عارفين .... ؟؟

عارفين ؟

طيب أنا هقولكم طالما إنكم مش عارفين

الأخ اللي بيهز راسه و عامل نفسه عارف .. أحب اقوله انا شايفكـ و أنت مش عارف

و استنى عشان تعرف

بس السؤال اللي بيطرح نفسه .. أقولكم إيه ؟

اه إفتكرت

في البدايه بس عايز أقول شيء مهم جدا

في آخر بوست ليا كان في تعليق من أحد الزوار أمس إتهمني فيه إتهام شنيع

ببساطه كلامه كان بيقولي إني كافر ومنافق و مرتد و كل حاجه وحشه في الدنيا

طبعا أنا كنت مصدوم و انا بقرا التعليق و مش عارف هو كتبه بناءا على إيه

و كنت ناوي أعمل موضوع أرد فيه على كلامه و أدافع عن نفسي

لكن عملا بنصيحة أحد المقربين أنا هفترض حسن النيه

و اقول ربما هو كان عايز يكتب التعليق في مدونه تانيه

وكان فاتح مدونتي معاها و غلط وكتبه عندي

أما بقى يا ابوالشباب لو كنت تقصدني أنا فعلا

فأرجوك أكتب التعليق تاني هنا و أنا ساعتها هرد عليك

بس خليك شجاع و اكتب اسمك برضه

تمام كده ؟

-------------------------

نرجع لموضوعنا

أنا كنت هقولكم إيه ؟

مش عارف ..

عارفين الفكره بتاعت آلة الزمن

الواحد يبقى معاه مكنه يحدد الزمن اللي عايز يروحه ويدوس ع الزرار

يا سلام ع الدلع

[ بيسمع افلام أجنبي كتير ]

تخيلو لو كلنا عندنا فرصه واحده نستخدم فيها الآله دي لمدة يوم

هتختاروا ايه

اولا هتختار تروح ليوم في الماضي و لا ليوم في المستقبل

و اي يوم بالتحديد في الحالتين

أنا شخصيا هروح ليوم في الماضي

لأن مضمنش هلاقي ايه في المستقبل إنما الماضي أنا عارفه

أما تحديدا لأي لحظه فأنا هختار يوم من ايام الثانويه العامه

معقول .. ؟

أيوه دي كانت أحسن ايام

لسبب .. راحة البال .. في أيامها عرفت فعلا يعني ايه راخة بال

يعني لما تنام و في دماغك صفر هموم

هي دي اللحظه اللي انا محتاجها

أنتو بقى هتختاروا إيه

ياريت نشوف آرائكم

---------------------

إيه رأيكم نختم الموضوع على كده لو كنتو زهقانين

خلاص .. هنكمل و اللي زهقان يمشي

عارفين ؟

اه دي غير الاولانيه

انا بقالي اسبوعين مكتبتش بيت شعر

شايف نظرات الشماته في عنيكم

شايفك يا اللي بتضحك شايفك

بس عادي .. نزار قباني قعد 3 سنين مكتبش شعر

بعد ابنه الكبير ما مات .. عارفين بقى رجع يكتب إمتى

لما شاف مراته بلقيس لأول مره قبل ما يتجوزها

أنا هرجع اكتب امتى بقى .., مش عارف

يمكن لما اشوف بلقيس بتاعتي

( وش مطلع لسانه )

أنا شايف واحد فرحان ان مفيش قصايد جديده

أحب أصدمه و تقوله لا متخفش انا عندي مخزون لم ينشر بعد ..

