مهندسه ... ولكن

بسم الله الرحمن الرحيم

أعزائي المشاهدين

مصطفى أبوزيد يحييكم من مسقط رأسه ديروط

صلو ع النبي يا رجاله

صلو ع النبي يا بنات

والله انتو اتحسدتوا

الموضوع اللي فات بتاع ميكانيكا بتاعتنا مش بتاعتكم

ببساطة شديده

أنا كنت بعمل مقارنه بين أوائل الدفعات السلبيين اللي ملهمش في العملي

وبين الطلبه العاديين اللي ليهم في العملي

الكلام ده خاص فقط بميكانيكا أسيوط

معملتش مقارنه بين اولاد ولا بنات

الموضوع فجأه بدون مقدمات اتقلب حمله قوميه للدفاع عن المرأه

وسط هجوم شديد من الولاد ع البنات

والبنات مسكتوش قامت الزائره اللي بتوقع بإسم المهندسههههههه

بالرد المفصل علينا واحد واحد وشنت هجوم ع الاولاد

وإتهمتني انا شخصيا إني ولعتها

ده أنا غلبان يا شيخه

------

صلو ع النبي تاني

وهدوا اعصابكم

لمون هنا يا بني للباشمهندسه

وهات شاي للرجاله

مالكم بس قلبتوا الموضوع ولاد وبنات

انا مكنش قصدي كده خالص

فهمتوا يارجاله ؟

فهمت يا شبوره انت ومحمد جابر وخليفه ؟

فهمتو يا بنات

فهمتي يا باشمهندسه انتي والفراشه

------------------------------------

لفت نظري بقى شيء مهم وانتوا اللي فتح عنيا ع الموضوع ده

رغم ان نظري ضعيف

ايه الأقسام اللي تنفع في هندسه للبنات ؟

ومفيش واحده تقوللي كله ينفع

وما اسمعش واد يقول البنات ملهمش هندسه

-----

بصوا بقى

بالنسبه للبنات انا عايز اقول حاجه

المرأه ملكة متوجه والنساء شقائق الرجال

واللي بيقول المرأه نصف المجتمع ده غلطان

لأ .. المرأه الصالحه هي كل المجتمع

واللي بيميز المرأه هو أنوثتها ومشاعرها وحياءها وطيبتها

وده اللي بيخلي الرجل محتاج للمرأه في حياته

مين عندها انوثه وطيبه وحنان ومشاعر وتقف في ورشه بالساعات

وتزعق في عمال وتتحمل ضغوط الشغل لمهندس الميكانيكا مثلا

مين البنت الهاديه الاموره اللي هتشتغل مهندسه مدنيه

وتقف في موقع تحت الشمس وسط العمال والرمل والزلط

وتتعامل مع مقاولين وكذا وكذا

انا شخصيا مش هاكون فخور لو زوجتي بتشتغل مهندسة ميكانيكا او مهندسه مدني

لأنها هترجع م الشغل زيي .. نفس الضيق والضغوط والمشاكل

ساعتها هأكون مجوز واحد صاحبي

اما البنت لو مهندسه معماريه

يا سلااام يا جدعان

شوف هتشتغل ايه

التكييف شغال .. قاعده ع الكمبيوتر

مشغله حاجه تسمعها .. جنبها كوباية عصير فراوله

وبترسم ع الكمبيوتر

الله عليكي

مهندسه معماريه فعلا

مش زيت وشحم ورمل وزلط

ده انا لو وقفت ساعتين في الشمس هيغمى عليا

ليه دايما البنات بتصر انها تكون في مكان مش مكانها ؟

