سرير

تقلب

ملل

النعاس يغلبه

نفس الصوت العنيف

تبا لهذا الهاتف اللعين .. لقد نسي الغاء التنبيه

اغلقه بضيق

ثم نام و انتظر الشمس لتوقظه

--------------------------------------------------------------------

مصطفى أبوزيد - 13 سبتمبر 2009

إمسكـ لسانكـ

السلام عليكم ورحمة الله وبركاته

كيف احوالكم مع رمضان

في البدايه حب أعتذر للجميع عن تأخرنا في نزول الموضوع ده

المفروض ايووشه كانت هتنزله لكن انا بالنيابه عنها بأعتذر لأن هيا منشغله شويه وعندها ظروف

و بإذن الله نكمل هنا حملتنا مضيعش صيامكـ

النهارده بإذن الله هنتكلم عن سبب من اهم اسباب تضييع الصيام

والبوست ده له اهميه كبيره جدا لان السبب ده زي ما هو بيضيع الصيام

هو واحد من اهم الاسباب و اخطرها ان الانسان يقع عليه عذاب الله في النار والعياذ بالله

طبعا اكيد عرفتو من العنوان

إمسكـ لسانك

اللسان يا جماعه من اخطر اعداء الانسان سواء كنا في رمضان او غير رمضان

بإختصار وقوعك بلسانك في معصيه في نهار رمضان ينقص من اجر صيامك بلا شك

فالصيام كما اتفقنا ايضا هو صيام الجوارح

يعني لما تشتم واحد او تكذب او تغتاب اي حد او تقع في النميمه او تتكلم بكلام محرم زي الغناء وما شابه

كل ده ينقص من صيامك واجره

النبي صلى الله عليه وسلم بيقول لسيدنا معاذ " كف عليكـ هذا " - يقصد لسانه - فيقول معاذ

" يا رسول الله , إنا لمؤاخذون بما نتكلم به ؟ "

فقال النبي " ثكلتك أمك يا معاذ ، وهل يكب الناس في النار على وجوههم الا حصائد ألسنتهم "

شوفت بقى قول النبي ولو ركزت في كلمة حصائد

يعني ممكن ما تقولش كلمة كفر لكن مجموع ما وقعت به من اخطاء بلسانك

يكبك في النار على وجهك والعياذ بالله

بمعنى انك ما تستهونش بكلمة بتقولها لان كلمه على كلمه تصير الذنوب كفيله بالقائك في النار

والنبي يقول ايضا " إن الرجل ليتكلم بالكلمه من سخط الله لا يلقي لها بالا

تهوي به في النار سبعين خريفا "

شوفت جملة لا يلقي لها بالا ؟

يعني احنا نقول كلمة مفكرينها عاديه وسهله ومش ذنب وهي كلمة ممكن تهوي بينا في النار سبعين سنه

كلمه واحده

فما بالك بالغيبه والنميمه والكذب وشهادة الزور والغناء والكلام المحرم

والشتائم والكلام فيما لا يعنيك

كلنا عايزين نضمن الجنه والنبي صلى الله عليه وسلم وعدنا بأنه يضمن لنا الجنا لكن بشرط

يقول النبي في الحديث الشريف " من يضمن لي ما بين لحييه وما بين رجليه أضمن له الجنه "

يقصد اللسان والفرج بألا نقع بهما في المعصيه

لو نضمن دول فإن النبي قد ضمن لنا الجنه

والاحاديث كثيره جدا في التحذير من افات اللسان

فبلاش نضيع اجر صيامنا بزلة لسان

بدل ما تقع في المعصيه بلسانك في نهار رمضان

الافضل انك تشغله باذكر و القرءآن والعمل الصالح

إمسك لسانك ومضيعش صيامك

و بعد رمضان امسك لسانك برضه لان رب رمضان هو رب الشهور كلها

في موضوع في كتاب مختصر منهاج القاصدين إسمه آفات اللسان

الموضوع فيه فايده عظيمه وشرح وافي لآفات اللسان لازم تطلع عليه

من هنـــــــــا

وهنا والله أذكر نفسي قبلكم

" وما أبرئ نفسي إن النفس لأمارة بالسوء "

