الصراحه راحه

الصراحه راحهأعتقد ده افضل عنوان للموضوع اللي هجاوب فيه على أسئلتكم

---
وأنا هبدأ بسؤال رامي صاحبي في الدفعه

س: هتستفاد إيه من ده كله ؟

جـ : بص يا حج رامي بالنسبه للمدونه هي تعتبر بالنسبه لي منفذ كبير بأطلع فيه اللي جوايا

في نوعيه من الناس متقدرش تكتم في نفسها ولو كتمت بتنفجر فجأه وتكون العواقب سيئه

أنا واحد من الناس دي

لازم أتكلم

لو سكت ممكن افضل ساكت وفي الآخر أعمل مصيبه

وبصراحه يا ابورامي انا بدأت أكتب بكثافه شديده من بعد الناس اللي كنت بأفضفض معاهم مبقوش جنبي

وعلى رأسهم أختي اللي تزوجت في القاهره والمهندس أحمد سعد اللي رحل لروسيا

دول اكتر اتنين كنت بأفضفضلهم

دلوقت هأفضفض فين غير في المدونه

قشطه ؟

-----
الفراشه كان ليها نصيب الأسد من الأسئله

س: ايه اكتر حاجه كان نفسك تحققها و محصلتش؟

جـ : مش حاجه واحده بصراحه بس طالما انك قولتي أكتر حاجه كان نفسي اعملها

يبقى العمره – أنا كان نفسي أعمل عمره وأنا طالب وبالذات الصيف اللي فات

لكن ربنا لسه ما أردتش

أسأل الله أن يرزقني العمره والحج
-----

س: ايه اللى بتفكر انك تحققه دلوقتى فى الدراسه وبره الدراسه؟

جـ : بالنسبه للدراسه أنا مركز جدا إني أجيب إمتياز في مشروع التخرج

لأن هو المقياس لدراستي وخبرتي في الشغل العملي

بالنسبه لبره الدراسه مش فاهم حاليا ولا بعد الدراسه

لكن حاليا بره الدراسه إن شاء الله بأسعى للإرتباط وربنا يسهل ودعواتكم جميعا

بعد الدراسه فيه سؤال جاي بالمعنى ده

----
س: ايه اكتر حاجه بضايقك؟

جـ : أكتر حاجه بتضايقني بجد لما محدش يثق في كلامي

بالذات لأني مبعرفش أكدب وصريح فعدم الثقه بيضايقني جدا

حاجه كمان بضايقني موت لما بشوف طفل صغير أو طفله بيشحت ولا يبيع مناديل

بأبقى عايز أبكي

وبقول حسبي الله ونعم الوكيل في اللي خلاك تعمل كده

كمان حاجه بتضايقني هي أخلاف لمواعيد لما حد يديني ميعاد ويخلفه بدون إعتذار قبلها باكون في قمة العصبيه

-----

س: الموقف اللى اثرت فى حياتك بسلبيه وايجابيه؟

جـ : أنا إجابتي غير تقليديه شويه لأن المواقف اللي أثرت في حياة بالسلب هيا الأحداث السعيده واللي أثرت بإيجابيه

هي الأحداث الحزينه والقاسيه

نبدأ بالسلبيه
حدث سعيد جدا وهو زواج أختي رغم سعادتي التي لا توصف إلا إني فقدت شخص كنت بأحكي معاه كل مشاكلي

السلبيه إني مبقتش بقعد معاها كتير ولا بأحكيلها زي الأول وده سببلي لفتره كبيره ضغوط عصبيه شديده

وكنت حاسس بالوحده بشكل كبير

موقف سعيد أخر أثر في حياتي بسلبيه

هو سفر المهندس أحمد سعد لروسيا علشان يحضر الدكتوراه

كنت في قمة السعاده أنه خلاص مسافر علشان الدكتوراه

لكن أنا فقدت أغلى شخص بالنسبه ليا في الكليه

مكنش بالنسبه ليا معيد

كان أخ كبير وصديق وصاحب

والناس القريبه مني تعرف كده

سفره في بداية السنه كانت نتيجته بالنسبه ليا تخبط وهرجله في حياتي

وحتى الآن لازلت أعاني من غيابه بشده

اما للمواقف اللي أثرت بإيجابيه

فهي مواقف محزنه جدا

هي وفاة إتنين من أغلى الناس عندي صاحبي وبعده ابن عمتي وأعمارهم كانت لا تتجاوز ال 23 عاما