ليه عايزه تكوني زي الرجاله ؟

لما بتقولو البنت مش كمالة عدد ده مش معناه

انكم تعملو كل حاجه الرجاله بيعملوها

طب ما تدخلو الجيش احسن

ليه عايزه تتنازلي عن عرشك.. ليه عايزه تشيلي التاج من على راسك؟؟

المجتمع محتاج طبيبه مسلمه شاطره

علشان اخواتنا يكشفوا عندها بدل ما تكشف عند راجل

محتاجين معلمات حنينين يقدروا يعلموا الولاد الصغيرين في المدارس

بدل المدرسين الرجاله اللي بيضربوا الأطفال بالشلاليت

محتاجين ممرضه حنينه تكون فعلا ملاك رحمه مش ممرض حيوان بيضرب العيانيين

المجتمع مش محتاج مهندسه ميكانيكا ولا مهندسه مدني تقف طول النهار في الشمس

هتبقوا كل المجتمع لو أديتوا رسالتكم الحقيقيه

ليه عايزه تعملي دور مش دورك ؟

ليه عايزه تبقي زي الرجاله ؟

خلي كل هدفك ان أسرتك تكون اسره صح

إختيارك لزوجك وتربيتك السليمه لأبنائك هيا أسمى هدف

دورك أهم دور في المجتمع

بس اعرفي دورك الأساسي ونفذيه

أنتي اللي بتصنعي الرجال الحقيقيين

عايزه تبقي مهندسه اوكي

بس مهندسه معماريه

مهندسة كمبيوتر

المجال اللي يحفظ لك انوثتك مش اللي يحولك بالتدريج لحد ما تبقي راجل

أنا خلصت كلامي

الناس اللي هتعلق بقى

من فضلكم بلاش استفزاز

اللي عايز يقول رأيه يتفضل

لكن اي هجوم من الولاد ع البنات دون وجه حق وبتعمد وهكذا من البنات ع الولاد

هأضطر امسح التعليق

وتذكر قبل ان تعلق قول الله تعالى

" ما يلفظ من قول إلا لديه رقيب عتيد "

-----

مصطفى أبوزيد- 16 أبريل 2009

حامدا الله تعالى ومصليا على نبينا محمد صلى الله عليه وسلم

Comments

23 Comments

23 التعليقات:

غير معرف يقول...: يابنى مين اللى قالك ان هندسه ميكانيكا ماتنفعش للبنات ...مش فاهم انا بصراحة
وقسم تحكم ماينفعش يعنى للبنات
وقسم مدنى مين اللى فهمك انه كله رمل و زلط
مش فيه ناس بتوع تشطيب
وفيه ناس تانيه بتوع ادارات المشروعات اللى بيستلمو الشغل
معظم المهندسين دول فى الادارات الحكوميه بيكونو بنات و بيشتغلو شغل كويس جدا
الفكره بس فى مجال الشغل مش التخصص يا ناصح
انا كان معايا على الحفار marine , onshore مهندسات و فنيات كمان ...كانو من جنسيات مختلفه
دلوقتى فى امريكا فى هوجه بين البنات و الستات انهم يتعملو اللحام ...لو مش مصدقنى اتفرج على monster garage وهتلاقى غالبا بتاع اللحام بيكون واحده ست
والسلام ختام
الكومندان; ١٦/٤/٠٩ ٣:٥٢ م
Arsenal Way يقول...: الكومندان
-----------
أنا حاسس انك اسلام حسن

ازيك يا باشا منورنا والله في المدونه
احنا مش في امريكا يا اسلام
انا شخصيا ما اتجوزش واحده بتقف على حفار

