سنه و غارت

اهلا

الواحد كبر و الله  ..

قال بكره 2010 فين ايام لما كنت في سنه 98 و التلفزيون مش فيه غير القناه الاولى و التانيه

فاكرين لما مصر كلها كانت تقعد قدام التلفزيون الساعه 8 الليل عشان يسمعوا المسلسل

و كان بيبقى ليلة طين لو مجلس الشعب طول و المسلسل مجاش

مش عارف ايه اللي رجعني لورا قوي كده

عموما أهي 2009 خلصت و أحب أقول أهي سنه و غارت

ع الصعيد الشخصي كانت فيها لحظات حلوه و لحظات وحشه

يعني إتخرجت من هندسه و أخويا خالد اتزوج و الباشمهندس احمد سعد اتجوز

و انا ما اتجوزتش

بس من اوحش اللحظات في السنه لما خلصنا مشروع التخرج و ودعت اصحابي و دفعتي

اما بقى ع الصعيد الوطني فكانت سنه منيله بنيله

كوارث بشريه و طبيعيه و حاله كرب

كوارث رياضيه .. أكتر شيء تعبني نفسيا الفتنه بين المصريين و الجزائريين

فتنه كان يجب ألا تحدث تحت أي ظرف .. و المرير في الأمر أنها حدثت بسبب الكوره

أحسن حاجه في 2009 إنها عدت

في 2009 اتعرفت على مدونين أكتر و أسعدني جدا معرفتي بيهم

الليله ليلة راس السنه طبعا هأقضيها في البيت

بس السنه اللي فاتت كانت ليله غريبه جدا

و لا كأنها ليلة راس السنه

ممكن تعرفوا الحكايه من الموضوع ده  -  أضغط هنا

أحب أهني أي شخص دخل قرا الموضوع ده

كل سنه و أنتم طيبين

طبعا من باب مجاملة التفاؤل بنقول يارب السنه دي تكون أحسن

دعواتكم تكون سنه احسن

كل سنه و انتو طيبين

سلام

مصطفى أبوزيد - ليلة الجمعه 1 يناير 2010