( 1 )
الشعب المصري ده مش عارف مصلحته
الحزب الوطني ماليلهم الدنيا إعلانات لأجلك أنت ، الحزب الوطني في مصلحتك ، و برضه مش عارفين مصلحتهم
و في الإنتخابات الأخيره مش عايزين الحزب ، إخص عليكم
علشان تعرفوا بس ان التزوير اللي حصل كان علشان مصلحتكم انتوا
بأتعجب من موقف الإخوان المسلمين من الانتخابات
رغم إن حصول الحزب على اكتر من 90 % من المقاعد في تطبيق للمادة التانيه من الدستور
المادة بتنص ان الإسلام هو الديانه الرسميه للبلد و مصدر التشريع
و لما كان الاسلام بيقوم في الاصل على عقيدة التوحيد فالحزب قرر ان البرلمان يكون موحد في اتجاه واحد
و الشويه اللي مش تبع الحزب ربنا يهديهم الدوره الجايه ان شاء الله
فهمتوا بقى :)
بيحضرني في الموقف ده عنوان كتبه احد المدونين من 3 سنين ، كتب الوطني لا شريك له
وحدووووووووووووووه
( 2 )
قطر هتنظم كأس العالم سنة 2022 و طبعا درجة الحراره بتكون فوق الـ 45 تعمل ايه قطر بقى
هتعمل ملاعب كوره مكيفه ، يا ولاد اللذينه
تخيل 8 ملاعب كرة قدم مكيفه بالكامل و حجم القدره الكهربيه المطلوبه
هيكيفو البلد يا اخوانا ، يخرب بيت الفلوس
كان عندي حق بقى لما طالبت في شهر سبعه اللي فات بتكييف لكل مواطن
عموما سنه 2022 لما الكهربا تقطع عندنا طول الصيف وزير الكهربا هيقول الإنقطاع بسبب الاحمال الزائده في دولة قطر
( 3 )
كل ما اروح اقطع تذكره في المترو الاقي اللي ع الشباك مش طايق امه و معرفش السبب
امبارح لقيت واحد بيشتري تذكره بيقوله عايزه تذكره شبرا
الراجل اللي ع الشباك عضلات وشه تقلصت و اداله التذكره ، ساعتها بس عرفت ليه اللي ع الشباك مش طايقين نفسهم
الموقف ده شوفته في اخر كام شهر يجي 10 مرات
المفروض الاخت اللي قاعده تقول عزيزي راكب المترو حرصا منا على سلامتك و تديله النصيحه
تقول عزيزي راكب المترو حرصا منا على سلامة الموظفين اعلم ان سعر التذكره موحد لكل الخطوط و موظف الشباك لا يتدخل بأي حال في الإتجاه الذي ترغب بسلوكه يخرب بيت ابوكم مليتو البلد
تصبحو على خير
