خلي بالك .. ! مضيعش صيامك .. ! كفاية مسلسلات

 

خلي بالك .. !

مضيعش صيامك .. !

مش محتاجين نتكلم عن شهر رمضان وفضله لان كلنا عارفين قد إيه الثواب

والأجر مضاعف في شهر رمضان

لكن للاسف معظمنا وأنا أولكم بنفشل إننا نحقق أعلى إستفاده من الشهر

وبنحس في آخر الشهر إننا ما إستمتعناش بالشهر و ماإستفدناش منه قوي

الحقيقه الإستفاده القصوى بتكون بإزدياد الطاعه

لكن إحنا بنفشل أول إختبار وهو الصيام

و مش بنصوم إلا عن الاكل والشرب

لذلك جه في دماغنا فكره بالمشاركه مع مدونة تخاريف وأحاسيس أيوشه

إننا نتكلم عن اهم الاسباب اللي بضيع صيامنا

وتخلينا اخر الشهر نحس اننا معملناش حاجه

تفاصيل أكتر هتلاقوها هنااااك عند أيوشه في مدونتها

______________________

خلونا نبدا بأهم سبب وأهم عامل بيضيع صيامنا

تحت شعار

إسأل مجرب من رمضان اللي فات

طلعت علينا القنوات بالشعار ده علشان تجذبنا لمسلسلاتها

مفيش شك إن المسلسلات عامل اساسي في تضيع الصيام

والناس شاطره بس في مقولة سلي صيامك

لا لا لا خد بالك

إن مشاهدة المسلسلات فيها بلاوي بتضيع الصيام

أول ذنب بنقع فيه هو عدم غض البصر

يعني المسلسلات دي كلها مليانه من الفنانات

فلانه وعلانه وكل واحده فيهم شكلها لما تبصلها كفيل انها تشيلك ذنوب محترمه

وربنا امرنا بغض البصر في كل حال

يبقى آدي أول ذنب

تاني حاجه إنها بتشغل القلب والعقل

بمعنى واحد بيتابع اربع مسلسلات مثلا

كل واحده قصه مختلفه

يقعد مشغول ومتابع وعايز يعرف ايه اللي هيحصل بكره

ده ممكن يكون بيصلي التراويح وبين يدي الله

ومخه يفكر هل معرفش مين هيتقبض عليه في المسلسل

ومستني الساعه 10 تيجي عشان يشوف هيحصل ايه

يبقى تركيزك هيتشتت بدل ما تجمع مجهودك في الطاعه

ثالثا أكيد هتسمع كلام محرم في المسلسل

من صوت اغاني على موسيقى على صوت نساء ومش اي نساء

دي الهام شاهين على يسرا على بلاوي منيله بنيله

إستنى هنا ياعم ؟

كل ده وانت ناسي انك في شهر رمضان

نسيت انه فرصه ذهبيه للطاعه بتيجي مره في السنه

المفروض تنتهز كل دقيقه متاحه ليك في طاعه لأن كله بثوابه

وفرصه يمكن متلحقش رمضان اللي جاي

و طبعا لايخفى عليك إن المسلسلات مضيعه رهيبه للوقت

لانك لو اتفرجت على اربع مسلسلات بس

وده عدد بسيط مقارنة بعدد المسلسلات اللي بيعلن عنه

هتضيع في اليوم 5 ساعات

يعني هتضيع في رمضان كله 150 ساعه

بالله عليك يا اخي لو الـ 150 ساعه دول كانوا موزعين بين القران والصلاه

والذكر والدعوه لله قد إيه الثواب اللي كنت هتحصل عليه

وبالله عليك إيه فايدة الصيام والاجر اللي هتاخده في النهار

وإنت أول ما بتفطر بتاخد سيئات

لو فكرت بس بعقلك 5 دقايق هتكتشف إن المسلسلات فعلا عدو رهيب

وطبعا اضف عليها الأفلام والأغاني و البرامج التعبانه اللي بتيجي

جرب كده اثناء المسلسل ما هيبدأ أمسك الريموت

وغير القناه وهات اي قناة من القنوات الدينيه

وشوف برامجها و إسمع مشايخنا حفظهم الله وبارك فيهم بيقولوا ايه

ساعتها بس هتحس بالفرق وهتعرف الفرق بين الكلام الطيب والكلام الخبيث

وهتعرف إن رمضان مش صيام عن اكل وشرب وشهوة بس

لاااا الصيام ايضا صيام الجوارح

بمعنى انت لو صمت عن الاكل والشرب بس

هيسقط عنك فرض الصيام و تبقى أديته

يعني ربنا مش هيجي يقولك ليه مصمتش لانك انت صمت فعلا

لكن اين الاجر .. أين الثواب

للأسف مش هتلاقي لأنك طول النهار قاعد تشتم وتسمع في افلام ومسلسلات

وبعد الفطار بتشرب سجاير وسهران لحد الفجر قدام التلفزيون

كفايه مسلسلات .. كفايا السنين اللي فاتت ضاعت

يمكن تموت ومتلحقش رمضان اللي جاي

و الله مش هتحس بطعم العيد إلا إذا أديت رمضان صح

بيقولو إسأل مجرب من رمضان اللي فات

قصدهم إسأل واحد كان بيتفرج على مسلسلاتنا

وأنا بقولك إسال مجرب من رمضان اللي فات

بس إسأل واحد كان بيصوم عن الشهوات والشتائم

وبيغض بصره وبيكثر من الطاعات

إسأل واحد كان بيقرا القران وبيصلي لله طول الليل

إسأل واحد كان بيتصدق وبيدعو للخير

ساعتها بس هتعرف الفرق .. وهتعرف المتعه في الصيام

طبعا إنتوا أكيد عارفين الكلام ده كله

لكن إحنا في غفله و أنا أولكم

والكلام ده من باب قول الله تعالى

" فذكر فإن الذكرى تنفع المؤمنين "

أسأل الله إننا نستفيد وأنا أولكم بالكلام ده

و أن يرزقنا الإخلاص في القول والعمل

و أن نخرج من رمضان وقد غفر لنا وأعتقنا من النار

الموضوع الجاي إن شاء الله هتلاقوه في مدونة تخاريف وأحاسيس أيوشه

وهتكون المواضيع بالتبادل هنا وهناك طول الشهر إن شاء الله

لو حسيت إن الموضوع مفيد إدي الرابط للي تعرفهم

جزاكم الله خيرا

ودمتم في أمان الله

مصطفى أبوزيد – 19/8/2009