باب النجار مخلع

باب النجار مخلع
الدنيا كلها دلوقتي بقيت ماشيه بالأمثال الشعبيه أي حد عايز يقنعك بحاجه يقولك مثل ومن أشهر الأمثال وان كان يكاد ان يكون حكمه هو المثل اللي بيقولك" باب النجار مخلع" وده الناس بتقولوا لما يكون واحد متخصص في حاجه وبارع فيها رغم انه مش بينفذها بجداره عنده هوه شخصيا بالظبط زي النجار اللي باب بيته مخلع رغم انه نجار
والحاجه المهمه اللي انا اكتشفتها إن المثل ده بيطبق عليا انا وبجداره .....طب إزاي؟؟؟
أقولك يا سيدي:
المفروض أن أنا طالب في كلية هندسه يعني المفروض إني أطلع مهندس ومن بختي ونصيبي إني دخلت قسم ميكانيكا وطبعا الصغير قبل الكبير والقصير قبل الطويل يعرف إن القسم الحليوه ده بيعتمد على الرسم بالدرجه الأولى يعني من الآخر من علامات الطالب المميز في القسم إنه يكون شاطر في الانشاء واتصميم وطبعا الانشاء والتصميم من أسماء الرسم J
طيب انا إيه حكايتي مع المواد دي ... بصراحه حكايه منيله بستين نيله وحكايتي تبدأ مع الرسم من إعدادي يعني اصلا قبل ما أفكر أدخل ميكانيكا طبعا في اعدادي ماده غسمها مبادئ الرسم الهندسي
مبادئ .. تخيل لما تكون انت فاشل في المبادئ أهوه انا كنت فاشل في المبادئ وده على فكره مش غباء مني بس كل الحكايه إني كنت بأزهق من الرسم وبما إني طويل كان ظهري بيوجعني من الانحناء ع اللوحه فكنت أكبر دماغي
اعلى درجه جبتها في الرسم في إعدادي 63 من 100 وطبعا كان شيء متوقع اني أشيل الماده ودخلت أولى ميكانيكا ومعايا رسم إعدادي
من أصعب المواد اللي في أولى هي إنشاء الماكينات وده من وجهة نظري بإختصار كده وبدون تطويل أنا شلت الانشاء بتاع أولى بجداره وطبعا امتحنت الرسم في التخلف وشلته برضه يعني كده والحمد لله رحت سنه تانيه ومعايا رسم وانشاء وفي سنه تانيه طبعا في ماده جميله اسمها تصميم الماكينات
أعلى درجه في التصميم كانت 20 من 50 يعني نقصت 30 درجه والامتحان اللي بعده جبت 5 من 100
وانتهى الترم الاول كالعاده باني شلت التصميم
والغريب اني ماكنتش متضايق ودخلت الترم التاني ومعايا رسم وانشاء وتصميم وطبعا التلاته ممتدين يعني هامتحنهم في آخر التيرم وكنت لو نزلت في التلاته كنت هأعيد السنه عليهم وكانت هتبقى فضيحه
في حكمه بتقولك "إذا إشتد ظلام الليل فقد أوشك الفجر"
أو بيت الشعر اللي بيقول:
"ضاقت ولما إستحكمت حلقاتها فرجت وقد ظننت أنها لا تفرجَ"
لو سألت عيل صغير ماشي في الشارع وقلتله واحد شايل رسم وانشاء وتصميم ايه رايك فيه؟
هيتف على وشك ويقولك باب النجار مخلع وهيقولك ده هيسقط يعني هيسقط
لكن الغريب اني دخلت الامتحانات الثلاثه ومحلتش كالعاده والمفاجأه إني نجحت في التلاته وكان ده رقم قياسي محدش حققه قبلي في القسم!!!!؟
مكنتش مصدق إلا لما شفت النتيجه بعيني
شوفتوا بقى إزاي باب النجار مخلع ؟؟
و بمناسبة الماساه بتاعتي أنا ألفت أغنيه ع الرسم على أغنية عمرو أبو دياب اللي إسمها "أيوه أنا عارف"

يارب تعجبكم

أيوه أنا عارف إن أنا شلت الرسم كتييير

أصل حكايتي معاه دي حكاية نحس كبييير
ده أنا من يوم ما دخلت القسم منيش مرتاح

وأرتاح ليه وستاف الرسم ماليني جراح

مش هتكلم ع اللي انا شوفته مع المعيدين

شرح كويس بس الحل هجيبه منين

ويا الرسم أنا شلت إنشاء وكمان تصميم

مين يستاهل بعد الرسم أشيله سنين

ده أنا من يوم ما دخلت القسم منيش مرتاح

وأرتاح ليه وستاف الرسم ماليني جراح

كل ما أقول أنا همسك نفسي وهبقى تمااام

وأبطل نت وأدح وأروح القاعه كماان
وآخد بالي عشان مغلطش في أي سؤال

وآخر التيرم أبص ألاقي الرسم إتشاااال

ده أنا من يوم ما دخلت القسم منيش مرتاح

وأرتاح ليه وستاف الرسم ماليني جراح
أيوه أنا عارف إن أنا شلت الرسم كتييير

أصل حكايتي معاه دي حكاية نحس كبييير

تجري مفاوضات سريه مع عمرو ابودياب علشان يغني الاغنيه الجديده بس هو مزرجن حبتين واول ما تتغنى هتتحط هنا على طوووول
بس خلاص
وكتبه
مصطفى محمد أبوزيد
ظهر الأربعاء 14/5/2008
حامدا الله تعالى ومصليا على نبينا محمد – صلى الله عليه وسلم-
Z_elhafy@yahoo.com