ميكانيكا بتاعتنا .. مش بتاعتكم

إزيكم

رغم اني مكنتش ناوي اكتب اليومين دول

إلا ان في حدث حصل خلاني اجي اكتب مخصوص

وعلشان ما أقصدش حد معين بكلامي هنسمي الموضوع

وجهة النظر الضيقه

من يومين كان عندنا في قسم ميكانيكا اجتماع بين الدكاتره والطلبه

عشان يشوفو مشاكل الطلبه واقتراحاتهم

وبما اني في اخر سنه رحت بسلبيه محضرتش

امجد صاحبي حضر لانه لسه باقي له سنه

ولما رجع قاللي ان في بعض الإقتراحات صدرت من بعض الطالبات الاوائل

كان من ضمنها انهم عايزين يلغوا نسبة النجاح اللي هيا 50 في الميه

ومن ضمنها كمان ان محدش يدخل ميكانيكا غير اللي جايب جيد في بعض مواد معينه لها علاقه بميكانيكا

انا سمعت كده والعفاريت ركبتني

وجهة نظر تفتقر لاي خبره او درايه

سامحوني لكن دي الحقيه

أيها الساده الاوائل

إسمعوا و اعو

لو سألنا واحد في كلية صيدله مثلا ملوش علاقه بهندسه

وقلناله ايه اللي يميز مهندس ميكانيكا عن التاني؟

هيجاوب بثقه .. الخبره العمليه وتأكدوا مش هيقول التقدير

مهندس الميكانيكا يا ساده مش هيقعد على مكتب يمضي ورق

لأ .. مهندس الميكانيكا شغله كله عملي

مش نظري

لو حضراتكم بتجيبوا امتياز

أتحداكم على ملأ من الناس انكم تعملو ربع الشغل العملي اللي بيعملو طالب

من طلاب اولى ميكانيكا اللي في مشروع روبوكون

الطلبه دي اخرها مقبول

روحوا اقفوا جنبهم واتعلموا منهم

مش عشان انتو شاطرين في النظري يبقى الدنيا تمشي بوجهة نظركم

انا مكنتش ناوي اتكلم في الموضوع ده

لكن انا كان لازم ادافع عن وجهة نظري

طبعا انا من اهل المقابيل وعمري حتى ما جبت جيد

ومش هأزكي نفسي واقول انا بعمل واعمل واعمل

لكن هأرجع واقول شوفو طلبة اولى بيعملو ايه

الناس اللي أسست مشروع روبوكون في ميكانيكا اسيوط

من 3 سنين

وهو اكبر مشروع عملي على الاطلاق في الكليه

كنا كلنا ساعتها شايلين مواد واللي ناجح ناجح بالعافيه

طبعا الجماعه الاوائل مش فاضييين من المذاكره عشان يدخلو المدونه ويقروا كلامي

لكن اكيد في ناس يعرفوهم هايدخلو ويقروا

ابقو خلوهم يزورونا لمره واحده ويقروا الكلمتين دول

انا آسف لو كنت متحامل وعصبي في الكلام

لكن لحد شغلنا وخبرتنا ومجالنا ومحدش يتكلم

كله يلزم حدوده ويعرف امكانياته واخر قدراته

وعلى رأي الشاعر الللي بيقول

وكم من واهم في الارض يحبو .... ويحسب أنه بلغ العنانا

إنتهى الكلام

سلام

الاثنين - 13 ابريل 2009

-----

تنويه هام جدا

--------------------------

بعد رد احدى الزائرات ودفاعها المستميت عن البنات

أولا : الكلام هناعلى ميكانيكا اسيوط فقط مش اي قسم في اي جامعه

ثانيا : الكلام موجهه للطلبه الاوائل سواء كانوا بنات او ولاد

سيرة البنات جت هنا لانهم اللي اقترحوا الاقتراحات التعبانه دي

ثالثا : في ناس اوائل أثبتوا جدارتهم في العملي في ميكانيكا اسيوط

على رأسهم المهندس أحمد سعد والمهندس عبد الخالق

أما الطالب الاول الوحيد حاليا اللي ان شايفه بيشتغل عملي

هو جمال عبدالناصر بتاع تالته ميكاترونكس بس مفيش غيره

خلاص فهمتوا التنويه ؟

سلام