هههههههههههههه; ١٦/٤/٠٩ ٣:٥٩ م
غير معرف يقول...: ana a7mad diaa w elsra7a el banat momken teshta3'l ay 7aga bas law heya elly bgad 3ayza teshta3'lha ya3ny be2eradetha , ana maslan kol elbanat elly a3rafhom "2rayeb we zamail el madrasa" kolhom kano 3ayzeen yed5olo medicine school fe elasas bas elly 7azaha we7esh gabet handasa we da5aletha ba3d keda betseeb el 3amalia lel tasahil ,el mohem el7ekaya men elaoel mashya 5alat ,amma eza konna 3ayezeen nshof el banat ted5ol 2esm eh ,ana ba2a shayef ennohm ye5osho ay 7aga yedmano en leehm sho3'l fe el a5er; ١٦/٤/٠٩ ١٠:٤٢ م
Eng.MBM يقول...: رااااااااااااااااااائع واحسنت
Eng.MBM; ١٦/٤/٠٩ ١١:٥٢ م
غير معرف يقول...: والله انتم تعبين نفسكم علي الفاضي اللي عاوزه تشتغل تشتغل وللي مش عاوزه خلاص قال ايه ان الشغل
مقطع بعضه حوش الشغل; ١٧/٤/٠٩ ١٢:٥١ ص
غير معرف يقول...: احنا لقينا غير ميكانيكا ومدخلناش مش هما اللي دخلونا; ١٧/٤/٠٩ ١٢:٥٨ ص
غير معرف يقول...: مبروك يا بشمهندس ع الموضوع
وانا معملتش هجوم ف الموضوع اللى عدى ولا حاجه بس لقيت اغلب الشباب جم شويه ع المراه وحبيت ادافع مش اكتر واتمنى ان ميكنش حد زعل منى
بس ف مشكله صغيره ف الموضوع دا
انا مش بحب عصير الفراوله اعمل ايه
ههههه
تحياتى

المهندسهههههههههه; ١٧/٤/٠٩ ٧:٠٣ م
غير معرف يقول...: كلامك مظبوط ميه بالمية .. احنا قلنا اقسام معينة ووظائف معينة متنفعش ليهم احنا كنا بنهاجم البنات المقتنعة انها تعرف كل حاجة واي حاجة.. لازم البنت تعرف امكانياتها وقدراتها مش كل حاجة يعوزوها يرشقوا فيها من غير ما يعرفوا حاجة
G_48; ١٧/٤/٠٩ ٩:٢٨ م
غير معرف يقول...: Peace upon u all,
Am intending to illuastrate something abozied forgot. I thank to work practical is experience but you surly need your basic academic knowledge, that enables you not to be just an operator.
I think there is something more important than that topic: it is how to market our graduates, how to make a net that make us aware about markets and their requirements.
How to keep in touch for under gradute students, gradutes, and teaching staff for better work better futurre.
Yours sincerely
HH; ١٨/٤/٠٩ ١١:٤٩ ص
الفراشه يقول...: كده تمام يا باشمهندس
اهم حاجه ان البنت تكون عارفه قدرتها ايه; ١٨/٤/٠٩ ٣:٤٢ م
Banna يقول...: ازيك يا واد يا درش ...
أنا معاك ومش معاك في نفس ذات ضبق الوقت

بص يا ريس ... اللي بيميز إنسان عن إنسان في المجالات المختلفة هوه شخصيته و موهبته

إنت مثلاً ... تنفع كاتب ساخر ممتاز و أنا أبصملك بالعشره و ده لأنك مميز بموهبه إدهالك ربنا سبحانه و تعالى مش موجوده عند كتير من الناس

و أنا شايف إن لو بنت ربنا إداها الموهبه دي هتكون كاتبه رائعه زيك كده

وزي ما الكتابة مجال .. الميكانيكا مجال و مش هتفرق كتير موهبه في الأدب الساخر و موهبة في حل مسائل ميكانيكا الألات

يعني لو ربنا ميز واحده في مجال ميكانيكي معين و بتجيب تقدير كويس ... نقولها لأ انتي ملكيش ميكانيكا و تقعدي في بيتكم علشان توفري فرصه عمل لحد جايب ((مقبول )) و مقضيها.

