حصريا من الأرشيف - بكــار

حصريا من الأرشيف

-----------------

بكار

--------------------------------------
أهلا بيكم

والله انا مبسوط ده الموضوع التالت في خلال عشر ايام

المره دي هنحقق الوعد

وعدتكم من ساعة رأس السنه اني هنزل الموضوع اللي طلبه كتير من حبايبي

احمد نور صدعني علشان خاطر الموضوع ده

وخليفه بيغيظهم ويقول انه الوحيد معايا اللي معاه نسخه من الموضوع

هوه دايما خليفه كده معاه كل حصرياتي

-------

الموضوع اسمه بكار

كتبته وانا في تانيه ميكانيكا

ونزل فتره في مدونه كانت على موقع تدوين واتقفلت

وقصة قفلها هاتعرفوها قريب

المهم الموضوع ده غالي عليا جدا

ساعتها عجب الناس خالص

طولت عليكم صح؟؟

ندخل في الموضوع

بس خليكو فاكرين اني بتكلم وانا في تانيه ميكانيكا

---------------------------------------------
بكار

من يوم الواحد ما عينه فتحت على الدنيا وهو بيلاقي مسلسل الاطفال اللذيذ الممل اللي اسمه بكار

وطبعا صاحبنا بكار ده ولد عشره على عشره أدب ايه وأخلاق ايه

ومفيش مشكله محيرة الناس ومش لاقيين لها حل حتى البوليس نفسه

الا و الواد بكار يحلها في ظرف حلقتين تلاته

لدرجة انه الوحيد اللي يقدر يقبض على مشرط الشرير

-----

قلت يا سلام يا واد يا مصطفى لو دفعة تانيه ميكانيكا كلها كانت زي الواد العسل بكار

واحد ظريف هيسألني ويقولي ايه الميزه في كده

أقوله لو الدفعه كلها زي بكار

مكنتش هتلاقي واحد يدخل المحاضره متأخر

لأن بكار بيصحى من النوم من النجمه علشان يلحق محاضراته

------

ومكنتش هتلاقي الدكتور بيشرح في حاجه واخدينها امبارح

والطلبه قاعدين مبلمين كأنه بيتكلم في حاجه من أيام سيدنا نوح

لأن بكار ولد موس وبيذاكر أول بأول ومش بيسيب حاجه تتراكم عليه

---------

ومكنتش هتلاقي واحد ينطرد م المحاضره

إزاي طيب وبكار ولد أمور ومؤدب ومش بيكلم اللي جنبه ابدا

-------

طبعا الكلام ده ميه ميه لكن للأسف الحلو ما يكملش

كنا هنلاقي شوية مشاكل هتطلع

====

اولا كنا هنلاقي القسم كله مليان معز

لأن كان كل بكار في الدفعه هيجيب المعزه بتاعته اللي اسمها رشيده

وكان كل واحد من الدكاتره هيلاقي معزتين تلاته احتلو مكتبه

وفين وفين لما تقنع بكار ميجبش رشيده معاه

هوه بكار مؤدب ومحترم ماشي لكن لما الموضوع يتعلق برشيده ميعرفش ابوه الله يرحمه

----
المشكله التانيه ان ممكن يطلعلنا في الدفعه عشر طلبه مثلا زي مشرط الشرير
طب وهوه بكار فاضي من المذاكره للاشكال اللي زي مشرط ده؟

-------
والمشكله الأكبر ان ممكن ربنا يبتلينا بكام واحد زي عمك زيدون

ودي تبقى مصيبه كبيره وحلت ع القسم

زيدون ده فقر بشكل ومخه على قده

يعني ممكن يقوموا يسألو الدكاتره أسئله من النوع اللي يشل

ويعني احنا بنلاقي الدكاتره في الشارع

علشان كده الحمد لله ع الدفعه دي

هي دفعه عايزه واحد يولع فيها بس اهو قضى اخف من قضى

مصطفى ابوزيد - 18 أكتوبر 2006

--------------------------------------------------

أتمنى تكون عجبتكم

استنوني قريب مع بوست جديد

اسمه من ذاكرة النتيجه

مصطفى ابوزيد – 20 فبراير 2009