من البوست الجاي هرجع اعذبك تاني

_-------------------------------

طالما إن العمليه قلبت قعدة مصاطب .. أحب اسلم على الباشمهندس أحمد سعد أخويا الكبير و صديقي العزيز

اللي بيحضر الدكتوراه في روسيا .. و اقوله انت وحشتني بشكل لا يطاق

ربنا ييسر أمورك و يرزقك الذريه الصالحه .. وينشر لك الخير أينما كنت

-----------------------------------------------------------

تخيلو في البداية البوست نسيت اسلم عليكم

إزيكم كلكم

عارفين ؟

نفس المخلوق - أول ديسمبر 2009

إضغط هنا لإضافة تعليق

Comments

21 Comments

21 التعليقات:

Arsenal Way يقول...: عارفين

نظرا للمشاكل في اسكربت المدونه انا هعلق اول تعليق كالعاده عشان تعرفو تعلقوا; ١/١٢/٠٩ ٤:٢٠ م
donya يقول...: مساء الخير
خير اللهم اجعله خير ان شاء الله
انا تهت في البوست ده

انا بقي نفسي ارجع يوم واحد بس ارجع فيه ساعه واحده انا مش طماعه لكن الساعه دي هي اللي غيرت حياتي خالص

وكنتي فين يا نو لما انا قلت يييس

تحياتي; ١/١٢/٠٩ ٤:٣٨ م
سامر محمد عرموش يقول...: الاخ الكريم مصطفى دائما تأتي بأمور جديدة الباين انك من محبي افلام الخيال العلمي
عموما لو خيرت حرور الى الماضي وسيكون يوم غزوة بدر لانها من الغزوات التي لها شأن كبير عند المسلمين (طبعا اذا كان هذا ممكن ) اما اذا كان الزمن الذي عشت انا فيه فسأختار يوم من ايام الثانوية
ههههههه مثلك كانت من امتع الايام
ننتظر اشعارك بشغف
تحياتي; ١/١٢/٠٩ ٤:٣٩ م
Maram يقول...: انا دخلت مش عارفه اي حاجه ودلوقتي عرفت ،،،العلم نور بردو...المهم انت ضحكتني اوي علي موضوع حسن النيه وان اللي بعت لك الكومنت ده يكون بعته لحد تاني بجد روحك حلوه ... المهم انت عارف ان بردوا اخر مره كتبت فيها شعر من ٤ سنين ولحد ناو مكتبتش كلمة شعر واحده ...
طيب انت عارف؟؟؟
انك لو دخلت معظم المدونات هتلقيهم كتبين انهم مش عارفين يكتبوا حاجه في البلوج ؟!!
غريبه مش كده !!!!; ١/١٢/٠٩ ٥:٣٠ م
منــار فايد يقول...: في البدايه ومن الاخر للاول
ردا على جملتك المنسيه الاخرانيه إزيكم؟؟
الحمد الله وكويسين
واحسن منك
وعندنا شعر برضو بنكتبه
وعجباني فكره اله الزمن
تصدق بالله اقولك حاجه
(((ماهو الفاضي بيعمل ايه؟؟؟..........)))

لو اله الزمن تقدر تخليني في نفس الزمن اللي عايشاه
ومش عايزه لا اتقدم ولا ارجع خطوه
بس تقدر تمسحلي منه شويه طراطيش كلام
وحجات وحشه معكننه حبتين...؟؟
لو تقدر يبقى انا من دلوقتي هاسلملها دماغي
وتعمل ديليت برراحتها خالص
هتلاقي اللي عايز يتمسح مكانه كبير وواخد مساحه على هارد حياتي وحجم اكبر من اللازم
ومحتاج فرمته ونسخه جديده كماااان

ياااه انا بكتب كلام مكلكع ليه كدا
بس ع فكره
انا النهارده مبسوطه

تحياتي ياباشمهندس; ١/١٢/٠٩ ٦:١١ م
ايوشة يقول...: الة زمن لو هترجعنى ترجعنى ليوم 6_12_2007 تقريبا هو ده التاريخ الصحيح على ما اعتقد كان يوم مش يتنسى من حياتى بجد غير كده مش عايزة اروح ولا اجى
فى انتظار كتاباتك القادمة; ٢/١٢/٠٩ ١٢:٢٦ ص
Sweet Violet يقول...: عااااااااااااااااااااااااااااا
تانى انت فى اول تعليق
طيب اعمل فيك ايه هه هه هه
اقتلك فى المدونة دى و تبقى شهيد اول تعليق يعنى ولا ايه
ياباااااااااااااااااااااااااااااى على دى ناس ياجدع
يعنى مش كفايه ان المدونة بتاعتهم كمان عايزين ياخدو التعليقات
×_×