بالزمة ده كلام ناس عاقلين

الكلام ده كان زمان لكن دلوقتي الدنيا بتتغير يا درش و مفيش فرق بين واحده مهندسة في مصر و مهندسة في أمريكا زي ما بتقول .. أي نعم بتاعت أمريكا ممكن تكون أحسن بس ادينا بنحاول نواكب العصر و مش عاوزين نرجع لورا

أنا عن نفسي مش هتجوز غير مهندسة ... و مش هكمل يا درش علشان انت عارف الباقي

خلص الكلام ... سلام; ١٨/٤/٠٩ ٨:٠٨ م
غير معرف يقول...: الله يفتح عليك يأبو زيد
أخوك:ابو جابر; ٢٠/٤/٠٩ ٢:١٥ م
غير معرف يقول...: ما اقدرش اقول اكتر من اللي قلته يابوزيد
كفيت ووفيت.... وانجزت وأوجزت
Eng.Slm; ٢١/٤/٠٩ ٣:٤٣ م
DarkEagle يقول...: بلاش الحركات القرعه دى يا مصطفى
ونظام يشتمنى فى شارع ويصالحنى فى جحر
انت بعد ما طلعت الكتاكيت الفطسانه فيهم
جى تعملى عم قاسم امين هنا

بجد معاك حق
بس برضه العمليه فى الاول وفى الاخر
بترجع للشخص نفسه
مهما كان راجل او ست

وبخصوص كلام اسلام حسن
ياد بطل الحركات دى
مش انت صاحب فكره
البيت للبنت والبنت للبيت
يا ربى اكيد البنت الاخيره حلقتلك
بهزر اوعى تزعل
واحشنى يا مان والله

وفى الاخر انا عايز اقول حاجه
انا لما هاجى اتجوز
هدور على واحده
تكون ملكه على قلبى وعقلى وبيتى
مش هتجوز صنايعى معايا فى البيت
يخرب بيةتكم ملتوا البلد

وتقبلوا مرورى
:); ٢٥/٤/٠٩ ١:٢٩ ص
DOCOO يقول...: من وسط كلامك كله يادرش معجبنيش غير حته متدخلو الجيش احسن وعشان كده قررت بعد اذنك انى اكتب جزء من قصه نوسه فى الجيش هنا. لها باقيه لو عجبتكو انشرها .
قصه هزليه منقوله.
نوسه فى الجيش
المقدمه:
فى دولة فسكونيا العظمى وقفت النائبة المحترمة رئيسة حزب ( المرأة القوية) فى البرلمان وهى تناقش ضرورة أصدار قانون يسمح بتشكيل قوات نظامية من السيدات والبنات بعد أن خسرت الدولة نسبة كبيرة من الشباب والرجال فى حروبها المتتالية مع أعدائها
وبعد مناقشات عديدة بين المعارضة والحكومة تمت الموافقة على فرض التجنيد الأجبارى على الأناث بنفس شروط الرجال ..وأنشاء كليات عسكرية للبنات أسوة بالذكور لأمداد الجيش الجديد بالقيادات النسائية ..وتشكيل وحدات مستقلة مقاتله جميع هياكلها من الأناث فى القوات البريه والبحريه والجويه ..التخلى عن نصف معسكرات الجيش الرجالى للجيش الحريمى الناشئ
وبعد عشر سنوات من تنفيذ هذا القرار تكون جيش من الأناث على أعلى مستوى من التدريب والتسليح وأصبحت الدولة تعتمد عليه فى تنفيذ مخططاتها العسكريه
والدفاع عن أراضيها.. وقد أبلى هذا الجيش الناشئ بلاءا حسنا فى ميادين القتال ومنح العديد من نسائه الأوسمة والنياشين والأنواط العسكرية
ولكن حواء التى خلقها الله لتكون مصدر للحب والحنان قد تحولت لمخلوق مخيف بعد أن أمتلكت مفاتيح القوة وزمام السلطة