في سنتين متتاليتين

بداية اولى ميكانيكا وبداية تانيه ميكانيكا

رغم الصدمات القويه حينها إلا إنها تركت في النهايه أثر إيجابي

وعلمتني إن الدنيا لاتستحق أي صراعات أو أحزان أو زعل

و ان رضا الله هي الحياه الحقيقيه

كده أسئلتك يا فراشه خلصت
-------

سؤال محير مصطفى جابر من زماااان وانا عارف كده

س: إيه السر انك مبتزاكرش عشان تقدير وبتزاكر عشان النجاح فقط؟

ج: أسكت يا مصطفى مش انا طلعت عيان؟؟

ايوه انا عندي مرض اسمه تعدد الهوايات

بجانب حبي للهندسه عندك يا سيدي التأليف والكتابه والقراءات الأدبيه والشغف بكرة القدم

الرياضه عموما مش بس الكوره لأ كمان الطايره واليد والسله والتنس

لو ركزت في الدراسه بس يبقى شكرا على كل الهوايات

ده انا كمان كان زماني معملتش المدونه

كان لازم اعمل توازن بين هواياتي ودراستي

إضافه كمان إني لازالت عندي قناعه تامه ان الشغل مش بالتقدير

بل بإتقان العمل وسأظل مقتنع بكده

وانت عارف طبعا ان في ناس بتجيب امتيازات

وما تعرفش تعمل ربع الشغل العملي اللي بيعمله واحد بيجيب مقبول او حتى عايد السنه

مش عارف هتقتنع بالاجابه ولا لا بس دي الحقيقه

الزائره صاحبة لقب الحزينه بتسأل

-------

س:إيه اكتر موقف ضايقك أو كان محرج في حياتك؟

ج : أكتر موقف ضايقني مش هأقدر أقوله لأنه بيتعلق بشخص عزيز عليا جدا

وده طبعا لا يقع تحت نطاق الصراحه لأنه يخص شخص آخر

أكتر موقف كان محرج

طبعا طبعا أنك تركب مواصله عربيه يعني

وتفاجئ انك نسيت كل فلوسك في البيت

إحراج إحراج يعني

بس ربنا ستر وكان في ناس اعرفها في العربيه

بس احراج فظيع برضه

المهندس عبدالخالق من اليابان بيسأل

-------

س: ايه اللي حصل في شعبة ميكاترونيكس خلاني أكتب الكلام اللي انا كاتبه؟

ج: بص يا باشمهندس في اغنيه كانت بتقول " عواد باع ارضه يا ولاد شوفو طوله وعرضه يا ولاد

هوه ده اللي حصل بالظبط

طبعا لأن الموضوع يتعلق بناس يهموك ويعزو عليك هأبقى أحكيلك ع الايميل في اقرب فرصه

بدل ما نقعد نسيح لبعض

ملحوظه للقراء : "الصراحه في هذا الموقف لا تعني ذكر أسرار تخص آخرين

"لذلك الاجابه ستوجه للمهندس عبدالخالق فقط "

سؤال من داليا

-------

س : انا عايزة اسأل سؤال ايه أحلى مناسبة حصلت فى حياتك ....غير دخولك كلية الهندسة ؟