و ايه عارفين و مش عارفين و الكلام اللى يتوه ده
ماتحدد عارفين ولا مش عارفين
بس اسكت فرحانة قوووى على موضوع الشعر ده
ايوة ماهو الواحد احتار معاك و مابقاش عارف هيعمل ايه
يااااارب تطلع بقى من المطبخ ياراجل علشان نفساويتنا مش تتعب اكتر من كده

صحيح آله الزمان مش هستخدمها اصل الدك قالى انها غلط على صحتى
و انا بخاف على صحتى ياخويا ايوة امال ايه
و كمان انا عجبنى حالى دلوقتى لا عايزة ماضى ولا مستقبل
مع ان الماضى فى حاجات حلوة بس اكيد مدام راحت يبقى ربنا شيلى الاحلى و انا طماعه بقى و عايزة الاحلى مش الحلو بس
D:

و انا كمان ببعت سلام زيك ياسلام اشمعنا انت يعنى تبعت سلام ها ها انت فاكر انك لوحدك بتعرف تبعت سلام ولا ايه

اما بقى اللى فى الاول ده كبر دماغك حاتى حاتى
انت فى بلوجر يعنى مش فى مكان غريب علشان مش تكبر
^_^

يلا بقى امشى انا لحسن اكون تقلت عليك ولا حاجة
P:; ٢/١٢/٠٩ ٣:٠٠ م
MOHAMMED ELBANNA يقول...: مصطفى
بيني وبينك يا درش انا مش عايز ارجع ولا اتقدم انا مبسوط كده والحمد لله .
كل عام وانت بخير .
محمد البنا
طريق النجاح
ـــــــــــــــــ
اتمنى تشرفني بالزياره على طريق النجاح
http://tareekelnagah.blogspot.com/; ٣/١٢/٠٩ ٤:٣٥ م
z!zOoOo يقول...: أزال المؤلف هذا التعليق.; ٤/١٢/٠٩ ١:٢٨ ص
z!zOoOo يقول...: سلام عليكم

ازيك يا عم مش عارف

قصدي يا عم مصطفي

بقالي كتير مش عارف اعلق عندك

علي فكره بالنسبه للتعليق الي انت اتكلمت عليه

انا شوفت تعليق برضه بس مش فاكر عند مين مشابه قوي للي انت بتقوله

ومش عارف كاتبه علي اساس ايه

الظاهر بيمشي يوزع نفس التعليق

:)

بالنسبه بقي لحوار الشعر

انا ليا كتير لا كتبت اشعار ولا قصص

ولا خواطر ولا قصاقيص ولا مواضيع ولا أي حاجه

مجرد افكار بتيجي بدونها وخلاص

دماغي واقفه خالص

ده غير موضوعات في دماغي كتير

وافكار كتير بس مش عارف لا قادر اكتبها

بالنسبه بقي لألة الزمن

لو براحتي يبقي يوم

حجه الوداع الي الرسول قال فيه الخطبه

اولا عشان نفسي ابكي كتير

ثانيا عشان كان نفسي اعيش ولو لفيمتوثانيه اشوف

فيها النبي عليه الصلاه والسلام

وعشان كنت اموت بعدها

:)

ربنا يكرمك يا مصطفي

ومش عارف اقول حاجه تاني

ويارب ترجع تقرفنا

قصدي تمتعنا بأشعارك للحبيبه المجهوله

تحياتي; ٤/١٢/٠٩ ١:٢٩ ص
غير معرف يقول...: مشاء الله عليك اما انت دماغك فيها هموم وبتقول ده كلو انما لو مفهاش هموم كنت هتعمل ايه ارجع واقول مشاء الله عليك