نوسه فى الكلية العسكرية

ظهرت نتيجة الثانويه العامة وفتح مكتب التنسيق أبوابه والكل يحلم بكلية من كليات القمة ألا نوسه فقد أخذتها من أصيرها وتوجهت إلى مكتب تنسيق الكليات العسكريه وقامت بتقديم أوراقها بكل ثقه ومعها صديقتها نيفين
أيه يانوسه الزحام ده كله بنات البلد كلها جاية تقدم فى الكليات العسكرية يادى النصيبه دا كل أللى عايزينه 500 بنت بس !!
عارفه يابت يانيفين حتبقى العمليه مجزره علشان يصفوا الأعداد الكبيرة ..يعنى حنتعصر عصر..أدعى من قلبك أن يارب نقبل ..ياااارب
يتم أجراء الكشف الطبى على الأعداد المتقدمه وتنجح نوسه ونيفين فى الكشوفات
وينتقلوا إلى المراحل التاليه وهى الأختبارات النفسيه والرياضيه وتجتازاها بنجاح ويتبقى كشف الهيئه للقبول النهائى
نوسه : شدى جسمك كده يا نيفين وأقرأى الفاتحة والمعوذتين قبل ما تدخلى
نيفين : بيقولوا أن رئيسة اللجنة اللواء سعدية الدوكش ربنا يستر ..عليها بصة يابت يانوسة تخليكى تلبدى فى جلدك
المهم ماتلوكيش معاها وخلى عينك باصة لفوق فى السقف وحسك عينك تيجى عينك فى عينها والجواب على قد السؤال فاهمه
أيوة ياستى أمك مرسياكى على كل حاجة ماهو أنتى بنت المقدم حلوتهم حد قدك
الوليه دى أللى أسمها سعديه الدوكش ماتعرفش أبوها ربنا يستر
ينادى على أسم نوسه أولا للدخول أمام لجنة كشف الهيئة فتجد نفسها أمام مجموعة من اللواءات بالزى الرسمى وكلهن من السيدات وتتوسطهم اللواء سعدية الدوكش وهى تنظر إليها بتمعن وقد رفعت عينيها خارج أطار النظارة وفاجئتها بصوت أجش كأنه نعيق الضفادع
أنت نوسه حموده أبو جبل
أيوه يا فندم .أمك تبقى المقدم/ حلوتهم أبو سريع .أيوه يافندم
أنتى مجموعك فى الثانوية العامة يدخلك كليات الطب والصيدله أيه أللى جابك
علشان بحب الجيش يا فندم
كويس ..تعرفى تكسرى العصايه دى ياشاطرة بسيف يد أجرب يافندم
مفيش حاجة أسمها أجرب ياننوسه ..يا تقولى أه.. ياتقولى لأ
تتقدم نوسه بثبات وتنزل بعزم مافيها لتكسر العصاية نصفين وتعود لمكانها وهى تنظر فى السقف
كويس يانوسه حناخدك فى قوات الصاعقة أتفضلى لما نبعت لك تبقى تيجى أللى بعده ..نيفين حسن فتله
أنت نيفين حسن فتله
حسن قله يا فندم
قله ولا فتله أرسى على حل
قله ولا فتله أللى تشوفيه يافندم. خلاص خلاص خليها قلة مش حيفرق أنتى مقدمه رغبتك للألتحاق بالكليه البحريه ومابتعرفيش تعومى وساقطه فى السباحة وده شرط أساسى للقبول فى البحريه تدخلى القوات البريه
أنا عايز أأقول أنى بعرف أعوم وكانت فيه ظروف منعتنى من تكملة الحمام
أأقدر أعرف أيه الظروف دى
الزغوطه
أيه يا ختى زغوطه
أيوه يا فندم الزغوطه ده أنا بنت عويمه نمره واحد ..أللى حصل أنى ضربت سندوتشين فول قبل ما نزل الحمام وأمى الله يسامحها حطتت فيهم قرن فلفل ملهلب ما تقوليش لعدوك عليه ولع بوئ وشفايفى ومكانش معايا ميه نادوا على أسمى علشان أعوم ما صدقت نطيت فى الحمام وقعدت أقربع فى الميه وأنا بعوم ما حستش بنفسى ألا وهم مطلعنى سطيحه بعد مارجعت كل أللى فى بطنى فسقطونى فى السباحة وأنا مستعده أمتحن تانى دلوقتى لو حبيتى .
doco; ١٣/٦/٠٩ ٦:٠٤ ص
طالبة ميكانيكا أسيوط يقول...: السلام عليكم
انا احكيلكم قصة دخولى قسم ميكانيكا
انا بحب مجال معين مجال بحثى الجانب العملى فيه قليل الى حد ما و لا يمس انوثة المرأة بشئ
لكن الظروف منعتنى ان اكمل فيه وبكره مدنى وعمارة بشكل غير عادى وعمرى ماأتخيل ان اخش عمارة وبحبش كهربا وكهربابعيدة كل البعد عن حلمى والمجال الى انا عايزاه
مبقاش قدامى غير مبكانيكا وفعلا من اكبر نعم ربنا عليا انى دخلت ميكانيكا
ولا فى عمرى فى يوم هشتغل فى ورشة ووسط العمال وازعق فيهم الا لو اضرتنى الظروف زى مثلا اكتساب الرزق وربنا لايحوجنى للشغل ده
لو اخت حضرتك مكانى هل هترغمها انها تدخل حاجة مش حبها على فكرة البنت تعرف كويس ازاى تصون أنوثتها حتى لوشغالة فى ورشة
ياجماعة اى واحدة داخلة ميكانيكا برغبتها ملقتش غيرها فمينفعش نعطل قدرتها ممكن تكون فى ميكانيكا احسن من اى حاجة تانى
وحتى لو مش برغبتها نحاول نشجعها انها تكون حاجة مش نقلل همتهها ونعقدها وبعدين انتوا عارفين كويس ان ميكانيكا مش زيت وشحم وبس وانها مجالات بحثية وتطبيقية عديدة ام الى برة يقول ايه
انا عن نفسى اثناء شغلى فى المشاريع الدراسية شفت شغل كتير للمهندس الميكانيكى لو عايزين تعرفوا اكتر روحوا للسمالوطى بتاع الأجهزة الطبية ومراكز الأجهزة التعويضيةزى مركز القدس عند مبتى عصام الشريف وانتوا هتسمعوا منه الكلام ده واكيد حضراتكم عارفين