جزاكم الله خيرا وتقبل صيامكم وقيامكم

و إنتظروا البوست القادم هنا أيضا ان شاء الله

والسلام عليكم

مصطفى أبوزيد - 28أغسطس 2009

مضيعش صيامك .. كفايه أكل و إرحم نفسك

السلام عليكم

كل سنه أنتم طيبين

لسه معاكو في حملة مضيعش صيامك

هنا و في مدونة تخاريف وأحاسيس أيوووشه

النهارده هنتكلم عن عاده سيئه جدا

بتحصل في رمضان

وهي الإسراف في الأكل

و الحقيقه الإسراف في الأكل في رمضان بيوقعنا في عدة أخطاء

أولها الخروج عن الاهداف الحقيقيه للصيام

و من اهمها الزهد و تهذيب النفس و الحد من الشهوات

و في ناس عندها شهوة الأكل

يفضل ماسك نفسه النهار كله ويجي عند الفطار

ويطلق العنان لشهوته ويقعد ياكل لحد أذان العشاء

طبعا الأكل مش حرام .. كل براحتك

بس متنساش الهدف الأساسي من الصيام

الخطأ التاني إن الاسراف في الطعام بتكون نتيجته إسراف في المال

والإسراف الزياده و المبالغ في المال أمر لا يحبه الله

" إن المبذرين كانوا إخوانا للشياطين "

محدش يقدر يلومك إنك توسع على أهل بيتك

لكن لما يكون معدل المصاريف في رمضان خيالي

ويتعدى معدل المصاريف في الايام العاديه بمراحل

لدرجة إن في ناس والله بتقع في الديون من أجل رمضان

لما يحصل كده يبقى في خلل واضح

وعدم فهم لرمضان الحقيقي

رمضان المفروض يغيرنا للأحسن

المشكله التالته و الأهم

إتكلمنا قبل كده إن رمضان فرصه ذهبيه للطاعه

حيث أن الأجر مضاعف

و من أهم العبادات بعد الصيام هي القيام

قيام الليل في رمضان بيتمثل في صلاة التراويح

وأجرها ما شاء الله

لكن تلاقي ناس واقفه خلف الإمام هتموت

مش قادر يوقف على رجله

ونفسه ينام

وقاعد يفكر يا ترى الركعه دي هتخلص إمتى

ويقعد يعذب في نفسه طول الصلاه

إرحم نفسك

أقولكـ السبب

حضرتك قعدت على الفطار وفضلت تاكل لحد ما كنت هتنفجر

نازل أكل .. و شرب

تروح الصلاه كل الدم اللي في مخك بيروح للمعده عشان تهضم

و يقعد مخك يا عيني مسطول عايز ينام

ورجليك توجعك من أول ركعه

صح ولا غلط ؟

ها .. صح ولا غلط ؟

أقولك حاجه محدش قالك ما تاكولش

يا عم كل براحتك بس حرام والله تضيع متعة التراويح

كل شويه صغيرين في الفطار

وارجع بعد التراويح كل براحتك

خد بالك النبي بيقول

" ما ملأ إبن آدم وعاءا شر من بطن بحسب ابن ادم لقيمات يقمن صلبه "

يعني كفايه بعض اللقيمات اللي يخلوك تقدر تقف على حيلك

طب لو انت بتحب الاكل تعمل ايه

شوف باقي الحديث بيقول إيه

" فإن كان لا محاله فثلث لطعامه وثلث لشرابه و ثلث لنفسه "

رواه الإمام أحمد

شوفت بقى

ثلث لطعامه

إحنا بنقعد ناكل لحد ما البطن كلها تتملي ونشرب ميه لحد ما نبقى هنموت

تيجي تاخد نفسك ما تلاقيش مكان للنفس

تقع مكانك

بالله عليك لما بتملى بطنك على الاخر بتبقى مكسل تقوم تغسل ايدك ولا لأ ؟

ده انت حتى ممكن تتأخر على صلاة العشاء اللي هيا الفريضه

تجربه شخصيه

والله الفطار ربع أو نص رغيف + تقريبا 10 معالق رز وكفايه كده

قوم وهتلاقي نفسك شبعان

روح التراويح هتلاقي نفسك واقف زي الاسد

ومخك مركز مع الامام

ومش حاسس بتعب ولا حاسس بجوع

لحد الصلاه ما تخلص هيكون الاكل اتهضم

هتروح تلاقي نفسك جعان

كل براحتك يا معلم

بس كده تبقى صليت التراويح بإستمتاع و تدبر

و أجرك يزيد إن شاء الله

ممكن أثناء الفطار تقعد قدام الأكل متقدرش تمسك نفسك

لا لا .. متبقاش ضعيف قدام نفسك

إهزم شهوتك .. فرصه الشيطان مش موجود إنك تصلح نفسك

ونتمنى إننا نطلع من رمضان بتهذيب نفوسنا

جزاكم الله خير

وتقبل الله منا ومنكم الصيام والقيام وصالح الأعمال

وجعل أعمالنا كلها خالصه لوجهه

الموضوع الجاي إن شاء الله عند أيوشه

و السلام عليكم

مصطفى أبوزيد - 23/8/2009

------------