صديق من ايام الكليه; ٤/١٢/٠٩ ٣:٢٢ ص
غير معرف يقول...: اه معلش نسيت اله الزمن
أقولك بلاش كلام يخلي الناس تتجن اكتر مهي مجنونه

صديق من ايام الكليه; ٤/١٢/٠٩ ٣:٢٦ ص
Arsenal Way يقول...: دنيا
--
اهلا اهلا

احسن تعبير عجبني فعلا " كنتي فين يا نو لما قلت ييس "

هههههه

نورتيني
-------------------

سامر محمد عرموش
---------------
استاذ سامر بالطبع غزوة بدر حدث الكل يتمنى يحضره - و تبقى ايام الثانويه الافضل عند الجميع

مرورك دايما بيسعدني
----------------------------------------; ٤/١٢/٠٩ ٣:٥٦ م
Arsenal Way يقول...: MaraM
-------------------
اهلا مرام فعلا احيانا الواحد بتيجي عليه فتره مش يبقى عارف يكتب ايه ولا ليه .. لكن نتمنى تعدي بسرعه

ويارب ترجعي تكتبي شعر تاني

مرورك اسعدني و اتمناكي زائره دائمه; ٤/١٢/٠٩ ٤:٠١ م
Arsenal Way يقول...: شباك موارب / منار
-------------------
أهلااااااا منار .. كويس انكم احسن مني
هو الفاضي بيعمل قاضي غالب
واضح انك عايزه آلة زمن تفصيل - عايزها تمسح ذكريات سيئه .. يا سلااام
نبقى نخترعهالك ان شاء الله
D: D:; ٤/١٢/٠٩ ٤:٠٤ م
Arsenal Way يقول...: أيووووووووشه

اهلا بالتخاريف و الاحاسيس

انتي كتبتي قبل كده في مدونتك عن اليوم ده

بس اكيد لو مش تعرفي ترجعيله اكيد تقدري تعيشي زيه

تحياتي; ٤/١٢/٠٩ ٤:٠٨ م
Arsenal Way يقول...: sweet
-------
نوورا

براحه عليا بس

اديني يا ستي غيرت الاسكربت عشان ترتاحي

اما بقى انتي عاجبك حالك كده

يارب تكوني دايما في احسن حال ومبسوطه

تعرفيش عنوان المطبخ ده
هههههههههههههه; ٤/١٢/٠٩ ٤:١٠ م
Arsenal Way يقول...: MOHAMMED ELBANNA
-----------------
اهلا يا فندم
يارب دايما تكون مبسوط على طول

زيارتك الاولى اسعدتني
و اكيد هزورك في طريق النجاح; ٤/١٢/٠٩ ٤:١٤ م
Arsenal Way يقول...: zizooo
----------
زيزو باشا

انا مش عارفني
ههههههههه

كلنا كده و الله افكار متضاربه بدون تنظيم

عايزين نشوفلك حاجه جديده يا عم

ربنا يكرمك دايما يا زيزو; ٤/١٢/٠٩ ٤:١٩ م
Arsenal Way يقول...: صديق من ايام الكليه
____________________

هلا بيك يا الغالي

تعرف بقى انت وحشتني جدا من غير ما اعرف انت مين

عموما امنى تكتب اسمك عشان اعرف انت انهي حبيب

تسلم يارب; ٤/١٢/٠٩ ٤:٢١ م
متفائل دايماااااااا يقول...: ايه دا ياعم الريس
انا حسيت اني دخلت مكان غلط..ايه التغيرات دي انت دهنت وش جديد امتى

وبالنسبه للموضوع كلعاده انا مش فاهم حاااااده واصل وايه دا كله اللي انت كاتبه انا لغايه ماقريت الموضوع لالخره نسيت اوله بيتكلم على ايه

وبالنسبه لليوم اللي احب اختاره هو يوم في المستقبل ..وهو يوم فرحي ان اراد الرحمن عشان اسوف شكل البت بتاعتي وبقيه اليوم لاخره...... ^_*; ٤/١٢/٠٩ ٦:٣٦ م