تقبلوا مرورى وآسفة على الإطالة; ١٨/٨/٠٩ ٨:١٧ م
غير معرف يقول...: المرأة في سن20 ككرة القدم، يركض خلفها 22رجل
وفي سن30 ككرة السلة، يركض خلفها10رجال
وفي سن40 ككرة البيسبول، يركض خلفها رجل واحد

وفي سن50 ككرة التنس، كل رجل يرميها للآخر
أما في سن 60 ككرة الغولف، تقذف إلى الحفرة; ١٧/٩/٠٩ ٢:٣٤ ص
غير معرف يقول...: تخيل الدنيا بدون نساء
1 الأسواق هادية
2 كساد اقتصادى
3 شوارع فاضية
4 شركات الاتصالات تخسر
5 سوق السيارات ينكسر
6 الشيطان ماعنده شغل
7 دواء الضغط ماله لزوم
8 كل الرجال يدخلون الجنة .!!; ١٧/٩/٠٩ ٢:٣٧ ص
غير معرف يقول...: ياجماعة محدش يزعل بس حبيت اغير الجو اللي انتو فيه ودي مجرد نكت هبلة مش اكتر وطبعا دا مش صح بس المراة ليها تشتغل بس دا ليه حدود ومحدش يقولي المراة ذي الراجل والكلام الحمضان دا المراة ليها حاجات خاصة اسماها وبلا شك (رعايتها لبيتها واسرتها)وياريت تركز على الوظيفة دي

