السلام عليكم
إزيكم يا جماعة وحشتوني جدا
يمكن ما تعرفوش إني أنا أحيانا بكون فيلسوف .. أيوه والله فيلسووووف
رغم إني انا في أولى ثانوي كان باقي ليا درجه و أسقط في الفلسفه
لكن فلسفتي أنا إني بشوف الحاجات بوجهة نظر تانيه خالص .. ممكن تخلينا أقتنع بحاجه الناس مش بتحبها
وتخليني مرضاش أعمل حاجات عاديه الناس كلها بتعملها
_____
لكن المره دي فلسفتي مختلفه خالص
فلسفه يمكن غلط .. لا هي غلط فعلا
بس داخله دماغي
غلاسه بقى
________________
كلنا عارفين الأغنيه بتاعت نانسي عجرم اللي بتقول
" شخبط شخابيط لخبط لخابيط مسك الالوان ورسم ع الحيط"
اللي حضرتها زعلانه فيها خالص من الشخبطه ع الحيطه وبالخصوص من حماده وقالتله
" أعمل إيه وياك يا حماده .. اللي عملته ده أسوأ عاده "
بس المشكله إن عندنا في مصر اللي عمله حماده ده مش غلط خالصبالعكس حماده طبق اللي بياخده في المدارس
الراجل شخبط ع الحيطه .. عبر عن اللي في دماغه ع الحيطه
ليه بقى ؟؟ أقولكم أنا ليه
لأن حماده أخد في التاريخ أن الفراعنه العظماء أصحاب أحسن حضاره في التاريخ
كانوا بيكتبوا حضارتهم كلها على جدران " حيطان " المعابد
ولو كده مكنش حد هيعرف حاجه عن حضارتهم
إوعى حد يقولي أصل الفراعنه مكنتش عندهم حاجه يكتبو عليها لأني هقوله
ليه؟؟ الفراعنه كان عندهم ورق البردي ليه بقى مكتبوش عليه
ولا هي الشخبطه حلوه للفراعنه وكخه على حماده
يا واد ياحماده شخبط براحتك ولا يهمك
يمكن يا نانسي الاغنيه دي تنفع للعيال السيس بتاعت لبنان
العيال بتاعت بابا وماما
لكن إحنا في مصر العيال بتاعتنا دماااااغ
اللي في دماغه يكتبوا على أقرب حيطه
الله على الفلسفه يا مصطفى .. فيلسوف يا بني والله
وعلى رأس المثل اللي أنا ألفته
:: " اللي في دماغك إكتبه ع الحيطه بدل ما تعملنا زيطه "::
____________________________
عايزين نعرف رأيكم إيه في الموضوع ده
سلام بقى
---------------------
مصطفى أبوزيد
5/2/2009
11 Comments
