بسم الله الرحمن الرحيم
أولا شكل المدونه الجديد يا رب يعجبكم
ندخل في الموضوع
العنوان إسمه صيدلية عصير الكتب
قبل ما حد يشتم هنوضح الفكره
طبعا كلنا متابعين برنامج عصير الكتب اللي بيقدمه الكاتب بلال فضل على قناة دريم
و البرنامج الصراحه ممتع لكل مثقف و مهتم بالأدب و القراءة و المعرفه
و بيدي توجيهات و إشارات لحاجات قيمه جدا أدبيا و إحنا الشباب يعني ما سمعناش عنها بحكم سننا
المهم من أجمل فقرات البرنامج في كل حلقه
هي فقرة الروشته الأدبيه
و فكرتها أنهم بيلتقوا بكاتب أو أديب كبير جدا على الساحه و له تاريخه
يكلمنا عن أهم الكتب اللي شكلت حياته الأدبيه و اللي أثرت فيه
و يقول أسمائها
طبعا أنت مش معقوله هتقرأ كل الكتب اللي بتتقال في الحلقات لكن بعض منها هيكون مفيد جدا
و كل واحد يختار اللون اللي بيستهويه
الفكره بقى أن كتير من الكتب دي قديم جدا و قد يصعب جدا توفيرها في الأسواق
خصوصا بعيدا عن القاهره
لكن توافرها على الانترنت ممكن و تقوم بقرائته على الكمبيوتر
إن شاء الله أنا هحاول أجمع الكتب اللي بتتقال في الروشته و إعادة رفعها مرة أخرى
على سيرفرات معروفه و سريعه في التحميل
و نوفر عليكم إن شاء الله عناء البحث و اللف في المنتديات و مشاكل التحميل و السيرفرات
نبدا بحول الله مع الحلقه الأولى
و كان الدكتور اللي كتبلنا الروشته
عمنا و عم الكل الشاعر الكبير عبد الرحمن الأبنودي
و لأنه عبد الرحمن الأبنودي لم تكن روشتته عاديه أبدا
الرجل لم يحدد أسماء كتب معينه بقدر ما حدد اسماء أدباء مهمين
و لكن أول نصائح الأستاذ الكبير كانت
إنك ما تستخسرش الفلوس اللي هتدفعها في الكتاب لأن فايدته أهم من الفلوس
و دي حاجه مهمة جدا لأن في ناس بتقولك أدفع 30 جنيه في روايه ليه ؟
قيمة العمل اللي مكتوب في الورق أكبر طبعا من القيمة اللي بتدفعها في شراؤه
النصيحه التانيه و الأهم هي القراءة بتأني و ليس لمجرد القراءة
و محاولة إعتصار ما يصبو إليه الكتاب
أول الكتب اللي دلنا عليه الأبنودي بخصوص الشعر
نصح الجميع بقراءة رباعيات الرائع صلاح جاهين و لكن بتأني
و الشيء الرائع في النسخه اللي هأديكم رابط تحميلها لاحقا هي أنها من تقديم الأستاذ الكبير يحيى حقي
و التقديم لمدة 40 صفحه ممتعه ثم تأتي بعدها الرباعيات الرائعه
بعدها تحدث الأستاذ الكبير عن باقي الأدباء مثل جمال الغيطاني و إبراهيم أصلان
و نصح للقراءة ليهم و لـ رواياتهم
و الشعراء مثل الشاعر الأستاذ أمل دنقل و خصّ الأعمال الكامله لـ أمل دنقل
اللي هديكم الرابط لتحميل الطبعة الثالثة المنشورة سنه 1987
و ده السبب اللي خلاني أعمل الموضوع ده لأن زي ما انتو شايفين الإصدارات قديمه
و صعب توفرها في الاسواق و في كل الأماكن
و كذلك شعر الراحل فؤاد حداد
ثم يخبرنا الأبنودي عن روعة الروايه التي بدء قراءتها للمرة الثانيه
رواية الكاتب الدكتور محمد المنسي قنديل بعنوان يوم غائم في البر الغربي
و مدى روعتها اللي دفعته لقراءتها للمرة الثانيه
نيجي بقى لروابط التحميل
أنا رفعتهم على موقع ميديافاير و هو من أسهل و أسرع السيرفرات
أما بخصوص الشاعر فؤاد حداد وجدت صعوبه شديده في تحصيل الأعمال الكامله له
و لكن مؤقتا في الرابط أدناه تقريبا 35 قصيدة للشاعر الرائع
مجتمعه في موقع أدب للشعر
أما رواية يوم غائم في البر الغربي للدكتور محد المنسي قنديل
طبعا الرواية صدرت في أكتوبر الماضي و متوفره في كل المحافظات
و أعتقد من كلام الأستاذ الأبنودي أنها تستحق الفلوس اللي هتدفع فيها
طبعا الرواية من إصدار الشروق
في ختام الحلقه الأولى مرة أخرى أعذروني عدم توفر كل ما قاله الأبنودي
لأني زي ما قلتلكم الرجل حدد أسماء أدباء و لم يحدد أسماء كتب
بعكس الأستاذ الكبير أسامة أنور عكاشة اللي قال على أسماء كتب معينه
زي ما هنشوف في الحلقه القادمه من هذه السلسله خلال أيام
أي حد يحب يضيف حاجه او يقترح أي إقتراح يكتبه في تعليق
أو على إيميل المدونه
في النهايه دعوة بـ ظهر الغيب تكفيني
مصطفى أبوزيد - 4 مارس 2010