قال تعالى : {وَلا تَتَمَنَّوْا مَا فَضَّلَ اللَّهُ بِهِ بَعْضَكُمْ عَلَى بَعْضٍ لِلرِّجَالِ نَصِيبٌ مِمَّا اكْتَسَبُوا وَلِلنِّسَاءِ نَصِيبٌ مِمَّا اكْتَسَبْنَ وَاسْأَلُوا اللَّهَ مِنْ فَضْلِهِ إِنَّ اللَّهَ كَانَ بِكُلِّ شَيْءٍ عَلِيماً) (النساء:32)
وياريت الاخوات يفهمو الاية دي
وكفاني بقول الله اختم كلامي
سلاموووووووووووووووووووووووووووووووز
وتقبلو مروري; ١٧/٩/٠٩ ٢:٥٤ ص
غير معرف يقول...: انا في فسم مدنى وشايفه ان في مجال للبنات مثلا زى ادارة مشروعات وبعدين مدنى بيطلع نوعين من المهندسين

مهندس مدنى تصميم ومهندس مدنى تنفيذ
وتصميم دة بيبقي اغلب الشغل في المكاتب يعنى كويس اوى للبنات; ٢/١٠/٠٩ ١:١٠ م
Arsenal Way يقول...: غير معرف ( صاحبة اخر تعليق )

---------------------------
اهلا بيكي يا فندم
طالما حضرتك ادرى بقسمك وان فيه اعمال تنجز في المكاتب ولا تضر بحيائك وانوثتك ودينك و أوقاتها معقوله في الشغل مش ممتده بطول اليوم

فهذا لا يمثل مشكله في وجهة نظري وزيه زي عماره عادي
لكن انا كنت اقصد بكلامي الاعمال الهندسيه الشاقه فعلا والتي تخضع لها اقسام مثل ميكانيكا الذي هو محور النقاش

اشكرك مرورك الأول

تقبلي تحياتي; ٢/١٠/٠٩ ١:٢٣ م
غير معرف يقول...: ومين اللى ادالك الحق تقرر البنات يشتغلوا اية وميشتغلوش اية وعلى فكرة انا مهندسة ميكانيكا وفخورة جدا بكدة وانا مخترتش المجال دة ولا علشان ابقى زى الرجالة ولا تحدى ولا عقدة نقص انا ببساطة اخترت الحاجة اللى بحبها واعتقد ان دة من حقى وعموما ابقى شوفلك واحدة من اداب ولا تجارة ولا اقولك احسن شوف واحدة مش متعلمة خالص علشان تتجوزها يمكن هى دى اللى متحسسكش انها واحد صاحبك; ١/٤/١٠ ١١:٠٨ م
Arsenal Way يقول...: غير معرف ( صاحبة اخر تعليق)

---------------------------

انتي جاية تعلقي بعد سنة من كتابة الموضوع
و الله فيكي الخير
:)

بصي يا باشمهندسة انا حاسس ان حد حكالك ع الموضوع علشان كده داخله تهاجمي

لو قريتي الموضوع تاني بهدوء هتلاحظي اني دافعت عن البنات

انتي فخورة بإنك هتبقى مهندسة ميكانيكا ده شيء كويس

بس بشرط تدي 100 % مجهود في مكانك

الأول طبعا لو لقيتي شغل أصلا

اذا كنتي بتدرسي لسه أحب ابشرك مفيش شغل اصلا في السوق ههههههه

هتحسبيني بأتريق براحتك هتتخرجي و تشوفي بنفسك

اما بقى لو كنتي بتشتغلي فأتمنى انك تدي 100 % مجهود و في نفس الوقت تعملي توازن في اسرتك لما تتجوزي و تخلفي ان شاء الله

ممكن مش هتقتنعي بكلامي ده

بس انا هعذرك برضه و متأكد إنك في يوم هتقولي اني كان عندي حق

بخصوص بقى اني اشوفلي واحده في اداب او تجارة او مش متعلمة علشان اتجوزها

لا عادي انا ممكن اتجوز خريجة ميكانيكا بشرط انها مش تشتغل

ثانيا مالهم بتوع تجارة و اداب لا تسخري من احد لانه ممكن يكون افضل مننا كلنا

ربنا يوفقك على اي حال
و اذا كنتي شيفاني غلطان ادعيلي ربنا يهديني

و في النهاية اختلاف الراي لا يفسد للود اي قضية; ١/٤/١٠ ١١:٥٢ م