ج: طبعا توقع خاطئ انك تعتقدي ان دخول هندسه هو اسعد حاجه في حياتي

لكن الحقيقه افضل لحظاتي السعيده كانت لا تتعلق بيا وانما تتعلق بناس غاليين عليا

اولا: لما اخويا حسام رزق ببنته منة الله

ثانيا: لما اختي رزقت ببنتها رنا

ثالثا : لما علاء اخويا نجح في سادسه طب -هو حاليا في امتياز

رابعا : زواج المهندس أحمد سعد

ربما ستكون اللحظه الأسعد في حياتي هي التخرج من هندسة أسيوط

ربنا يسهل

---س: أنت كاتب و تلك الايام على مين ؟

ج : ليست لشخص بعينه وانما لكل من حسبوا ان المراكز تدوم و نسوا يوما سيلقون فيه الله

---
سؤال من حبيب قلبي الصواف

س: ماهو سر إعجابك وشغفك بأغاني محمد منير دونا عن كل المطربين؟

ج : طبعا يا صواف انت راجل عندك حس موسيقي عالي جدا

لما بسمع منير يغني وكأن النيل يغني

كلامه فلسفي لأبعد الحدود

لو فرحان تسمعه لو هتموت من الحزن برضه تسمعه

-----

سؤال من احمد حموده بيسأل

س: إيه طموحاتك بعد الكليه ؟

ج : بص يا ابو حميد

بعد الكليه ان شاء الله اطمح اني الاقي شغل كويس في مجالي

وبمجرد حدوث كده ان شاء الله يكون في ارتباط رسمي

اسعى دائما للإستقرار

بالنسبه للأولاد – ولادي يعني - طموحي انهم كلهم يحفظوا القران

في النهايه طموحي حياة هادئه مستقره محترمه

زوجه صالحه

أبناء صالحين

يقول النبي - صلى الله عليه وسلم

" إذا مات ابن آدم انقطع عمله إلا من ثلاثة : علم ينتفع به وصدقة جاريه و ولد صالح يدعو له "

----

س: ليه اسم المدونه تحت الياسمينه ؟

يا ترى عايش قصة حب دلوقتى؟

ج: إسم المدونه تحت الياسمينه

لأنها بتديني احساس بالذكريات

فيها شيء من الرومانسيه

هدوء الإسم بيتوافق مع كتاباتي

عادي يعني

أما إذا كنت عايش قصة حب دلوقتي

الاجابه [ لأ ]

----

س: من هو مصطفى ابو زيد من وجه نظر من حوله؟

من هو مصطفى ابوزيد من رأيه الشخصى؟

ج: بالنسبه من وجهة نظر من حولي فأنا لا أملك إجابه

ربما يجيبك من حولي فهذا رأيهم

ولكني لا أملك الا ان اقول اني لم اصاحب أحد يوما من اجل اي مصلحه

وانما كانت دائما صداقاتي خالصه لله

اما من انا في رأي الشخصي

فأعتذر لصاحب السؤال

لأني لم اتعود ان أثني على نفسي ولا أزكي نفسي أبدا

أسأل الله أن يسترني فوق الارض وتحت الارض ويوم العرض عليه

----

آخر سؤال

سؤال مشترك بين احمد حموده والحزينه واخرين ارسلوه على الايميل

ي: ما هي مواصفات الانسانه اللي انت عاوز ترتبط بيها؟

ج: مش محتاج طبعا اقول انها لازم تكون متدينه

ده شيء اساسي

بعد كده

هاديه وطيبه وذكيه

مؤدبه وطموحه ومثقفه

تملك هدف في الحياه

مش عايشه وخلاص

طبعا تكون رومانسيه حبتين

تقف جنبي في الحلوه والمره

تستحملني

تحتوي كل مشاعري

تحتوي هدوئي وثورتي

كلامي وصمتي

دموعي وضحكي

وتكون كما قال النبي

" إذا نظرت إليها أسرّتك وإن غبت عنها حفظتك "

___________

كده كل الاسئله خلصت

انا جاوبت بكل صراحه

اي حد له تعليق اهلا وسهلا

اي حد له سؤال تاني

يبعتو على الايميل

z_elhafy@yahoo.com

لاني مش هجاوب على اسئله هنا تاني

سلااااااااااااااااام

مصطفى أبوزيد

الأحد - 8/3/2009