إزيكم كلكم
من غير كتر كلام ورغي كتير
انا قررت أكتب تاني
وأحب أشكر كل اللي ردوا ع البوست اللي فات
المهندس عبدالخالق وبلال والفراشه والحزينه و آيوشه و د.عرفه وأحمد عبدالسميع
و كل الناس اللي كلموني شفهيا أو ع الإيميل
---
.
خلونا ندخل بسرعه ع الطلقات
____________________
طلقات ذهبيه 4
-------------------------------------------
(1)
إنزيمات الذكاء المصري
-------
الشعب المصري بصراحه عقليته تمتاز بإنزيمات ذكاء خاصه
دايما بتطلع عند اللزوم
هأكلمكم عن إنزيم النهارده من أهم الإنزيمات
إنزيم بيزداد فاعليته لما تيجي سيرة دفع الفلوس
في حاجات صعب جدا أنك تدفع المصري فيها فلوس
.
يقعد يحور ويناور ويقاوم ويتكتك
ويطلع بأقل الخساير
ده مش معنى انهم نصابين
لأ هوه شعور أن الفلوس دي بيضحك عليهم لو دفعوها
أو شعور بالإستغلال والإحتكار
هنضرب 3 أمثله سريعه
أول مثال
برامج الكمبيوتر
--
برامج الكمبيوتر غالبا كلها بتكون محتاجه ترخيص ده يعملو مثلا 20 دولار
المصري يبدأ يفكر ويول 20 دولار مين؟
و في خلال يومين يكون لف كل المنتديات اللي ع النت
وجاب البرنامج نسخه أصليه مرخصه مدى الحياه
وميدفعش ولا مليم
كل نسخ الويندوز اصلا تلاقيها مضروبه وشغاله كفاءه
في حين إن نسخة الويندوز تعملها بتاع 200 جنيه
المثال التاني
.
المراجع الدراسيه العلميه
في كليات زي هندسه مثلا بيدرسو من مراجع عالميه
يعني الكتاب يكون مؤلفه من جامعه في اليابان ولا إنجلترا
والكتاب مطبوع في امريكا مثلا
ممكن في تيرم واحد يدرس من 5 كتب مثلا
لو هيجيبهم بتمنهم الاصلي
نسخة الكتاب الواحده تعملها 250 جنيه
يعني هيعملو في التيرم 1200 جنيه مصاريف كتب
تخيل لو أنا قلت لأبويا هات 1200 جنيه أجيب كتب
ممكن يعمل فيا ايه
طب المصري يقعد يتفرج لأ طبعا
في فئة تانيه من المصريين انزيمات ذكائهم تطلع
يعملو مطابع تحت السلم من غير ترخيص
يشتري نسخه من الكتاب
و هوبا .. إطبع إطبع إطبع
الاف النسخ
النسخه آخرها 40 جنيه
يعني الخمس كتب اللي بـ 1200 جميه
بقيوا بـ 200 جنيه
يا بلااااش
--
المثال الأخير
--
باقات التلفزيون
كان زمان الـ إيه آر تي
بعده الشوتايم والاوربت طلعو
و أخيرا الجزيره الرياضيه
.
كل باقه من دول واخده حاجات حصريه
ع الـ اي ار تي دوري ابطال اوروبا و كأس العالم
ع الشوتايم الدوري الإنجليزي
ع الجزيره الدوري الأسباني والإيطالي
ع الاوربت عمرو أديب
يعني يا ولاد لو واحد عايز يتفرج على كل ده
يدفعله يجي 1000 جنيه في الشهر
بس على مين يا حج
بسرعة الصاروخ مخ المصري يشتغل
و إخترع وصلة الدش
إختراع وإفتكاسه مصريه تاريخيه
كل الباقات دي وأهم القنوات ب 20 جنيه في الشهر
طب بالله عليكم مش حقهم يعملوا كده
؟؟
ليه أشتري كل برامج الكمبيوتر
ليه ادفع في كتب 1200 جنيه في تيرم
ليه علشات اتفرج على شوية ماتشات كوره أشترك في اربع باقات
و من هنا نوصل أن المبدأ اللي ماشيين عليه المصريين هو
" ليه تدفع أكتر لما ممكن ما تدفعش أصلا ؟؟ "
---------------------
(2)
فلسفة الإعتراف بالخطأ
____________________
مين في الناس عنده الجرأه يقول أنا علطان
قليل جدا
ده انت لما يكون اتنين اصحابك زعلانين وتحب صالحهم بتبقى حكايه
محدش فيهم غلطان كله بيبرر لنفسه ويطلع التاني غلطان
وفي النهايه تطلع انت الغلطان لأنك اتدخلت بينهم
هأديكم مثال من السياسه
وبصو بقى الحيطان ليها ودان
عندك في مصر
الحزب الوطني وكفايه والإخوان والناصري والوفد والمستقلين
.
كلهم شايفين انهم صح ومش غلطانيين
وشايفين الباقيين عملاء وخونه وحراميه
لما انتوا كلكم صح وكويبسن
مين اللي غلطان
وليه البلد حالها كده
يكونشي أنا اللي غلطان
؟؟؟
------------------
(3)
من عجائب الدكاتره
------
أما يا جدعان دكاتره الجامعه دول عليهم عجائب
بيطلعوا بحركات تخليك هتتجنن
ولا تقدر تعملو اي حاجه
هأديكم مثالين
في واحد دكتور عندنا
اللي هيعرفه ويقول اسمه في تعليق هأطحنه
مش ناقصه جر شكل
تلاقيه في امتحان التيرم كاتبلك على رأس الورقه
" توجد عشرون درجه إضافيه في حالة إجابة كل الأسئله "
هع هع هع
يعني لو حليت الخمس مسائل صح تاخد 20 درجه
يا صلاة النبي يا صلاة النبي
طب ما انا لو حليت الخمس مسائل هجيب 100/100 هأحتاج درجات تاني ليه ؟
و المشكله ان الامتحان اصلا بيكون صعب وميتحلش
حاجه عجيبه جدا .. صح ؟
المثال التاني
في دكتور عندنا اللي هيعرفه ويكتب اسمه في تعليق هأعدمه
أثناء ما بيشرح حذف كذا حاجه من المنهج
وقال دول مش جايين في الامتحان
تدخل إمتحان التيرم تلقي أول سؤال مكون من اربع فقرات كلهم محذوفين
أنا مسكتش
قلتله يا دكتور السؤال الأول ده من المحذوف
رد عليا بكل أناقه ولباقه ولياقه وشياكه
" لا يابني ده أنا كنت حاذفهم حذف مؤقت "
سمعتوا عن الحذف المؤقت ؟؟
حاليا بالأسواق
_____________________
يلا سلاموووووووووز
مصطفى أبوزيد - 19/3/2009
z_elhafy@yahoo.com
أنت تسأل وأنا أجيب
إسألوا بصراحه
